ရေဝ်၊ အံက်တဝ်ဗာ(၄)
ပ္ဍဲပွိုၚ်ဍုၚ်ရေဝ် တွဵုရးဍုၚ်မန် လလောၚ်တြးလဝ် ပရေၚ်အုပ်ဓုပ်ပၞာန်ဂှ် ပ္ဍဲမွဲကာလဒပ်ပၞာန်သီအဝဵု ပွိုၚ်ၜါသၞာံကဝက်ပြၚ်ဏံ ကောန်ကမၠောန်ဖံၚ်တအ် ဒးဒုၚ်ပြိုက်ဂစိုတ်ဒၟံၚ် ဟၟဲကဵုသၞောဝ်သၞောတ် အကာဲအရာပရေံပရေံဒှ်ကၠုၚ်ဒၟံၚ်ရဂှ် ဂွံတီကေတ် အတိုၚ်လဟီု ညးဒေသတအ်ရ။
ကောန်ကမၠောန်ဖံၚ်တအ်ဂှ် ဒးဒုၚ်ပျဲပျာံဍဵုဍိုက် ပြိုက်ဂစိုတ်ဒၟံၚ် ပ္ဍဲကဵုဗွိုၚ်ကမၠောန်ကီု၊ ဒးဒုၚ်ကူသာန်မၞိဟ်တုဲ ဒၟာနူကၠောန်ကမၠောန်ဟွံမာန် မၞိဟ်ဂြိပ်တိတ်တအ်ဂှ် မ္ၚးနူညးစအကြတအ် လိၚ်မၞိဟ်ပရမ် ဒက်ဂကောံၜုၚ်တက်ပြိုက်ဂစိုတ်ဒၟံၚ်တုဲ ဒးဆဵုဂဗဒၟံၚ်ကဵု ပရေၚ်ပြိုက်ဂစိုတ် ဟၟဲကဵုသၞောဝ်သၞောတ်ရ။
အတိုၚ်တၚ်ဂၞၚ်သြၚ်လောန်တိုၚ်(မ်) ပကောံပကေဝ်ဂွံလဝ်မ္ဂး ပ္ဍဲကဵုသၞာံဏံ ကောန်ကမၠောန်ဖံၚ် ဟွံအောန်နူ (၂၀) တၠ ဒးဒုၚ်ၜုၚ်တက်လဝ် သ္ကာတ်တ်မြဟ်ဟ်တုဲ မၞိဟ်ဒးချိုတ်လဝ် တၠတဲဟွံမံက် (၁၀) တၠ ဟွံအောန် နွံကၠုၚ်ရ။
ကောန်ကမၠောန်ဖံၚ် ဒးဒုၚ်ပြိုက်ဂစိုတ်လဝ်တအ်ဂှ် ဂွံဆဵုကၠုၚ်ဒၟံၚ် ပ္ဍဲၜဳရေဝ်၊ ၜဳအစေန် ကေုာံ ပ္ဍဲကၠအ်ခၜိုတ်တအ် နဒဒှ်ဇွတၠတဲဟွံမံက် မွဲခနမွဲခနရဂှ် ညးတာလျိုၚ်ဂကောရီုဗၚ်ဟံၚ်ပြာ်မၞိဟ်မွဲတၠ ဟီုလဝ်ရ။
ပ္ဍဲကဵုဂိတုအံက်တဝ်ဗာ စၟတ်တ္ၚဲ (၃)ဂွံကလေၚ်ဆဵုလဝ် ဇွမၞိဟ်တြုံအယုက်ၜိုတ် (၃၀) မွဲတၠ ဒးချိုတ်ဒၟံၚ်နကဵုဘဲဝပ် ဒးဒုၚ်ရပ်ဒက်ၜုၚ်တက်လဝ် ပ္ဍဲကၠအ်ခၜိုတ်မွဲကၠအ် ဗ္ဒာဲကွာန်အၜဝ် ပွိုၚ်ဍုၚ်ရေဝ် ဒးထေၚ်ခယျကေတ် ကောန်ကမၠောန်ဖံၚ်ရ။
ၜိုန်ရကောန်ကမၠောန်ဖံၚ်တအ် ဒးဒုၚ်ပြိုက်ဂစိုတ်ဒၟံၚ် မွဲခနမွဲခနကီုလေဝ် ပရေၚ်ဂၠိုက်ဂၠာဲကေတ်အရေဝ် ရပ်စပ်စၟဳစၟတ် နူလ္ပာ်ကံၚ်ဇြဳပၞာန် စဵုကဵုဟၟဲအောန်ဒၟံၚ်တုဲ ဒးဆောံလေၚ်ဒၟံၚ် ပရေၚ်စဵုဒၞာနူသၞောဝ်ဥပဒေရဂှ် ကောန်ကမၠောန်ဖံၚ်တအ် ဟီုလဝ်ရ။
ကောန်ကမၠောန်ဖံၚ် ကၠုၚ်ကၠောန်ဒၟံၚ်ကမၠောန် ပ္ဍဲတွဵုရးဍုၚ်မန် ဗွဲမဂၠိုၚ်တအ်ဂှ် ကၠုၚ်နူရးဨရာဝတဳ၊ ရးဗဂေါ ကေုာံရးလဂုၚ်တအ်တုဲ ညးတအ်ဂှ် ဃောကၠောန်ဒၟံၚ်ကမၠောန်ရပ်က ပ္ဍဲဗလးၜဳဂၠိုၚ်ကဵုဂိတု ဒးဒုၚ်ပျဲပျာံဍဵုဍိုက်ဒၟံၚ်ရ။
ကမၠောန်ဖံၚ် ဒယှ်တှ်ဒၟံၚ် နကဵုယၟုပရေံဂှ် ပ္ဍဲလက်ထက်အလဵုအသဳ NLD တေံ သွက်ဂွံချူဓဇက်သၞောဝ်ဥပဒေ မွဲတန်ကီု သီုသွက်ဂွံထိၚ်ဒက် သၞောတ်စှ်ေစှ်ေကီုဂှ် ၜိုန်ရသဳကၠဳသ္ပလဝ်ဒ္တန် ပ္ဍဲကၠတ်ထဝ်နွံကီုလေဝ် ပ္ဍဲလက်ထက်ကံၚ်ဇြဳပၞာန်ဏံ ကောန်ကမၠောန်ဖံၚ်တအ် ဒးဆောံလေၚ်ဒၟံၚ် အခေါၚ်စဵုဒၞာ နူသၞောဝ်ဥပဒေပေၚ်ပေၚ်ရ။
ပရိုၚ် – သြၚ်လောန်တိုၚ်(မ်)
ဗီု – CJ
sanlontai