ပ္ဍဲလက်ထက်ကံၚ်ဇြဳပၞာန် ကၠေၚ်သတ်ဗြဴပိုတ်အိုတ်ဂှ် သာပရေံကၠုၚ်

နေဗျဳဒဝ်၊ အံက်တဝ်ဗာ (၃)

အလုံမွဲကၟိန်ဍုၚ် အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံဘာ်ပြၚ်ဏံ ကၠေၚ်သတ်ဗြဴပိုတ်အိုတ်တံကဵု အကာဲအရာဒးရေၚ်ပၞောန်တုဲ ရာန်တံဂှ် သာတုဲပရေံကၠုၚ်ရောၚ် ဂွံတီကေတ် အတိုၚ်တၚ်လလောၚ်တြး ဂကောံသုတေသန ISP-Myanmar မွဲရ။

ISP-Myanmar ဂှ် အတိုၚ်လိက်စံၚ် မကံက်ကပှ်လဝ် အပ္ဍဲဂိတုသေပ်တေမ်ဗာ သၞာံ ၂၀၂၃ ဂှ်မ္ဂး ပ္ဍဲကဵုပွိုၚ်ဍုၚ်အပံၚ် ၁၁၀ ဂှ် ၅၆ ပွိုၚ်ဍုၚ်ဂှ်ဝွံ ဒးဆေၚ်ဒၟံၚ်မုက် ကုကၠေၚ်သတ်ဗြဴ ပိုတ်အိုတ်တံဂှ်တုဲ သှ်ေ ၆၄ ပွိုၚ်ဍုၚ်ဂှ် ရေၚ်တုဲ ဒးရာန်ကေတ်ဒၟံၚ် ကၠေၚ်သတ်ဗြဴတံရောၚ်ဂှ် သ္ဂးရ။

ပ္ဍဲအရာရေၚ်တုဲ ရာန်ကၠေၚ်သတ်ဗြဴဂှ်လေဝ် မွဲတ္ၚဲမွဲဝါရ ရာန်ဂွံဂှ် နွံဒၟံၚ် ဗ္ဒါဲ ၄၀ ပွိုၚ်ဍုၚ်တုဲ ပွိုၚ်ဍုၚ်ရာန်ဂွံ လ္တူပိဝါဂှ် နွံဒၟံၚ် (၈) ပွိုၚ်ဍုၚ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် ပ္ဍဲအရာရာန်ကေတ် ကၠေၚ်သတ်ဗြဴတံဂှ်လေဝ် ပွိုၚ်ဍုၚ်ရာန်ဂွံ နကဵုသၞောတ်ဗ္ၜတ်တံဂှ် နွံဒၟံၚ် (၃၁) ပွိုၚ်ဍုၚ်တုဲ ဟွံစၟတ်လဝ်ပမာဏမွဲသာ် ၜိုတ်နွံပၟိက်ရာန်ဂွံဂှ် နွံဒၟံၚ် (၃၆) ပွိုၚ်ဍုၚ်ရ။

ညးဒေသမွဲတၠဂှ် ၚုဟ်ကၠေၚ်သတ်ဗြဴတံ သၠုၚ်တိုန်ကၠုၚ် နူကဵုကၠာတေံ ဂၠိုၚ်ကဵုဆဂှ်ရ သြန်လုပ်ကဵု သြန်တိတ်ဂှ် တၟော်ဟွံကိတ်တုဲ ပရေၚ်စသုၚ်မံၚ်စံၚ် သ္ၚိကၟိန်တံ သာတုဲခက်ခုဲကၠုၚ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“သၞာံတုဲတေံမ္ဂး ဂွံစသုၚ်ဂှ် ပြေပြံၚ်ဒၟံၚ်ဏောၚ်။ ၚုဟ်ဖျာတံဂှ် ဟွံပရေံပုဟ်။ ၜိုတ်ဒးရးရ၊ သၞာံဏံ (၂၀၂၃) ဏံဂှ်တှ်ေ အတိုၚ်ဍေံတံဟီုလဝ် ပ္ဍဲဂိတု (၉) ၊ (၁၀) ဏံ ဖျေံၚုဟ်ကၠေၚ်ဏောၚ်၊ ဖျေံၚုဟ်သ္ၚုဏောၚ်၊ ဖျေံထောံၚုဟ်သ္ၚုမှ တိုန်အာဂၠိုၚ်ကဵုဆရ။ ဖျေံထောံၚုဟ်ကၠေၚ် မွဲပသာ နူကဵု (၇၀၀၀) (၈၀၀၀) ဂှ် စိုပ်အာကဆံၚ် ဒးရပ်စပ် မွဲပသာ စဵုကဵု (၁၇၀၀၀) ဂှ်တုဲ ပ္ဍဲကဵုညးဍုၚ်ကွာန်တံဂှ် သြန်လုပ်မွဲတ္ၚဲ ၜါလ္ၚီ၊ ပိလ္ၚီရဂှ် ဒးကၠောန်ဒၟံၚ်တၟာလှ်ေဏောၚ်။ ကမၠောန်သ္ဇက်ဂွံကၠောန်ဟွံမွဲတုဲ ဂွံစဂှ်လေဝ် ဟွံပြေပြံၚ်ပုဟ်။ ဂွံရာန်စသုၚ်ဂှ် သြန်လုပ်ဟွံမွဲ ဟွံပြေပြံၚ်တုဲ ဗက်ကဵုၚုဟ်ဖျာက္ဍၚ်ၚ်ဏံဂှ်တုဲ ရာန်ဟွံမာန်ဂှ်ရ ကၠေၚ်ဟီုဂှ် ဟွံမွဲလေဝ် ဟွံပါလေဝ် ဂွံဒၟံၚ်ရ။ ဒှ်ဒၟံၚ်ဗီုပြၚ် သ္ၚုရဂှ် ဂွံစဂှ်တၟာလှ်ေဒၟံၚ်” သာ်ဝွံ သ္ဂးရ။

သ္အာၚ်နူဂှ်ပၠန် ကၠေၚ်သတ်ဗြဴ ကံၚ်ဇြဳပၞာန် မသွံတြးကဵုဂှ်ဝွံ သွံတြးကဵုဒၟံၚ် လ္တူဍုၚ်တံသၟးရတုဲ သွံတြးကဵုဒၟံၚ် ပ္ဍဲကဵုဒေသ လ္ပာ်ကွာန်ရးတံဟွံသေၚ်ဂှ်ရ နကဵုညးဒေသဂမၠိုၚ် ကၠေၚ်သတ်ဗြဴတံဂှ် ကဵုၚုဟ်က္ဍၚ်ၚ်တုဲ ဒးရာန်စဒၟံၚ်ရောၚ် ညးဆက်ဟီုရ။

အတိုၚ်ဂလာန် ISP-Myanmar ဂှ်မ္ဂး ရေၚ်တုဲဂွံရာန်ကၠေၚ်သတ်ဗြဴဂှ် ပွိုၚ်ဍုၚ်ဒးကေတ် တၞးကာဒ်အခေါၚ်လုပ် ဟွံသေၚ်မ္ဂး လိက်ထံက်ဂလာန် ညးဇၞော်အရာပ်တံဂှ် နွံဒၟံၚ် ၂၅ ပွိုၚ်ဍုၚ်တုဲ ပ္ဍဲကဵုပွိုၚ်ဍုၚ်လ္ၚဵုတံဂှ် ဒးထ္ၜးတၞးကာဒ်ကောန်ဍုၚ် ဟွံသေၚ်မ္ဂး စရၚ်ဂြောဝ်ဂတာတံတုဲ ဒးရာန်ကေတ်ဒၟံၚ်ရောၚ် သ္ဂးလဝ်ရ။

အခိၚ်လၟုဟ် ကံၚ်ဇြဳပၞာန် ဖအောန်ဖျေံကဵုဒၟံၚ် ၚုဟ်ကၠေၚ်သတ်ဗြဴတံ မွဲပိသာ နူကဵု ၄၈၀၀ ဒ္ကေဝ် စဵုကဵု ၅၈၀၀ ဒ္ကေဝ်တုဲ သွံတြးကဵုဒၟံၚ်ဂှ်ရ အကာဲအရာ ရေၚ်တုဲ ဒးရာန်ဒၟံၚ်ကၠေၚ်သတ်ဗြဴတံဂှ် က္တဵုဒှ်ကၠုၚ်ရ။

ၚုဟ်ကၠေၚ်သတ်ဗြဴတံဝွံ ပ္ဍဲကဵုသၞာံ ၂၀၂၀ တုဲကၠုၚ်တေံ ပ္ဍဲကဵုဗွဝ်ဖျာမ္ၚးဏံ ကၠေၚ်သတ်ဗြဴမွဲပသာ နူကဵု ၁၈၀၀ ဒ္ကေဝ်ပြၚ်ဓဝ်ဂှ် အခိၚ်လၟုဟ် စိုပ်ဒၟံၚ်ၚုဟ်သၠုၚ်အိုတ် ပွဳပွူ ၁၆၀၀၀ ဒ္ကေဝ်ရ။

ဍုၚ်ဗၟာဝွံ ပၠောပ်ဒၟံၚ် ကၠေၚ်သတ်ဗြဴတံ နူကဵုအေန်ဒိုဝ်နဳယှာ၊ မလေဝ်ယှာ ကေုာံ နူကဵုဍုၚ်သေံတံ အဓိကတုဲ သွံတြးကဵုဒၟံၚ်တုဲ အပ္ဍဲကာလသီအဝဵုဏံ ဟိုတ်နူတၚ်သၞောတ်ဗ္ၜတ် အခေါၚ်ပၠောပ်ပ္တိုန် ကံၚ်ဇြဳပၞာန်တံဂှ်တုဲ ကၠေၚ်သတ်ဗြဴ ပိုတ်အိုတ်တံ က္တဵုဒှ်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−RFA