ကောန်အရာပ် ၂ တၠ နူကဵုတိဍာ် KNU ဂှ် ဒပ်ပၞာန် ရပ်ဒက်ဂစိုတ်

ညံၚ်လေဝ်ပေန်၊ အံက်တဝ်ဗာ (၃)

ဒပ်ကံၚ်ဇြဳပၞာန် ရပ်ဒက်ဂစိုတ်ထောံလဝ် ညးဍုၚ်ကွာန်ကောန်အရာပ် (၂) တၠ ဒၟံၚ်ကွာန်ပဇြောန်မျံၚ်၊ ပွိုၚ်ဍုၚ်ယှိုဲကျေန်၊ ခရိုၚ်ညံၚ်လေဝ်ပေန်၊ တိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ်ရောၚ် ဂွံတီကေတ် အတိုၚ်တၚ်လလောၚ်တြး KNU ရ။

တမ်ဒပ် ခမရ ကံၚ်ဇြဳပၞာန် စၟတ် (၂၀) မဖျေံဒပ်မံၚ်တန်တဴဒၟံၚ် အပ္ဍဲကွာန်ပဇြောန်မျံၚ်ဂှ်ဝွံ တုဲကၠုၚ် ပ္ဍဲဂိတုသေပ်တေမ်ဗာ (၂၉) တေံ ဟိုတ်ဟွံမွဲမွဲသာ် ရပ်ဒက်ဏာလဝ် ညးဒေသကွာန်ဂှ်ဂမၠိုၚ် ကိုဝ်ဖျိုဝ်ဝေဥူ အာယုက် ၃၂ သၞာံကဵု ဥူကျဳ၊ ဥူမေန်န် အာယုက် ၄၀ သၞာံတံရ။

ကြဴနူဂှ်တုဲ ပ္ဍဲဂိတုသေပ်တေမ်ဗာ (၃၀) ဂှ် ဒပ်ကံၚ်ဇြဳပၞာန်တံ ဂစိုတ်ထောံလဝ် ဥူမေန်န်ကဵု ဥူကျဳ (၂) တၠ မဒးဒုၚ်ရပ်ဒက်လဝ်တံ ဓဇန်န်ရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဂှ်ရ။

ဆ္ဂး ကိုဝ်ဖျိုဝ်ဝေဥူ မဒးဒုၚ်ရပ်ဒက်လဝ်ဂှ်ဝွံ ဂြိပ်ဗၠးတိတ်ကၠုၚ် နူကဵုတဲဒပ်ကံၚ်ဇြဳပၞာန်တံဂှ် KNU လလောၚ်ပ္တိတ်ဟီုဂးလဝ်ရ။

အတိုၚ်တၚ်လလောၚ်တြး ဇာဇၞိက်အထံက်အရီုပရေၚ်ၜိုဟ်လလမ် (KPSN) တံဂှ်မ္ဂး ပ္ဍဲခရိုၚ်ညံၚ်လေဝ်ပေန် KNU ဂှ် အပ္ဍဲကာလသီအဝဵုဏံ ဟိုတ်နူပရေၚ်ဝးပ္ကဝ်အခေါၚ်အရာမၞိဟ် ဒပ်ကံၚ်ဇြဳပၞာန်တံတုဲ ညးဍုၚ်ကွာန်ဒေသ ၜါကိုဋ်ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ်ရ။

ကုဒပ်ကံၚ်ဇြဳပၞာန် မကလိလောန်ဒၟံၚ် ပရေၚ်ဝးပ္ကဝ်အခေါၚ်အရာမၞိဟ် လ္တူညးဍုၚ်ကွာန်ကောန်အရာပ်တံဂှ် ကုလသမဂ္ဂကီု အလဵုအသဳဍုၚ်သ္အာၚ်ဂမၠိုၚ် ကေုာံ ဂကောံဗော်သွးဂမၠိုၚ်ဝွံ သွက်ဂွံကေတ်ကဵုအရေဝ် ကၟာတ်လဒဵုကဵု နကဵုနဲကဲ သာတုဲစိုပ်တရဴတံအိုတ်ဂှ် KNU အာတ်မိက်လဝ်ရ။

ပရိုၚ်−သြၚ်လောန်တိုၚ်(မ်)

ဗီု− Social Media