ပ္ဍဲသေံ သွက်ဂွံသၠုၚ်ပ္တိုန် ကဏ္ဍအာတရဴတုဲ ထပ်သိုၚ်ခၞံပ္တိုန် သၞေဟ်က္ၜၚ်ကျာတၟိဏောၚ်

ၜၚ်ကံက်၊ အံက်တဝ်ဗာ(၁)

ကၟိန်ဍုၚ်သေံဂှ် သွက်ဂွံသၠုၚ်ပ္တိုန် ကဏ္ဍအာတရဴဴတုဲ စဳဇန်ဒၟံၚ် သွက်ဂွံထပ်သိုၚ်ခၞံအာ သၞေဟ်က္ၜၚ်ကျာကၟိန်ဍုၚ်နာနာတၟိ ပ္ဍဲဖူကေတ် ကဵုဖာန်ၚာဲရဂှ် ဓမံက်ထ္ၜးလဝ် ပ္ဍဲလိက်ပရိုၚ် Bangkok Post ရ။

အတိုၚ်မဳဒဳယာသေံ ဓမံက်ထ္ၜးလဝ်ဂှ်မ္ဂး အလဵုအသဳသေံဂှ် ပ္ဍဲကဵုဒေသန္တရခရိုၚ် မၞုံမွဲဒမြိပ်ရေၚ်ပြၚ်ၜဳကာပ္ပလဳဂှ် သွက်ဂွံသၠုၚ်ပ္တိုန် ကဏ္ဍအာတရဴ ချူဓဇက်လဝ် ကိုန်စဳမာန်စမြိုၚ်သ္ဇိုၚ် တုဲဒှ်ရဂှ် ဂွံတီကေတ်ရ။

ဒၞာဲတအ်ဂှ် ဒှ်ဖူကေတ်၊ ဖာန်ၚာဲ ကေုာံကရာဘဳတအ်တုဲ သ္ကိုပ်ဝန်ဇၞော်ဆာရဳထာ ဆာဗဳဇြေန်လေဝ် အာစိုပ်စၟဳစၟတ်လဝ် ကိုန်စဳမာန်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၂၉)ဂှ်ရ။

ပရေၚ်သိုၚ်ခၞံသၞေဟ်က္ၜၚ်ကျာကၟိန်ဍုၚ်နာနာ မရနုက်ကဵုဒုတိယ ဖူကေတ်ဂှ် သြန်ၝာတ်သေံ ဒးအိုတ် ၅ ဒသမ ၈ ဗဳလျာန်တုဲ သၞေဟ်က္ၜၚ်ကျာ တကိုဝ်ဝါထောန် ဖာန်ၚာဲဂှ် ဒးအိုတ် ၈၀ ပြကောဋိကိုတ်ၝာတ်ရောၚ်။

ပရေၚ်သၠုၚ်ပ္တိုန် ကဆံၚ်သၞေဟ်က္ၜၚ်ကျာ ကရာဗဳဂှ်မ္ဂး စရိတ်အိုတ် ၂ ဒသမ ၇ ပြကောဋိကိုတ်ၝာတ် နွံရဂှ် ဂွံတီကေတ်ရ။

ကိုန်စဳမာန်စမြိုၚ်သ္ဇိုၚ် ထပ်သိုၚ်ခၞံ ပ္ဍဲဍုၚ်ဖူကေတ်ဂှ် ဒှ်ကိုန်စဳမာန်ဂၠံၚ်ပရဟ် မၞုံ ၃ ဒသမ ၉၈ ကဳလောမဳတာ ဆက်စၠောံဖံက်ဗစိုပ်လဝ် ဒေသကထောန်ကဵု ဖာသောရ။

ကိုန်စဳမာန်ဏံ ပေၚ်ၚ်ဂှ်မ္ဂး ဒှ်ကိုန်စဳမာန်ဂၠံၚ်ပရဟ် မၞုံဇမၠိၚ် ၃၀ ဒသမ ၂၆ ကဳလောမဳတာ တတ်ကၠောံ မေန်မိုၚ်၊ ကဝ်ကေအ် ကေုာံကထောန် လေဝ်ဒှ်ရ။

ပ္ဍဲကဵုလၟေၚ်တရဴသ္ကိုပ်ဝန်ဇၞော်သေံ မာဿတာဆထရဳထာ ပ္ဍဲတ္ၚဲသိုက်ဂှ်မ္ဂး သွက်ဂွံကလေၚ်သၠုၚ်ပ္တိုန် ပရေၚ်ပိုန်ဒြပ်ကၟိန်ဍုၚ်ဂှ် ကဏ္ဍအာတရဴ ဟိုတ်နူပၟိက်ကိစ္စဇၞော်ဒၟံၚ်တုဲ နကဵုအလဵုအသဳ သွက်ဂွံရေၚ်တၠုၚ်ကဵုကဏ္ဍဏံ ညံၚ်ဂွံဖောအ်ဗြေဝ်တိုန်ဂှ် ညးမဆေၚ်စပ်သီုဖအိုတ် သွက်ဂွံကၠောန်ကမၠောန် ဒှ်ဒၟံၚ်ဒတုဲရဂှ် သ္ကိုပ်ဝန်ဇၞော် ဟီုသ္ဂးလဝ်ရ။

သ္အာၚ်နူဂှ်ပၠန် ရေၚ်ပြၚ်ၜဳကာပ္ပလဳဂှ် ဒှ်ဂကောံ ဒၞာဲညးအာတရဴတအ် ဂေတ်ကြေဝ်ဝေၚ်တုဲ ညးကၠုၚ်စိုပ်ဂေတ်ကြေဝ်တအ်ဂှ် သီုဒေသကရာဗဳကဵု ဖာန်ၚာဲ ဟိုတ်နူတံၚ်ဂြဲစိုတ်ဓာတ်မာန်ဒၟံၚ်ဂှ် သွက်ပရေၚ်ဆဝ်ပ္ၚုဟ် ပရေၚ်ပိုန်ဒြပ်ဖူကေတ်ဂှ် ဒှ်အစာံဗီုပြၚ်ရဂှ် သ္ကိုပ်ဝန်ဇၞော်ဟီုလဝ်ရ။

ပ္ဍဲဖူကေတ်ဂှ် ကိုန်စဳမာန်ဖောအ်ဗြေဝ် စကၠောန်ရေၚ်တၠုၚ်လ္ၚဵု နွံဒၟံၚ်တုဲ ပ္ဍဲမွဲကာလ ပွိုၚ်ပန်သၞာံဏံ ပရေၚ်တဴတက် ပ္ဍဲတွဵုရး သီုပရေၚ်တာဒၞာဟၟဲမွဲသာ် ညံၚ်သ္ဂောံဆက်နွံတန်တဴအာ အလဵုအသဳပ္တိတ်အာဇြဟတ်ရောၚ်ဂှ် ညးမၞုံအခေါၚ်ဟီုဂးအလဵုအသဳသေံ ဟီုလဝ်ရ။

“နကဵုအလဵုအသဳ သွက်ဂွံထ္ၜလဘာ်ကဵု ကိုန်စဳမာန်တအ်ဂှ် ဒှ်ဒၟံၚ်ဒတုဲယျ။ ကိုန်စဳမာန် သွက်ဂွံဒုၚ်တၠုၚ် ညးအာတရဴတအ်ဂှ် ရေၚ်တၠုၚ် သၠုၚ်ပ္တိုန်အာ သိၚ်ဏောၚ်။ ညးအာတရဴ စိုပ်ကၠုၚ်ဖူခေတ်တအ်ဂှ် နူကဵုစဖျေံဇိုၚ် လ္တူတ္ကအ် စဵုကဵုအခိၚ်ကလေၚ်စဴသ္ၚိ ညံၚ်ဂွံဗၠးဘဲ ညံၚ်ဂွံကဵု ပရေၚ်မိပ်မြဟ်မာန် သ္ကိုပ်ဝန်ဇၞော် စၞောန်ပ္ညုၚ်လဝ်ရ” ဂှ် ညးမၞုံအခေါၚ်ဟီုဂးဂှ် ဟီုလဝ်ရ။

Ref-Strait Times