ပ္ဍဲအိန္ဒိယ ဂွံထပ်ဆဵုကေတ်လဝ် ဂဥုဲခ္ဍက်ဗဒှ်ကဵုဂျိ ကောန်ၚာ်ချိုတ်မာန်ပၠန်

နယူဒေလဳ၊ အံက်တဝ်ဗာ(၆)

ညးပိုၚ်ပြဳအဝဵုအိန္ဒိယတအ်ဂှ် လလောၚ်တြးပ္တိတ်လဝ် ဒဒှ်ရဂဥုဲခ္ဍက်ကၠောန်ပ္တိတ် နူ Norris Medicines ကဵု ဂဥုဲအာလာဂျဳဗၠးတအ်ဂှ် ဗဒှ်ကဵုဂျိမာန်တုဲ ပရေၚ်ကောန်ၚာ်သၟတ် နွံအလုံမွဲဂၠးကဝ် ဒးချိုတ်လဝ် (၁၄၁) တၠဂှ် ဆက်စပ်ဒၟံၚ်ကဵု ဂဥုဲခ္ဍက်မကၠောန်ပ္တိတ် နူအိန္ဒိယရဂှ်ဂွံတီကေတ်ရ။

Diethylene glycol (DEG) ဟွံသေၚ်မ္ဂး Ethylene glycol (EG) သုၚ်စောဲလဝ် ပ္ဍဲဂဥုဲခ္ဍက် ကၠောန်ပ္တိတ် နူအိန္ဒိယတအ်ဂှ် ဒှ်ကကပေါတ်က္တဵုဗဒှ်ကဵုဂျိ ပါလုပ်ဒၟံၚ်တုဲ သ္ပတံနူလ္ဒောဝ်သၞာံ ၂၀၂၂ တုဲ ပ္ဍဲဂါမ်ဘဳယာ၊ ဥဗေတ်ဇ်ကာစ်သတာန် ကေုာံကေန်မရွောန်ဂှ် ဟိုတ်နူဂဥုဲခ္ဍက်တအ်ဂှ်တုဲ ပရေၚ်ပရောဒးချိုတ် အိုတ်လဝ်လမျီု က္တဵုဒှ်လဝ်ရ။

အတိုၚ်တၚ်ဒံက်တာဟေဝ်မေန်ဂဝ်ဟာန်ဗိုၚ် ကိုဝ်ယှဳယာ (Hemant Gordhanbhai Koshia) ကဝ်မယှေန်နာ ထိၚ်ဒဝ်စၞစ ကေုာံဂဥုဲဇဗ တွဵုရးဂူဂျာရာတ်ဟီုလဝ်ကဵု ဌာန်ပရိုၚ်ရိုက်တာဂှ်မ္ဂး ပ္ဍဲကဵုဂိတုတုဲကၠုၚ်တေံ စၟဳစၟတ်လဝ်ရုၚ်စက် Norris တုဲ ကဵုလဝ်အမိၚ် သွက်ဂွံဗစိုပ်ထောံဒတုဲ ပရေၚ်ကၠောန်ပ္တိတ်ရဂှ် ဂွံတီကေတ်ရ။

“နကဵုကုမ္ပဏဳဂှ် သွက်ဂွံဒ္ဂေတ်ဗက် သၞောတ်ဗ္ၜတ် ပ္ဍဲကမၠောန်ကၠောန်ပ္တိတ်နတဲဂှ် ယောၚ်ယာလဝ်ရ။ ပ္ဍဲဒၞာဲထိၚ်ဒဝ်ဗလးကျာ အတိုၚ်တၚ်ပိုၚ်ခြာလဝ် ဟၟဲပုဟ်။ ရံၚ်ကဵုပရေၚ်ထတ်ယိုတ်ညးဍုၚ်ကွာန်တုဲတှ်ေ ဗဒေါံကဵုလဝ် ပရေၚ်ညးတအ်ကၠောန်ပ္တိတ်ရ”ဂှ် ဒံက်တာကိုဝ်ယှဳယာ ဟီုလဝ်ရ။

ကုမ္ပဏဳ Norris ကၠောန်ပ္တိတ်လဝ် ဂဥုဲခ္ဍက်ဗဒှ်ကဵုဂျိဂှ်မ္ဂး ဟွံကလေၚ်ပလန်လဝ် အဳမေလ်ဌာန်ပရိုၚ်ရိုက်တာတုဲ ဖုၚ်ရုၚ်ကုမ္ပဏဳဂှ်လေဝ် ဆက်စၠောံဟွံဂွံရဂှ် ဓမံက်ထ္ၜးလဝ် ပ္ဍဲပရိုၚ်တၞံတမ်ရိုဟ်ရ။

ပ္ဍဲအရာကၠောန်ပ္တိတ်ဂဥုဲခ္ဍက်ဂှ် ဗ္ၜတ် Diethylene glycol (DEG) ဟွံသေၚ်မ္ဂး Ethylene glycol (EG) ပါလုပ် ကၟိန်ဍုၚ်နာနာ ဒုၚ်လဝ်တဲဂှ် ဒှ်သၟဝ် ၀.၁၀ ဟေၚ်ရဂှ် ဂကောံထတ်ယိုတ်ဂၠးကဝ် ဟီုလဝ်ရ။

ပရေၚ်ရုပ်သီလဝ် အခေါၚ်သွံတြးဂဥုဲ Norris ဗဒှ်ကဵုအန္တရာယ်မာန် နွံ ဟၟဲဂှ်မ္ဂး ၜိုန်ရဟွံဂွံတီကေတ်လဝ် ကၠးကၠးမးမးကီုလေဝ် ဂဥုဲဇဗသီုၜါဂကူဂှ် သွံတြးဒၟံၚ် လ္တူအောန်လာၚ်ဏီဖိုဟ်ရဂှ် ဓမံက်ထ္ၜးလဝ် ပ္ဍဲဌာန်ပရိုၚ်ရိုက်တာရ။

အခိၚ်ထပ်သီဂွံလဝ် ဂဥုဲဗဒှ်ကဵုဂျိ ဗီုလၟုဟ်ဏံဂှ် နကဵုအလဵုအသဳအိန္ဒိယ သွက်ဂွံသ္ပဂရုကၠောန်ရေၚ်တၠုၚ် ညံၚ်ဍာ်ဒကေဝ်ဂဥုဲ ကေုာံညံၚ်ညးယဲတအ် ဂွံဗၠးဘဲအန္တရာယ်ဂှ် ဒှ်အခိၚ်ပ္တိတ်ဒၟံၚ်ဇြဟတ် သွက်ဂွံကၠောန်ဗဒှ်ပေါဲသဳကၠဳကမၠောန် ကရောံညးကၠောန်ပ္တိတ်ဂဥုဲ မၞုံအလုံမွဲကၟိန်ဍုၚ် နူကဵုကံၚ်ဇြဳသၠုၚ်ပ္တိုန်ဂဥုဲဇဗပလံၚ်ဗစိုပ်ဍုၚ်သ္အာၚ်လေဝ် ဒှ်ဒၟံၚ် မွဲအခိၚ်ဓဝ်ရ။

Ref – REUTERS