ပ္ဍဲဂဗုတ်ပန်ပှော်ၜၚ်ကံက်ဂှ် ပါလုပ်သီုသၟာကမၠောန်ဆုဲပြံၚ်ကောန်ဍုၚ်ဗၟာ ဒးချိုတ်လဝ် (၂) တၠ

ၜက်ကံက်၊ အံက်တဝ်ဗာ(၅)

ပ္ဍဲကဵုဇြေန်တာဖျာ ဇြဳယာမ်ပါရာဂွောန် ယၟုဒယှ်ဒၟံၚ် ပ္ဍဲဍုၚ်ၜၚ်ကံက်၊ ဍုၚ်သေံဂှ် ဟိုတ်နူသၟတ်အယုက် (၁၄) သၞာံမွဲတၠ ပန်ပှော်လဝ်တုဲ ကောန်ဍုၚ်ကြုက်မွဲတၠကီု သီုသၟာကမၠောန်ဆုဲပြံၚ်ကောန်ဍုၚ်ဗၟာမွဲတၠ ဒးချိုတ်လဝ်တုဲ ဒးလဝ်ဘဲဝပ် (၅) တၠရဂှ် ဂွံတီကေတ် အတိုၚ်တၚ်ဓမံက်ထ္ၜးလဝ် ပ္ဍဲဌာန်ပရိုၚ်ဖျေံသ္ဇိုၚ်ဍုၚ်သေံတအ်ရ။

ပ္ဍဲကဵုပရေၚ်ပန်ပှော် က္တဵုဒှ်လဝ် ပ္ဍဲဂိတုအံက်တဝ်ဗာ စၟတ်တ္ၚဲ (၃) အခိၚ်ဇိုၚ်သဝ်တ္ၚဲဂှ် နူအခိၚ်ပြဟ်ဟ်တေံ လ္ပာ်ဒပ်ဗၠာဲသၟိၚ်ဂှ် ဒးချိုတ်လဝ် (၃) တၠရဂှ် ၜိုန်ရဂွံတီကေတ်ကီုလေဝ် မၞိဟ်ဒးချိုတ်လဝ် နွံ (၂) တၠဟေၚ်တုဲ ဒးလဝ်ဘဲဝပ်သ္ကာတ်မြဟ် မွဲတၠရ။

ပ္ဍဲပရေၚ်ပန်ပှော်ဏံ မၞိဟ်ဗြဴဴကြုက်ဂှ် ဒးချိုတ်လဝ် ပ္ဍဲဒၞာဲဒှ်ပ​ရေၚ်ပရောဂှ်တုဲ မၞိဟ်ဗြဴသၟာကမၠောန်ဆုဲပြံၚ် ကောန်ကၟိန်ဍုၚ်ဗၟာဂှ်မ္ဂး ဟိုတ်နူဘဲဝပ်တုဲ အခိၚ်စိုပ်ရုၚ်ဂဥုဲဂှ် ဒးအိုတ်လဝ်လမျီုရ။

အတိုၚ်တၚ်လလောၚ်တြး ဒပ်ဗၠာဲသၟိၚ်မ္ဂး မၞိဟ်ဒးလဝ်ဘဲဝပ် (၂) တၠဂှ် ဒပ်ဗၠာဲသၟိၚ် ပလံၚ်ဗစိုပ်ဏာလဝ် ရုၚ်ဂဥုဲတုဲ မွဲတၠဂှ် ရုၚ်ဂဥုဲစူလာလံၚ်ကောန် သှ်ေမွဲတၠဂှ်မ္ဂး ပလံၚ်ဗစိုပ်လဝ် ရုၚ်ဂဥုဲဟိုဝ်ဟာချဳဥူရ။

အတိုၚ်လဟီုဂကောံဒပ်ဗၠာဲသၟိၚ်သေံဟီုလဝ်မ္ဂး သၟတ်သၟာလွဟ် ရပ်ဂွံလဝ်ဂှ် ဒှ်ကွးဘာကျူယှေန် ဘာမၞုံဒၟံၚ်ဗ္ဒာဲဇြေန်တာဖျာ ဇြဳပါရာဂွောန်ဂှ် မွဲတၠတုဲ ဒှ်မၞိဟ်စောဲလာံဒၟံၚ် ဂိမ်ပန်လွဟ်ကောန်ပျူတာရဂှ် ဂွံတီကေတ်ရ။

သၟာရပ်လွဟ်ဂှ်မ္ဂး သွက်ဂွံစၟဳစၟတ်အတိုၚ်သၞောဝ်ဥပဒေ ထိၚ်ဒက်လဝ် ပ္ဍဲဗဒိုပ်ဗၠာဲသၟိၚ် ပဓုမ်ဝါမ်တုဲ ပါမောက္ခ ညးမဒှ်မိမတအ်ဂှ်လေဝ် ကော်ကေတ်လဝ် ပ္ဍဲဗဒိုပ်ဗၠာဲသၟိၚ်ရဂှ် ဓမံက်ထ္ၜးလဝ်ပ္ဍဲၜၚ်ကံက်ပေါတ်ရ။

အခိၚ်လုပ်ဂၠိုက်ဂၠာဲသ္ၚိဒၟံၚ် သၟာလွဟ် အယုက် (၁၄) သၞာံဂှ်မ္ဂး မ္ၚးနူလွဟ် ကေုာံကပေါတ်ဆက်စပ် သီုကဵုမကမ်တအ်တုဲ သီဂွံလဝ် သီုကဵုခၞော်မကမ်ရဂှ် လ္ပာ်ဒပ်ဗၠာဲသၟိၚ်သေံ ဓမံက်ပ္တိတ်ဟီုဂးလဝ်ရ။

သၟာကမၠောန်ဆုဲပြံၚ် မမိုဝ်မျေတ်ဌေ အယုက် (၃၁) သၞာံ ဒးချိုတ်လဝ် ပ္ဍဲဂဗုတ်ပန်ပှော်ဂှ် ဒှ်မၞိဟ်သေဌဳ ပတှ်ေစမွဲတၠတုဲ ဟီုအရေဝ် (၃) ဘာသာမာန်တုဲ ဟိုတ်နူပြၚ်ဗစိုပ်ဒၟံၚ်သြန် သွက်သ္ၚိညးလၟိုန်ဂှ်ရ ထံက်ပၚ်ကဵုအာ မိမညးပ္ဍဲကၟိန်ဍုၚ်ဗၟာ မွဲဂိတုမ္ဂး ၝာတ်သေံ မွဲလက်အခိၚ်ဍာံဍာံရောၚ်ဂှ် သေဌဳတၠကမၠောန်ဂှ် ဟီုသ္ပလဝ်ဒ္တန် ကုမဳဒဳယာသေံရ။

Ref-The Nation Thailand, Bangkok Post, AMARINTV