ရးဒေသတၞၚ်သြဳ ပ္ဍဲကဵုပွိုၚ်မွဲဂိတု သ္ဂံၚ် PDF ကဵုစှော် ဒးပြဟ်လလုဲလဝ် ပ္ဍဲပေါဲဗတိုက် 

​ဗိက်၊ အံက်တဝ်ဗာ(၅)

ပ္ဍဲရးဒေသဇၞော်တၞၚ်သြဳ ပ္ဍဲကဵုပေါဲဗတိုက်ၜါလ္ပာ် က္တဵုဒှ်လဝ်တအ် ပ္ဍဲဂိတုသေပ်တေမ်ဗာ တုဲကၠုၚ်ပွိုၚ်မွဲဂိတုဂှ် လ္ပာ်ဒပ်စဵုဒၞာညးဍုၚ်ကွာန် သ္ဂံၚ် PDF ကဵုစှ်ောဒးပြဟ်လလုဲလဝ်ရဂှ် ဂွံတီကေတ် အတိုၚ်ဂကောံဇြဟတ်ပၠန်ဂတးတအ် ဟီုဂးလဝ်ရ။ 

ပ္ဍဲကဵုဂိတုတုဲကၠုၚ်ဂှ် ပေါဲဗတိုက်ၜါလ္ပာ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်စဵုဒၞာညးဍုၚ်ကွာန်တအ် က္တဵုဒှ်လဝ် ဟွံအောန်နူ (၅၀) ဝါ နွံတုဲ ပရေၚ်ဇီုကပိုက်ချိုတ်ဂျိုုၚ်ၜါလ္ပာ် သာတုဲဂၠိုၚ်ကၠုၚ်လဝ်ရ။ 

အတိုၚ်ဌာန်ပရိုၚ်တနေန်တာယျဳတိုၚ်(မ်) ဖျေံသ္ဇိုၚ်ဒေသဂှ် ဓမံက်ထ္ၜးလဝ်မ္ဂး ပ္ဍဲကဵုဂိတုသေပ်တေမ်ဗာဂှ် သ္ဂံၚ် PDF ဒးပြဟ်လလုဲလဝ် (၁၆) တၠ ဒးလဝ်ဘဲဝပ် (၅) တၠတုဲ လ္ပာ်ဒပ်ပံၚ်ကောံ ကံၚ်ဇြဳပၞာန်၊ ပျူသဝ်ထဳတအ်ဂှ် ဒးချိုတ်လဝ် (၆၉) တၠရဂှ် ဂွံတီကေတ်ရ။ 

ညးတာလျိုၚ်လလောၚ်ပရိုၚ် ခရိုၚ်ဗိက် တံဒပ် (၁) ဂှ်မ္ဂး သ္ဂံၚ် PDF တအ်ဂှ် ပါဲနူပေါဲဗတိုက် သီုကဵုပရေၚ်ပရော ဒးဒုၚ်က္ဍိုက်ဗတိုက်လဝ်ဗဒိုပ်ဂှ် ဟိုတ်နူဒးဒုၚ်ရပ်ဒက်ပြိုက်ဂစိုတ်လဝ် ဃောအာချဳဒရာၚ်ဒၟံၚ်ပၞာန်ဂှ်ရ ဒးပြဟ်လလုဲလဝ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။ 

သ္အာၚ်နူဂှ်ပၠန် ပ္ဍဲကဵုပေါဲဗတိုက်ၜါလ္ပာ်ဂှ် ဟိုတ်နူလွဟ်လက်နက်မကမ် ဟွံရုမ်ဂပ်ကီု၊ လ္ပာ်ဒပ်ပၞာန် ပြံၚ်ဗျူဟာတုဲ ဟိုတ်နူလုပ်က္ဍိုက်ဗတိုတ်လဝ် နကဵုသၞောတ်ဒပ်ဒမၠုက် ဇြဟတ်ဇၞော်ဇၞော်ကီုဂှ်ရ ပရေၚ်ချိုတ်ဂျိုၚ် နွံကၠုၚ်ရဂှ် ညးဟီုလဝ်ရ။ 

မွဲလ္ပာ်ပၠန်ဂှ် ဒပ် PDF တအ်ဂှ် အကြာဒပ်ဒးဆေၚ်ဒၟံၚ်မုက်ကဵု ပြဿနာလွဟ်လက်နက်မကမ် ဟွံရုမ်ဂပ်တအ်ဂှ် ဒးဆဵုဂဗဒၟံၚ်ကဵုအကာဲအရာ ပရေၚ်ပံၚ်တောဲရေၚ်တၠုၚ် ဇြဟတ်ဍိုန်လျဒၟံၚ်ရဂှ် ဂွံတီကေတ် အတိုၚ်ကောန်ဒပ်စဵုဒၞာဒေသတအ် ဟီုသ္ဂးလဝ်ရ။ 

ပ္ဍဲဂိတုသေပ်တေမ်ဗာတုဲကၠုၚ်တေံဂှ် ဗဒိုပ်သၟတ် ကေုာံဗဒိုပ်ယာယဳ ဒပ်စဵုဒၞာညးဍုၚ်ကွာန် မၞုံပ္ဍဲရးဒေသတၞၚ်သြဳ ၃ ဗဒိုပ် ဒးဒုၚ်လုပ်က္ဍိုက်ဗတိုက်လဝ်တုဲ ပရေၚ်လွဟ်လက်နက်မကမ်၊ ဇွောံမစၞစ ကေုာံကပေါတ်အရပ်စပ် ဒးဆောံလေၚ်လဝ်လေဝ် နွံကၠုၚ်ရ။ 

ပရိုၚ် – သြၚ်လောန်တိုၚ်(မ်)

ဗီု – ချာန်နေဝ်တြးဝါဒ