သ္ဂောံဗလး ဂကောံဒပ်ဗျိတိၚ် ပ္ဍဲယူကရုၚ်တေံ အစဳဇန်ဟွံမွဲဏီဂှ် သ္ကိုပ်ဝန်ဇၞော် ဟီု

မာန်ချက်သတာ၊ အံက်တဝ်ဗာ (၃)

အစဳဇန်ဖျေံတန်ဗ္တောန်ပၞာန် ပ္ဍဲယူကရုၚ် ဟွံမွဲဏီမွဲသာ် သွက်ကောန်သ္ဂံၚ်အပ္ဍဲဍုၚ်တံ ဂွံပ္ကတ်ပ္ကေၚ်ရေၚ်တၠုၚ်မာန် တၚ်စၟတ်ဝန်ဇၞော်ကာစဵုဒၞါ မကဵုလဝ်ကသပ်ဂှ် ဒဒှ်ရကလေၚ်ရုပ်သီဂှ် သ္ကိုပ်ဝန်ဇၞော်ဗျိတိၚ် ရဳယှဳသူနက် ဟီုဂးလဝ်ရ။

ဗျိတိၚ် ကေုာံ မဟာမိတ်ဂမၠိုၚ်ဝွံ ဒဵုကဵုအခိၚ်လၟုဟ် သွက်ဂွံဖအောန်ဖျေံ ပဋိပက္ခမက္တဵုဒှ် ကုရုယှာတိုက်ရိုက်မာန်ဂှ်တုဲ ဝေၚ်ပါဲလဝ် အရာမဖျေံလဝ်ပရေၚ်ပၞာန်ဗွဲမလုပ်သၞောဝ် ပ္ဍဲကဵုယူကရုၚ်ဂှ်ရ။

ဝန်ဇၞော်ကာစဵုဒၞါဗျိတိၚ်ဂှ် ဒဒှ်ရမိက်ဂွံဖျေံကဵုတန်ဗ္တောန်ပၞာန် အပ္ဍဲဍုၚ် ကုဒပ်ယူကရုၚ်တံ ပ္ဍဲကဵုဍုၚ်ယူကရုၚ် ဟွံသေၚ်မ္ဂး ဍုၚ်ပလိုတ်တၞဟ်ဟ်ဂမၠိုၚ်တံဂှ်တုဲ ဟီုဂးလဝ် ပ္ဍဲကဵုကဏ္ဍသၟာန်သွဟ်ဆဵုဂဗ ကုလိက်ပရိုၚ် The Sunday Telegraph ရ။

ကြဴနူလလောၚ်ပ္တိတ် ပရေၚ်ဆဵုဂဗသၟာန်သၟုက်ဏံ ဂွံမွဲလစုတ်ဂှ် သ္ကိုပ်ဝန်ဇၞော်သူနက် ဟီုပ္တိတ်ကၠုၚ် ဒဒှ်ရအစဳဇန် သွက်ဂွံဗလးဏာ ဒပ်ဗျိတိၚ် ပ္ဍဲယူကရုၚ် ဟွံမွဲဏီဂှ်ရ။

“ဝန်ဇၞော်ကာစဵုဒၞါဟီုဂးလဝ်ဂှ် ပ္ဍဲအနာဂတ်ဂတဏံ မွဲမွဲတ္ၚဲ သွက်ဂွံကၠောန်ပ္ကတ်ပ္ကေၚ် ပ္ဍဲယူကရုၚ်မာန်တုဲ ဟီုဂးဒၟံၚ် ဒှ်မာန်ရောၚ်” သာ်ဝွံ သူနက် ဟီုဂးလဝ်ကဵု အ္စာပရိုၚ်ဂမၠိုၚ် ပ္ဍဲကဵုကောံဓရီုကၠောံသၞာံ ဗော်ကောန်သာဗေတေတ် မၞုံပ္ဍဲမာန်ချက်သတာဂှ်ရ။

“ဆ္ဂး ညအ်ဂှ် ဒှ်သွက်ဍာ်ဇမၠိၚ်သၟးရတုဲ သွက်ဂွံဗ္တိုက် ပ္ဍဲပဋိပက္ခလၟုဟ်ဏံဂှ် သ္ဂောံဗလးအာ ကောန်ပၞာန်ဗျိတိၚ်တံ ဟွံမွဲပုဟ်” ဂှ် ညးဟီုဂးလဝ်ရ။

သမ္မတရုယှာတြေံ ဒဳမဳထရဳ မက်ဗဳဒက်ဂှ် ဇၟာပ်ကောန်ပၞာန်ဗျိတိၚ် မပ္ကတ်ပ္ကေၚ်ကဵုဒၟံၚ် ကုကောန်ဒပ်ယူကရုၚ်တံဂှ် ဒဒှ်ရ ဒှ်ပွန်ကောန်ဒပ်ရုယှာတံ ဗွဲမလုပ်သၞောဝ်ဏောၚ်ဂှ် ဟီုဂးလဝ်ရ။

ဗျိတိၚ်ဂှ် အပ္ဍဲကဵုသၞာံတုဲကၠုၚ်တေံ ကဵုလဝ်တန်ဗ္တောန်ပ္ကတ်ပ္ကေၚ်ပရေၚ်ပၞာန် လလအ်ပွိုၚ်မသုန်သတ္တာဟ ကုကောန်ဍုၚ်ယူကရုၚ် ဗၞတ် ၂ ဠက်ပြၚ်ဂှ်တုဲ ရန်တၟံလဝ် သွက်ဂွံဆက်ပ္ကတ်ပ္ကေၚ်ကဵု လၟိဟ်လအာတုပ်သာ်ဏံရောၚ် မဒှ်ရ။

ဝန်ဇၞော်ကာစဵုဒၞါဂှ် ကြဴနူသဳကၠဳ ကုဇၞော်သ္ကိုပ်ဒပ်ပၞာန်ဗျိတိၚ် ပ္ဍဲတ္ၚဲသိုက်တေံတုဲဂှ် သွက်ဂွံကၠောန်ဗဒှ်အာ ပရေၚ်ပ္ကတ်ပ္ကေၚ်ပရေၚ်ပၞာန် အပ္ဍဲဍုၚ်ယူကရုၚ် နွံဂှ် ဟီုဂးလဝ်ရ။

သၞာံဗွဲမလအ်လ ကြဴနူက္တဵုဒှ်ပရေၚ်ပကီုပရာပ် ပ္ဍဲကဵုသ္ကုတ်သၟဝ်ကျာဍုၚ်ကိုဝ်သိုဝ်ဗိုဝ်တုဲဂှ် အပ္ဍဲအကြာတ္ၚဲ ခြာဟွံလအ်တံဏံ ဒဒှ်ရဗလးလဝ် ကောန်ဒပ်ထိၚ်ဒက်ဂီုကၠီုဗျိတိၚ် ဗွဲမဂၠိုၚ်ဂၠေၚ် ပ္ဍဲကဵုဒၞါဲဂှ်ဂှ် ဝန်ဇၞော်ဂှ် ဟီုဂးလဝ်ရ။

ဟိုတ်နူပရေၚ်အာတ်မိက် အလဵုအသဳပဝ်လာန် ပ္ဍဲဂိတုဏံ ကၠာပေါဲရုဲမာဲအလုံဍုၚ်ပဝ်လာန်ဂွိုအ်စိုပ်ဏီဂှ်တုဲ သွက်ဂွံရီုဗၚ်စဵုဒၞါ သ္ကုတ်ဗၟံက်နေတိုဝ်ဂှ်တုဲ ပ္ဍဲသတ္တာဟဏံအိုတ် ဗလးလဝ် က္ၜၚ်ကျာဗ္တိုက်ဗျိတိၚ်ဂှ် ညးဟီုဂးလဝ်ရ။

Ref: Reuters