ထံက်ပၚ်ကဵုလဝ် CDF-Mindat လွဟ် AK-47 (၄၀) ဒကိုအ် သီုကပေါဆက်စပ်

မေန်တာပ် – အံက်တဝ်ဗာ (၄)

အပ်ပြာပ်ကဵုလဝ် ဒပ်စဵုဒၞာချေၚ် – မေန်တာပ် လွဟ် AK-47 (၄၀) ဒကိုအ်၊ မကမ် (၁၂၀၀၀) ဒကောၚ် သီုဖျေဲကမ် (၁၂၀)ဖျေဲ ဂကောံ(၃)ဂကောံတအ် ပံၚ်ရာန်ကေတ်လဝ်ရဂှ် International Mindat K’Cho Organization (IMCO) လလောၚ်တြးပ္တိတ်လဝ် ပရိုၚ်ရ။

ကြဴနူဂကောံ International Mindat K’Cho Organization (IMCO)၊ Heal the world ကေုာံ CEA(Norway) တအ် ပိဂကောံ ပံၚ်ကောံရာန်ကေတ်လဝ်တုဲဂှ် အပ်ပြာပ်ကဵုလဝ်လွဟ်လက်နက် ပ္ဍဲဂိတုသေပ်တေမ်ဗာ စၟတ်တ္ၚဲ (၂၈) ရဂှ် ဟီုလဝ်ရ။

ကပေါတ်လွဟ်လက်နက်ပၞာန်တအ်ဂှ် ဂကောံ Heal the world ကဵု CEA(Norway) ဒံက်တာအညုၚ် က္ဍိုက်လဝ်က္ဍိုပ်တအ်ဂှ် ပံၚ်တောဲဗပေၚ်လဝ်ဇြဟတ် ဒဝ်ဠာ (၃၅၀၀)တုဲ သြန်ဂအုမ်ပရောဂျေတ်အနွောတ် နွံဒၟံၚ်ပၟိက်ဗွဲမဂၠိုၚ်ဂှ်မ္ဂး ကံက်ကေတ်လဝ် နူဂကောံ IMCO လၟေၚ်ဂိတု ဗပေၚ်ကဵုလဝ်ရဂှ် ဂွံတီကေတ်ရ။

ဂကောံ International Mindat K’Cho Organization (IMCO) ဂှ် ပရောဂျေတ်ဗ္ဂပ်ဖျပ်ကဵု လွဟ် AK-47 (၅၀)ဒကိုအ် သွက်ဒပ်စဵုဒၞာချေၚ် – မေန်တာပ်ဂှ် စကၠောန်လဝ် နူဂိတုဂျောန် သၞာံ ၂၀၂၂ ရဂှ် ဂွံတီကေတ်ရ။

လၟုဟ်ဏံ ၜိုန်ရဗ္ဂပ်ဖျပ်ကဵုလဝ်လွဟ်လက်နက်တုဲဒှ်ကီုလေဝ် ပ္တိတ်ဒၟံၚ်ဇြဟတ် သွက်ဂွံထပ်ကဵု လွဟ် AK-47 (၁၀)ဒကိုအ် သီုကပေါတ်ဆက်စပ်သှ်ေသၟေဟ်ဒၟံၚ်နွံဂှ် ဂွံတီကေတ်ရ။

ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ သ္ကုတ်လကြဴဏံ တွဵုရးချေၚ်ဂှ်လေဝ် ဒှ်ဒေသဒးဒုၚ်ဍဵုဍိုက်ဒၟံၚ်ကဵု ဒပ်ကံၚ်ဇြဳပၞာန်တုဲ ကၠောန်သ္ပဒၟံၚ် ပရေၚ်စံၚ်ပလီုသ္ၚိဌာန်ညးဍုၚ်ကွာန်တအ် ခြာဟွံလအ်ဟွံလအ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)

ဗီု – IMCO