နေပျဳဒဝ်၊ အံက်တဝ်ဗာ(၃၀)
ညးယိုက်ဝန် ယိုက်ဂၠေၚ်ဒၟံၚ်တာလျိုၚ်ကၟိန်ဍုၚ်ကီု သီုကောန်ဒပ်ပၞာန်တအ်ဂှ် မ္ၚးနူသြန်ဂိတု မက္လိဂွံဒၟံၚ်လၟုဟ်တုဲ နဒဒှ်သြန်ထံက်ပၚ်အပဵု မွဲတၠမ္ဂး နကဵုဗ္ၜတ်ပိလက်ဒ္ကေဝ် သ္ပကဵုအခေါၚ်ဒုၚ်စသိုၚ်ရောၚ်ဂှ် ကံၚ်ဇြဳပၞာန် လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၃၀) ဂှ်ရ။
ညးယိုက်ဝန်တအ်ဂှ် မ္ၚးနူသြန်ဂိတု ဂွံဒၟံၚ်လၟုဟ်တုဲ ပရေၚ်ဂလိုၚ်ပ္တိုန်ကဵု သြန်ထံက်ပၚ်အပဵု ပိလက်ဒ္ကေဝ်ဂှ် ရန်လဝ် သွက်ပရေၚ်စသုၚ်မံၚ်စံၚ် ညးယိုက်ဝန်တအ် ဂွံသၠဲလးသက်သာတုဲ ကၠောန်ရေၚ်တၠုၚ်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
သ္အာၚ်နူဂှ်ပၠန် ၚုဟ်ကမၠောန် သွက်သၟာကမၠောန်စလိၚ်တ္ၚဲ ဌာနအလဵုအသဳ ကေုာံဂကောံတအ်ဂှ် သွက်အခိၚ်ကမၠောန် မွဲတ္ၚဲ (၈) နာဍဳဂှ် ပ္ဍဲလ္တူပိုၚ်ခြာစၟတ်သမ္တီလဝ် ၚုဟ်မးကမၠောန် ၄၈၀၀ ဂှ် နဒဒှ်သြန်ထံက်ပၚ်အပဵု ထပ်သ္ပကဵုလဝ်အခေါၚ်ဒုၚ်စသိုၚ် မွဲလ္ၚီဒ္ကေဝ်ရဂှ် ဓမံက်ထ္ၜးလဝ်ရ။
ဆ္ဂးဌာနဝန်ဇၞော်ကိုန်စဳမာန် ကေုာံဘဏ္ဍာ ကံၚ်ဇြဳပၞာန်ဂှ်မ္ဂး စရိတ်ထံက်ပၚ်အပဵုဂှ် သ္ပတံနူဂိတုလဵု စက္လိဂွံရောဟီုဂှ် ဓမံက်ထ္ၜးလဝ် သောဲသောဲ ဗြောဲဗြောဲ ဟၟဲရ။
ဟိုတ်ဂလိုၚ်ပ္တိုန် ကုညးယိုက်ဝန်ကၟိန်ဍုၚ်တအ် သြန်ပိလက်ဒ္ကေဝ်တုဲ ၚုဟ်ဗွဝ်ဖျာဗၞိက်သ္ဇိုၚ်တအ် ထပ်က္ဍၚ်တိုန်ကၠုၚ်မာန်ဒၟံၚ်ရဂှ် သၟာဗၞိက်တအ် သ္ၚဳဂၠိပ်လဝ်အိုတ်ရ။
အတိုၚ်သၞောဝ်ဥပဒေ စရိတ်ၚုဟ်ကမၠောန်အောန်အိုတ် ကၟိန်ဍုၚ်ဗၟာဂှ် သွက်ဂွံကလေၚ်ပလေဝ်ပလေတ် စရိတ်သြန်ဂိတုအောန်အိုတ် ၜါသၞာံမွဲဝါ ၜိုန်ရစၞောန်ပ္ညုၚ်လဝ်ကီုလေဝ် ဟိုတ်နူယဲကပ်ကိုဝ်ဝေတ် ကေုာံပရေၚ်ဒပ်ပၞာန်သီအဝဵုတုဲ စဵုကဵုတ္ၚဲဏံ က္လေၚ်ပလေဝ်ပလေတ် ဟွံမာန်ဏီတုဲ နကဵုဗ္ၜတ် မွဲတ္ၚဲမ္ဂး ၄၈၀၀ ဒ္ကေဝ်ဟေၚ် ဆက်နွံဒၟံၚ်ဖိုဟ်ရ။
စရိတ်ၚုဟ်ကမၠောန်အောန်အိုတ် မွဲတ္ၚဲ ၄၈၀၀ ဂှ် ကံၚ်ဇြဳပၞာန် ဟွံပလေဝ်ပလေတ်ဏီတုဲ ပ္ဍဲလ္တူၚုဟ်ဗၞိက်ဗွဝ်ဖျာ က္ဍၚ်တိုန်ကၠုၚ်ဒၟံၚ်ဂှ် ၜိုန်ရကဵုလဝ်စရိတ်ထံက်ပၚ် ညးယိုက်ဝန်ဍေံတအ်ဂှ်ဟေၚ်တုဲ ဗ္ၜတ်စရိတ်ၚုဟ်ကမၠောန်အိုတ်ဂှ်မ္ဂး ပိုၚ်ခြာဂလိုၚ်ပ္တိုန်ကဵုလဝ် ဟၟဲဏီရ။
ပရိုၚ် – သြၚ်လောန်တိုၚ်(မ်)
ဗီု – MOI/Twitter
sanlontai