ဂဗုတ်ရာဇဝတ် ဂကောံဇြဟတ်ပၠန်ဂတးတအ် က္လိလောန်လဝ် လ္တူညးဍုၚ်ကွာန်တအ်ဂှ် ဒးကေတ်အရေဝ်ရောၚ် သ္ကိုပ်ဝန်ဇၞော် NUG ဟီု

မတ်မလီု – အံက်တဝ်ဗာ (၇)

သွက်ဂွံဒက်ပ္တန် ဂကောံရပ်စပ်ထိၚ်ဒဝ်ကေတ်အရေဝ် ဂဗုတ်ရာဇဝတ် ဂကောံဇြဟတ်ပၠန်ဂတးတအ် က္လိလောန်လဝ် လ္တူညးဍုၚ်ကွာန်တအ် နွံဒၟံၚ်ပၟိက်ဂှ် လၟေၚ်ကမၠောန်ဖျေံဗ္တောန် ကဵုတန်ဗ္တောန် ဇြဟတ်ညံၚ်ဂွံခိုဟ် ဒးကၠောန်ရေၚ်တၠုၚ်ထေက်ရောၚ် သ္ကိုပ်ဝန်ဇၞော် NUG မာန်ဝေန်ခိုၚ်တာန် ဟီုလဝ်ရ။

ပ္ဍဲကဵုကောံဓရီုကဝ်မတဳ ဓမံက်ရုပ်ရဴဴပရေၚ်အုပ်ဓုပ်ညးဍုၚ်ကွာန် ဒေသန္တရကာလအကြာဗဟဵု အလဵုအသဳညဳသၟဟ်ကောန်ဂကူ လၟေၚ် (၄၀ / ၂၀၂၃) ပ္ဍဲကဵုဂိတုအံက်တဝ်ဗာ စၟတ်တ္ၚဲ(၅) တုဲကၠုၚ် ပ္ဍဲအခိၚ်နူဂယးဂှ် ဟီုသ္ဂးလဝ်သာ်ဏံရ။

“မ္ၚးနူဂဗုတ်ပ္ကီုပရာပ် လ္ပာ်ကံၚ်ဇြဳပၞာန်က္လိလောန်လဝ် ပ္ဍဲဗလးမုက်တိဂှ် သွက်ဂွံကေတ်အရေဝ်ရပ်စပ်ထိၚ်ဒဝ် ဂဗုတ်ရာဇဝတ် ဂကောံဇြဟတ်ပၠန်ဂတးပိုဲ က္လိလောန်လဝ် လ္တူညးဍုၚ်ကွာန်တအ်မာန် ညံၚ်လၟေၚ်ကမၠောန်မပ္တံကဵု ဒက်ပ္တန်ဂကောံနွံပၟိက်၊ ဖျေံဗ္တောန်ကဵု တန်ဗ္တောန်တအ်ဂှ်လေဝ် ထေက်ကဵုဒးကၠောန်ရေၚ်တၠုၚ်ကဵုရောၚ်”ဂှ် သ္ကိုပ်ဝန်ဇၞော် NUG မာန်ဝေန်ခိုၚ်တာန် ဟီုလဝ်ရ။

သ္အာၚ်နူဂှ်ပၠန် ညံၚ်ညးဍုၚ်ကွာန်တအ် ဂွံဖျေံစိုတ်ဂီုကၠီုမာန်ဂှ် ပ္ဍဲကဵုအလဵုအသဳ ကေတ်လဝ်တာလျိုၚ်တအ်ဂှ် ဟိုတ်နူတာလျိုၚ် နွံဒၟံၚ်ပေၚ်ၚ်ဂှ်ရ နကဵုဌာနဝန်ဇၞော် ဘိုၚ်ကရိုၚ်ကၠောန်ၜိုတ်ကဵု လၟေၚ်ကမၠောန်အုပ်ဓုပ်သၞောဝ်ဓဝ်တအ်ဂှ် သာတုဲ ညံၚ်ဂွံပ္တိတ်ကဵုဇြဟတ် ကၠောန်ရေၚ်တၠုၚ်ကဵုဂှ်လေဝ် ဗတိုက်ဖ္အောဝ်လဝ်ရ။

ကောံဓရီုကဝ်မတဳဓမံက်ရုပ်ရဴပရေၚ်အုပ်ဓုပ်ညးဍုၚ်ကွာန် ဒေသန္တရကာလအကြာဗဟဵု NUG ဂှ် သ္ကိုပ်ဝန်ဇၞော်ကၟိန်ဍုၚ် မာန်ဝေန်ခိုၚ်တာန် က္ဍိုက်က္ဍိုပ်တုဲ ဝန်ဇၞော်လုပ်ဂကောံအလဵုအသဳ၊ ဒုဝန်ဇၞော်၊ ဝန်ပ္ဍဲဒ္တန်၊ ဖက်ဆောဝန်ပ္ဍဲဒ္တန် ကေုာံညးတာလျိုၚ်တအ် တိုန်စိုပ်လဝ်ရဂှ် ဂွံတီကေတ်ရ။

ညးလုပ်ဂကောံကဝ်မတဳဓမံက်ရုပ်ရဴပရေၚ်အုပ်ဓုပ်ဒေသန္တရကာလအကြာဗဟဵု တိုန်စိုပ်ကၠုၚ်လဝ်တအ်ဂှ် စပ်ကဵုတၚ်သ္ဂုတ်သွာတ်၊ လၟေၚ်ကမၠောန်အဓာန်ဂတ ဖျေံလဝ် ပ္ဍဲ (၃၉ ၂၀၂၃)တေံတုဲ လးထ္ၜးသောၚ်ကလး သဳကၠဳလဝ်လဝ် ရၚ်သ္ကအ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)

ဗီု – NUG