သွက်ဂွံဆဵုဂဗသဳကၠဳကဵု ဒပ်ပၞာန်သီအဝဵုဟၟဲပုဟ် KNU ထပ်ကလေၚ်ဟီုပလန်

မတ်မလီု၊ အံက်တဝ်ဗာ (၄)

ဒပ်ပၞာန်သီအဝဵုဂှ် လဂွံကဵုပရေၚ်ဍုၚ်ကွာန် ဟိုတ်နူဒှ်ဒပ်ပၞာန် လုပ်သၞောဝ်ဟွံသေၚ်ဂှ်ရ သွက်ဂွံဆဵုဂဗသဳကၠဳ အတိုၚ်ပရေၚ်ဍုၚ်ကွာန် ဟၟဲလးလးရဂှ် ဌာန်ဂအုပ်ဗဟဵု KNU ထပ်ကလေၚ်ပလန်လဝ်တဲ ပိုတ်တ်သ္ကုတ်တ် ပ္ဍဲဂိတုအံက်တဝ်ဗာ စၟတ်တ္ၚဲ(၂)ဂှ်ရ။

ပ္ဍဲဂိတုသေပ်တေမ်ဗာ စၟတ်တ္ၚဲ (၃၀) တုဲကၠုၚ်တေံ ဂကောံဥက္ကဋ္ဌ KNU တြေံ ဂအုပ်ဗိုလ်ဇၞော် သဝ်မူတူဇြေဖိုဝ် က္ဍိုက်လဝ်က္ဍိုက်ကဵု ဂကောံက္ဍိုပ်သ္ကိုပ်ပၞာန်က္ဍိုက်က္ဍိုပ်တအ် ဟီုဂးသဳကၠဳလဝ် ကိစ္စစပ်ကဵုပရေၚ်ၜိုဟ်လလံရဂှ် လ္တူလ္ပာ်ကံၚ်ဇြဳပၞာန် လလောၚ်တြးလပ္တိတ်လဝ်ဂှ် ကလေၚ်ပလန်လဝ်တဲ သာ်ဏံရ။

ပရေၚ်ဆဵုဂဗ အကြာဥက္ကဋ္ဌ KNU တြေံကဵု က္ဍိုပ်သ္ကိုပ်ပၞာန်ဂှ် ဒှ်ကမၠောန်ပြဝကၠောန်သ္ပဒၟံၚ် ညံၚ်ပရေၚ်ယှုက်ထုဲ ဂွံဒှ်ကၠုၚ် ပ္ဍဲဂကောံ KNU တုဲ ညံၚ်ဓဝ်ကၠိုဟ်ခၠၚ် အကြာဂကောံဇြဟတ်မဟာမိတ် လုပ်ဒၟံၚ်ပေါဲဗတိုက် သွက်သၞောတ်တၠအဝဵုပၞာန် ဂွံပၠိုတ်လလံကဵု သွက်ဂွံဒက်ပ္တန် ကၟိန်ဍုၚ်ပံၚ်ကောံ ဖေတ်ဒရေဝ်ဒဳမဝ်ကရေဇြဳတအ် ဂွံဗၠေတ်မှာ ဒှ်အစဳဇန်ဒပ်ပၞာန် ကၠောန်သ္ပဒၟံၚ်သက်က်ရဂှ် KNU ဟီုလဝ်ရ။

ဟိုတ်ဂှ်ရ လဂွံကဵုပရေၚ်ဍုၚ်ကွာန် ဟိုတ်နူဒှ်ဒပ်ပၞာန်လုပ်သၞောဝ် ဟွံသေၚ်ဂှ်ရ သွက်ဂွံဆဵုဂဗသဳကၠဳအာဟၟဲရဂှ် ပ္ဍဲကဵုပေါဲသောၚ်ကလးပရိုၚ် KNU ကၠောန်ဗဒှ် ကြဴနူကောန်ကရေတ် KNU မရနုက်ကဵု (၁၇) ဝါတုဲ ပ္ဍဲကဵုဂိတုအဝ်ဂါတ် စၟတ်တ္ၚဲ (၁၀) ဂှ် လေဝ် လလောၚ်တြးဟီုလဝ် ကၠးကၠးမးမးရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ပၞောဝ်ကဵုညးဆဵုဂဗကဵုက္ဍိုပ်သ္ကိုပ်ပၞာန်သီအဝဵုဂှ် မွဲစွံကဵု ဥက္ကဋ္ဌ KNU တြေံ ဂအုပ်ဗိုလ်ဇၞော် သဝ်မူတူဇြေဖိုဝ်ဂှ် CEC- KNU တြေံ ပဒိုဝ်သဝ်ရဝ်ဂျာခေန်၊ ပဒိုဝ်သဝ်ယှိုဲမောၚ် ဒေါံဇူလဝ်နူတာလျိုၚ်ဥက္ကဋ္ဌ ခရိုၚ်ဒူပလာယာတအ်ပါလုပ်တုဲ ပရေၚ်ဆဵုဂဗဏံဂှ် ညိဟွံဆေၚ်ဆက်ကဵု ဗော်သွးကောန်ဂကူကရေၚ် KNU ရဂှ် KNU လလောၚ်တြးဟီုလဝ်ရ။

နကဵုဗော်သွးကောန်ဂကူဂကူကရေၚ် KNU လေဝ် ညံၚ်တိုၚ်ပ္ကဴရန်တၟံပရေၚ်ဍုၚ်ကွာန်ဇကု ဂွံအံၚ်ဇၞး ဒတူလာၚ်အာ မွဲကရောံကဵု ဂကောံဇြဟတ်ပၠန်ဂတးတအ် ခိုၚ်ၚ်ဗိုန်န်မွဲစွံတုဲ လုပ်အာပေါဲဗတိုက် ပေၚ်ၚ်ရောၚ်ဂှ် ဟီုလဝ် ပ္ဍဲတၚ်လလောၚ်တြးရ။

ဗော်သွးကောန်ဂကူကရေၚ် KNU ဂှ် ပံၚ်တောဲကဵု ဂကောံဇြဟတ်ပၠန်ဂတးတအ်တုဲ ဒှ်ဂကောံရပ်လွဟ်ကောန်ဍုၚ်အရၚ်ဝှ်ကြံၚ် ပၠန်ဂတးဒစဵုဒစးဒၟံၚ်ကဵုဒပ်ပၞာန်သီအဝဵု မွဲဂကောံလေဝ်ဒှ်ရ။

ပရိုၚ် – သြၚ်လောန်တိုၚ်(မ်)

ဗီု – MOI