ဟိုတ်နူမာၚ်တိုပ်တိကဵု လွဟ်ဇၞော်တုဲ ကောန်အရာပ် ဒးချိုတ်လဝ် (၂) တၠ ဒးလဝ်ဘဲဝပ် (၇) တၠ

ကျောက်ဂျဳ၊ အံက်တဝ်ဗာ(၅)

ဟိုတ်နူဒပ်ကံၚ်ဇြဳပၞာန် ပ္ဍဲပွိုၚ်ဍုၚ်ကျောက်ဂျဳ၊ ဒပ်မဟာ – ၃ ဗော်သွးကောန်ဂကူကရေၚ် KNU ပန်ဖျေံလွဟ်ဇၞော်ကီု သီုကဵုမာၚ်တိုပ်တိတုဲ ပ္ဍဲဂိတုတုဲကၠုၚ်တေံ ကောန်အရာပ် (၂) တၠ ဒးချိုတ်လဝ်တုဲ ဒးလဝ်ဘဲဝပ် (၇) တၠရဂှ် ဂွံတီကေတ် အတိုၚ်တၚ်လလောၚ်တြး ကဝ်မတဳရီုဗၚ်ဟံၚ်ပြာ်ကာတၟေၚ်ကရေၚ် ပွိုၚ်ဍုၚ်လေဝ်ဒိုဝ် (ကျောက်ဂျဳ)ရ။

ဒပ်ကံၚ်ဇြဳပၞာန် ပ္ဍဲပွိုၚ်ဍုၚ်ကျောက်ဂျဳဂှ် ပ္တဝ်လဝ်ကဵု ညးဍုၚ်ကွာန်တုဲ ပန်ဖျေံဒၟံၚ်လွဟ်ဇၞော် ဗတိုက်ဒၟံၚ်ကဵုက္ၜၚ်ကျာ၊ ပါံစွံလဝ်မာၚ်၊ ထ္ပက်ဒၟံၚ်ကရောၚ်ပၞာန်၊ ရပ်ဒက်ဒၟံၚ်၊ သုၚ်စောဲဒၟံၚ်ကောန်အရာပ်ညးဍုၚ်ကွာန်တအ် နဒဒှ်ဒေၚ်ဒုၚ်ဒၞာမၞိဟ် ကၠောန်သ္ပဒၟံၚ် မပ္တံဗီုဏံ အဆက်ဟွံပိုတ်သ္ကုတ် နွံဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ပ္ဍဲဂိတုသေပ်တေမ်ဗာ နူကဵုစၟတ်တ္ၚဲ (၁) စဵုကဵုစၟတ်တ္ၚဲ (၃၀) ဂှ် ပါလုပ်သီုဒပ်ပၞာန်ကျာကံၚ်ဇြဳပၞာန် ဒပ်အမၠံက် ကေုာံဒပ်ပၞာန်တိုက် မၞုံသၟဝ်တဲပရေၚ်ကောပ်ကာဲ ဌာန်ဂအုပ်ပၞာန်ရးသၠုၚ်ကျာတအ်ဂှ် ပရေၚ်ပန်ပှော်ဖျေံလဝ်လွဟ်ဇၞော် ပ္ဍဲကွာန် (၈၆) ဝါ၊ ပါံစွံလဝ်မာၚ် ပ္ဍဲဒၞာဲညးဍုၚ်ကွာန်တအ်ကီု၊ သီုကၠောန်သ္ပလဝ် ညံၚ်တိရိစ္ဆာန် ညးဍုၚ်ကွာန်ပိုၚ်ပြဳ ဂွံဇီုကပိုက်ဒးချိုတ်ရဂှ် ဟီုလဝ်ရ။

ဟိုတ်နူဒပ်ကံၚ်ဇြဳပၞာန် ဗတိုက်ပန်ပှော် သီုပါံစွံလဝ်မာၚ်တုဲ ပ္ဍဲဂိတုသေပ်တေမ်ဗာ (၁) ဂိတုဂှ် ပ္ဍဲပွိုၚ်ဍုၚ်ကျောက်ဂျဳ မၞိဟ်တြုံ (၂) တၠ ဒးချိုတ်လဝ် မၞိဟ်တြုံ (၆) တၠ၊ မၞိဟ်ဗြဴ (၁) တၠ အပံၚ်လၟိဟ် (၇) တၠ ဒးလဝ်ဘဲဝပ်တုဲ သ္ၚိဌာန်ညးဍုၚ်ကွာန်တအ် (၉) မ၊ ဘာလကျာ် မွဲဘာ ဇီုကပိုက် ဒးလီုလာ်လဝ်ရဂှ် ကဝ်မတဳရီုဗၚ်ဟံၚ်ပြာ်ကာတၟေၚ်ကရေၚ် ဟီုရ။

ဒပ်ကံၚ်ဇြဳပၞာန် ပ္ဍဲပွိုၚ်ဍုၚ်ကျောက်ဂျဳဂှ် ကၠောန်သ္ပဖံက်ပ္ကဝ်ဒၟံၚ် အခေါၚ်အရာမၞိဟ် လ္တူညးဍုၚ်ကွာန်တအ် အဆက်ဟွံပိုတ်သ္ကုတ်တုဲ ညးဍုၚ်ကွာန် မၞုံပ္ဍဲပွိုၚ်ဍုၚ်ဂှ် ဒးဆဵုဂဗဒၟံၚ်ကဵု ပရေၚ်ဒးဒုၚ်ဖံက်ပ္ကဝ်အခေါၚ်အရာမၞိဟ် နဲကဲစုၚ်တုဲ ပရေၚ်ဂီုကၠီုပရေၚ်ဘဝမၞိဟ်ဟၟဲရဂှ် ဟီုလဝ် ပ္ဍဲတၚ်လလောၚ်တြးရ။

ပရေၚ်ပ္တဝ်လဝ်ကဵုကောန်အရာပ်ညးဍုၚ်ကွာန် ဗတိုက်ပ္ကီုပရာပ်ဒၟံၚ်တအ်ဂှ် ဟီုပျုတ်ဗ္ဒေက်ဒစဵုဒစးအာ သ္ကာတ်တ်မြဟ်ဟ်တုဲ ညံၚ်ပရေၚ်ပ္ကီုပရာပ် ဂွံဒေါံဒေၚ်အာလွာဲလၟုဟ်ကီု၊ သွက်ဂွံကဵုအရီုဗၚ်ဗ္စာရဏာပရေၚ်မၞိဟ် သွက်မပ္တံကဵုပရေၚ်ဂီုကၠီု ကေုာံ ပရေၚ်စသုၚ်မံၚ်စံၚ် ပရေၚ်ပညာ ညးဍုၚ်ကွာန်ပါဲဘဲပၞာန်တအ်ဂှ် အာတ်မိက်လဝ်ရ။

အတိုၚ်လိက်စံၚ် ဇာနှိက်အထံက်အရီုဓဝ်ၜိုဟ်လလံကရေၚ် KPSN လလောၚ်တြးလဝ်မ္ဂး ပ္ဍဲခရိုၚ်ညံၚ်လေဝ်ပေန် KNU ဒပ်မဟာ -၃ ဂှ် ဟိုတ်နူဒပ်ကံၚ်ဇြဳပၞာန် ဗတိုက်ပန်ပှော်လဝ်ကီု သီုကဵုဖံက်ပ္ကဝ်လဝ် အခေါၚ်အရာမၞိဟ်တုဲ ညးဒးဂြိပ်ဒဴပါဲဓလေဝ်ဒၟံၚ် စဵုကဵုၜါကိုတ်ပြၚ် နွံကၠုၚ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)

ဗီု – KNU

ဗီုစၞောန် – ဟိုတ်နူဒပ်ကံၚ်ဇြဳပၞာန် ဗတိုက်ပန်လဝ်ကဵုက္ၜၚ်ကျာ ဗီုဃောညးဍုၚ်ကွာန်တအ်ဂြိပ်ဒဴပါဲဓလေတ်ဒၟံၚ် ပ္ဍဲခရိုၚ်ညံၚ်လေဝ်ပေန် KNU။