ပံၚ်၊ အံက်တဝ်ဗာ (၃)
တွဵုရးဍုၚ်မန် ပ္ဍဲပွိုၚ်ဍုၚ်ပံၚ်ဂှ် ညံၚ်မၞိဟ်တြုံ (၂) တၠ ဟွံဂွံဍိုက်အာကွဳလိုန်ဓာတ်မွဲစွံဂှ် နူကဵုဂကောံအုပ်ဓုပ်ကံၚ်ဇြဳပၞာန်ပွိုၚ်ဍုၚ် ပ္တိတ်လဝ်အသံပၟိၚ်ဒေသန္တရတုဲ ဒှ်ကၠုၚ်အခက်ခုဲပရေၚ်အာကၠုၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကြဴနူကောန်ဒပ်ဗၠာဲသၟိၚ်ကံၚ်ဇြဳပၞာန် ကေုာံညးကဵုပရိုၚ်တအ် ဒးဒုၚ်ပန်ဂစိုတ်ဒၟံၚ် မွဲခနမွဲခနတုဲဂှ် နူကဵုဌာနက္ဍိုက်က္ဍိုပ်ပရေၚ်အုပ်ဓုပ် ပွိုၚ်ဍုၚ်ပံၚ် လလောၚ်တြးပ္တိတ်လဝ်အသံပၟိၚ်ဒေသန္တရ သ္ပတံနူဂိတုအံက်တဝ်ဗာ စၟတ်တ္ၚဲ (၁)တုဲ ညံၚ်မၞိဟ်တြုံ (၂) တၠ ဍိုက်အာကွဳလိုန်ဓာတ်မွဲစွံဟွံဂွံရ။
ဂကောံအုပ်ဓုပ်ကံၚ်ဇြဳပၞာန်ဂှ် ကွဳလိုန်ဓာတ်မွဲဖ္ဍိုက်မ္ဂး မၞိဟ်တြုံ (၂) တၠ ဍိုက်မွဲစွံဟွံဂွံ၊ လကြဴမၞိဟ်ဗြဴ မၞိဟ်တြုံဍိုက်ဗက်ဟွံဂွံ၊ လကြဴမၞိဟ်တြုံ မၞိဟ်ဗြဴဍိုက်ဗက်ဂွံ၊ မၞိဟ်ဗြဴ (၂) တၠ ဍိုက်ကွဳလိုန်ဓာတ်မွဲစွံမာန်ရဂှ် လလောၚ်တြးလဝ်ရ။
ဆ္ဂးအခေါၚ်ဍိုက်ကွဳလိုန်ဓာတ်ဂှ် သ္ပတံနူ အခိၚ်နူဂယး (၄) နာဍဳ စဵုကဵုအခိၚ်ဗ္တံ (၁၀) နာဍဳဟေၚ်တုဲ ပ္ဍဲကဵုအခိၚ် သ္ပတံနူဗ္တံ (၁၀) နာဍဳ စဵုကဵု (၄) နာဍဳနူဂယးဂှ် အခေါၚ်ဍိုက်ကွဳလိုန်ဓာတ်ဟၟဲသက်က်ရဂှ် ဟီုလဝ်ရ။
ညးဒေသမွဲတၠဂှ်မ္ဂး ကံၚ်ဇြဳပၞာန်ပိုၚ်ခြာထောံ အခေါၚ်ဍိုက်ကွဳလိုန်ဓာတ်ဂှ် ပ္ဍဲလ္တူရပ်ကေတ် ကောန်ဒပ်ပၠန်ဂတးတအ်ဟွံမာန်ဂှ် သ္ပဒၞန်ကဵု ညးဍုၚ်ကွာန်တအ်တုဲ ဒှ်ကမၠောန်ဍဵုဍိုက်ဒၟံၚ် ညံၚ်ဂွံဒှ်အခက်ခုဲပရေၚ်အာကၠုၚ်ရဂှ် ဟီုပါ်ပါဲလဝ်ရ။
ကောန်ဒေသ ညးဍုၚ်ကွာန် ပ္ဍဲပွိုၚ်ဍုၚ်ပံၚ်တအ် ဗွဲမဂၠိုၚ်ဂှ် သုၚ်စောဲဒၟံၚ်ကွဳလိုန်ဓာတ်အဓိကတုဲ ဟိုတ်နူပသောၚ်ကလးဒၟံၚ် ပြသၞာပရေၚ်မၞိဟ်၊ ပရေၚ်ပိုန်ဒြပ်၊ ပရေၚ်ထတ်ယိုတ်၊ ပရေၚ်ပညာ ကေုာံပရေၚ်စသုၚ်မံၚ်စံၚ်ဂှ်ရ ဟိုတ်နူတၚ်ပိုၚ်ခြာကံၚ်ဇြဳပၞာန်တုဲ ထပ်စိုပ်ကၠုၚ်ဒၟံၚ် အကာဲအရာပရေပရေံမွဲဂကူပၠန်ရဂှ် ဂွံတီကေတ် နူညးဒေသတအ်ရ။
ကံၚ်ဇြဳပၞာန်ဂှ်မ္ဂး ယဝ်ရကောန်ဒပ်ပရေၚ်ဂီုကၠီုတအ် စၟဳစၟတ်ဂွံညာတ်ကေတ် ဒဒှ်ရမၞိဟ်တြုံ (၂) တၠ ဍိုက်လဝ်ကွဳလိုန်ဓာတ်မွဲစွံ မ္ဂး ဒးဒုၚ်ရပ်ကေတ်အရေဝ် နကဵုၝောံပိုဒ် ၁၈၈ ရောၚ်ဂှ် လလောၚ်တြးလဝ်ရ။
ယဝ်ရဒးဒုၚ်ကေတ်အရေဝ် နကဵုၝောံပိုဒ်ရာဇသာတ်ဇၞော် ၁၈၈ မ္ဂး ဒဏ်ထံၚ်မွဲဂိတု ဟွံဒးကၠောန်ကမၠောန်ကဵုဒှ်၊ ဒဏ်သြန် ၜါလက်ဒကေဝ်ကဵုဒှ်၊ ဒုဟ်ဒဏ်သီုၜါဂကူကဵုဒှ် ဒးဒုၚ်ဖျေံဒုဟ်မာန်ရ။
ပ္ဍဲတွဵုရးဍုၚ်မန်ဂှ် ပ္ဍဲမွဲကာလဒပ်ပၞာန်သီအဝဵုဏံ ပ္ဍဲကဵုပွိုၚ်ဍုၚ်ကျာ်ထဝ်၊ ၜဳကလေၚ်၊ ပံၚ် ကေုာံပွိုၚ်ဍုၚ်ရေဝ်တအ်ဂှ် ညံၚ်မၞိဟ်တြုံ (၂)တၠ ဟွံဂွံဍိုက်အာ ကွဳလိုန်ဓာတ်မွဲစွံဂှ် လလောၚ်တြးပ္တိတ်လဝ်အသံပၟိၚ်ဒေသန္တရတုဲ ပ္ဍဲကဵုဂှ် ပွိုၚ်ဍုၚ်ရေဝ်ဂှ်မ္ဂး လလောၚ်တြးလဝ် ပရေၚ်အုပ်ဓုပ်ပၞာန်ရ။
ပရိုၚ် – သြၚ်လောန်တိုၚ်(မ်)
ဗီု -CJ
sanlontai