ဗဒိုပ်ထံၚ်ထုမ်ခါကျေန် တၞၚ်သြဳ ဒးဒုၚ်ဗတိုက်လဝ်

တၞၚ်သြဳ၊ အံက်တဝ်ဗာ(၇)

ရးဒေသဇၞော်တၞၚ်သြဳ၊ ပွိုၚ်ဍုၚ်တၞၚ်သြဳ၊ ဗဒိုပ်ထံၚ်ထုမ်ခါကျေန် ဗ္ဒာဲကွာန်ထုမ်ခါဂှ် ဟိုတ်နူဒးဒုၚ်ဗတိုက်လဝ်တုဲ ကောန်ဒပ်ကံၚ်ဇြဳပၞာန် (၃)တၠ ဒးချိုတ်လဝ်တုဲ ဒးလဝ်ဘဲဝပ် ဟွံအောန်နူ (၅)တၠရဂှ် ကရောၚ်ပၞာန်ပံၚ်တောဲကဝ်ဒူလေဝ် လလောၚ်တြးလဝ်ရ။

ဗဒိုပ်ထံၚ်ထုမ်ခါကျေန်ဂှ် ပ္ဍဲဂိတုအံက်တဝ်ဗာ တ္ၚဲတုဲကၠုၚ်တေံ အခိၚ်နူဂယး ၜိုတ် (၉) နာဍဳဂှ် ဒပ်ပံၚ်ကောံ ကဝ်ဒူလေဝ်အာမဳ (KTLA) တံဒပ်ထဳသမေဝ် ဒပ်လ္ပာ် (၄) ကေုာံ ဒပ်ကရောၚ်ပၞာန်တၟေၚ်ခွောတ်တောၚ်တမာန်တအ် လုပ်စိုပ်ဗတိုက်လဝ်ရ။

ဟိုတ်နူဗဒိုပ်ထံၚ်စာတ် ဒးဒုၚ်ဗတိုက်လဝ်တုဲ ကြဴဴနူအခိၚ်ပေါဲဗတိုက်ၜါလ္ပာ် ဒှ်လဝ်ဗ္ဒာဲပွိုၚ်မွဲနာဍဳတုဲဂှ် လ္ပာ်ကံၚ်ဇြဳပၞာန် ဒးဂိလဝ်ရ။

ညးတာလျိုၚ်လလောၚ်ပရိုၚ် ဒပ် KTLA-tcjf ကိုဝ်သိုၚ်ညဳဂှ်မ္ဂး အတိုၚ်ဂွံလဝ်ပရိုၚ် ကောန်ဒပ်ကံၚ်ဇြဳပၞာန် စိုပ်ဒၟံၚ်ပ္ဍဲဗဒိုပ်ထံၚ်ဂှ် ဗ္ဒာဲ (၈၀)တၠတုဲ အာစိုပ်ဗတိုက်လဝ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သ္အာၚ်နူဂှ်ပၠန် ဒပ်ပံၚ်ကောံဗတိုက်လဝ်ဂှ် ပ္တဝ်လဝ်ကဵု ဗဒိုပ်ကၚ် မၞုံပ္ဍဲဗဒိုပ်ထံၚ်ဂှ် (၃) ဒၞာဲ ဗတိုက်လဝ်တုဲ တာဲကၚ်ကံၚ်ဇြဳပၞာန် (၃) မလေဝ် ဇီုကပိုက် ဒးလီုလာ်လဝ်ရဂှ် ဟီုလဝ်ရ။

ဗဒိုပ်ထုမ်ခါကျေန် မဒှ်ဗဒိုပ်ထံၚ်စာတ် ဆေၚ်ရာကဵုသွာၚ်ဗၠာဲသၟိၚ် ဇြေန်ဖျူယှေန် (၄)ဂှ် ကောန်ဒပ် ဗျူဟာပွိုၚ်ဍုၚ်ဍာ်ဗုကေုာံ တံဒပ်ပၞာန်တိုၚ် (၅၅၈) တအ် ကေတ်လဝ်ဂီုကၠီုရ။

ဗဒိုပ်ထံၚ်ထုမ်ခါကျေန်ဂှ် ပ္ဍဲကဵုဂိတုမေ သၞာံတုဲကၠုၚ်တေံလေဝ် ဒပ်ပံၚ်ကောံ ဂကောံဇြဟတ်ပၠန်ဂတးတအ် အာစိုပ်ဗတိုက်လဝ်ဂှ်ရ ပါဲနူကောန်ဒပ်ကံၚ်ဇြဳပၞာန်တုဲ ညးယိုက်ဝန်ထံၚ်လ္ၚဵုတအ်လေဝ် ဇီုကပိုက် ဒးလဝ်ဘဲဝပ်နွံရ။

ပရိုၚ် – သြၚ်လောန်တိုၚ်(မ်)

ဗီု -Social Media