ရေဝ်၊ အံက်တဝ်ဗာ(၇)
ပ္ဍဲပွိုၚ်ဍုၚ်ရေဝ်၊ တွဵုရးဍုၚ်မန် လလောၚ်တြးလဝ် ပရေၚ်အုပ်ဓုပ်ပၞာန်ဂှ် ကြဴနူကောန်ဒပ်ကံၚ်ဇြဳပၞာန် ဒးဒုၚ်ပန်ဂစိုတ်လဝ် ပ္ဍဲဂိတုတုဲကၠုၚ်တေံတုဲဂှ် နူဒပ်ကံၚ်ဇြဳပၞာန် တိတ်မ္ၚးဒပ်တုဲ ကၠောန်သ္ပဒၟံၚ်ပရေၚ်စၟဳစၟတ် ထ္ၜးအယောၚ်အလာဗီုပြၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဒပ်ကံၚ်ဇြဳပၞာန် ဇြဟတ်ဒပ်နွံ ဗ္ဒာဲ (၅၀)ဂှ် ပ္ဍဲကဵုဂိတုအံက်တဝ်ဗာ စၟတ်တ္ၚဲ (၄) တုဲကၠုၚ်တေံ ပ္ဍဲကဵုဂၠံၚ်သွာၚ်၊ ဒၞာဲလုပ်ဍုၚ်၊ တိတ်ဍုၚ် ပ္ဍဲဍုၚ်ရေဝ်တအ်ဂှ် ကၠောန်သ္ပစၟဳစၟတ်လဝ် ညးအာကၠုၚ်အကြာဂၠံၚ် ကွဳလိုန်ဓာတ် ကွဳစက်တအ် နဒဒှ်ထ္ၜးအယောၚ်အလာဗီုပြၚ်ရ။
အတိုၚ်ညးဒေသ ၃ တၠဟီုလဝ်မ္ဂး ဒပ်ကံၚ်ဇြဳပၞာန် ကၠောန်လဝ်ပရေၚ်စၟဳစၟတ် တိတ်မ္ၚးဒပ်ဂှ် ဒဒှ်ရစၟဳစၟတ်လဝ် ညးအာကၠုၚ် အကြာဂၠံၚ် ကွဳလိုန်ဓာတ် ကွဳစက်တအ်ဂှ် တက်ကေတ်စၟတ်သမ္တီ ဗီုရုပ် ရုပ်ဂမျိုၚ်တုဲ လအ်ဂွံၜိုတ်ကဝက်နာဍဳတုဲဂှ် ကလေၚ်လုပ်အာ ပ္ဍဲဒပ်ပၠန်ရဂှ် ဟီုလဝ်ရ။
ပ္ဍဲတ္ၚဲဂှ်ရ ဒပ်ကံၚ်ဇြဳပၞာန် ဇြဟတ်ဒပ် ဗ္ဒာဲ (၁၀၀) ပါ သုၚ်စောဲကွဳစက်ပၞာန်တုဲ ကၠောန်သ္ပလဝ် အယောၚ်အလာဗီုပြၚ် ဂေတ်ကၚ်ဂီုကၠီု ပ္ဍဲသ္ကုတ်ဂၠံၚ်အာကွာန်ပါၚ်ၜဳ(ဆီးဖြူသောၚ်)ကဵု အစေန် ပွိုၚ်ဍုၚ်ရေဝ်တုဲဂှ် ကလေၚ်လုပ်အာ ပ္ဍဲဒပ်ပၠန်ရဂှ် ညးဒေသတအ်ဟီုလဝ်ရ။
ဒပ်ကံၚ်ဇြဳပၞာန်ထ္ၜးအယောၚ်အလာဗီုပြၚ် တိတ်မ္ၚးဒပ်ဂှ် တ္ၚဲဏံ ဂိတုအံက်တဝ်ဗာ စၟတ်တ္ၚဲ (၄) ဂှ်ရ ကၠောန်လဝ်ပရေၚ်စၟဳစၟတ်တုဲ တ္ၚဲလကြဴနူဂှ် ပရေၚ်စၟဳဳစၟတ် ဟၟဲရဂှ် ဂွံတီကေတ်နူညးဒေသတအ်ရ။
ပွိုၚ်ဍုၚ်ရေဝ်ဂှ် ပ္ဍဲကဵုဂိတုသေပ်တေမ်ဗာ သတ္တာဟလကြဴအိုတ် တုဲကၠုၚ်တေံ ဒၟာနူဗိုလ်ဇၞော်မွဲတၠ၊ ဂအုပ်ဗၠာဲသၟိၚ်မွဲတၠ ဒးဒုၚ်ပန်ဂစိုတ်လဝ်တုဲ တိုက်သြန်မြဝတဳ ဒပ်ပၞာန်ပိုၚ် မၞုံလ္တူဍုၚ်ဂှ်လေဝ် ဂကောံဇြဟတ်ပၠန်ဂတးတအ် လုပ်စိုပ်ဗတိုက်လဝ်ရ။
ကြဴနူဗတိုက်ပန်ပှော်တုဲဂှ် ညးထံက်ဂလာန်ဒပ်ပၞာန်တအ်ဂှ် ဒဒှ်ရသ္ကိုပ်ရးသ္ကုတ်ဒိုဟ်အဂၞဲ၊ သ္ကိုပ်ဒပ်ရးရေဝ် ကေုာံ ကောန်ဒပ်ကံၚ်ဇြဳပၞာန် ပ္ဍဲပွိုၚ်ဍုၚ်ရေဝ်တအ် ပရေၚ်ဂီုကၠီုဍိုန်လျဂှ် ဟိုတ်နူဟီုဂးပါ်ပါဲ ချူတြးဒၟံၚ် ပ္ဍဲအကံက်တေဝ်လဳဂရာမ် နွံဒၟံၚ်ဂှ်ရ ဒပ်ကံၚ်ဇြဳပၞာန် တိတ်မ္ၚးဒပ်တုဲ ကၠောန်လဝ်ပရေၚ်စၟဳစၟတ် ထ္ၜးအယောၚ်အလာဗီုပြၚ်ရ။
ပ္ဍဲပွိုၚ်ဍုၚ်ရေဝ် ပရေၚ်ချဳဒရာၚ်ဂကောံဇြဟတ်ပၠန်ဂတး ဇြဟတ်ခိုဟ်ဒၟံၚ်ဂှ်မ္ဂး ဒပ်ကံၚ်ဇြဳပၞာန် ဒးဆေၚ်ဒၟံၚ်မုက်ကဵု အကာဲအရာဇြဟတ်ဒပ် လေၚ်ဒိုက်ဂှ် တိတ်မ္ၚးဒပ်ကီု သီုထ္ပက်ကရောၚ်ပၞာန် စဵုကဵုဟၟဲ အောန်ဒၟံၚ်တုဲ မံၚ်ဒၟံၚ်ပ္ဍဲဒပ်ကေုာံ ပ္ဍဲဗဒိုပ်တအ်ဟေၚ်ရ။
သ္အာၚ်နူဂှ်ပၠန် ဟိုတ်နူအကာဲအရာပရေၚ်ဂီုကၠီုတုဲ ဗဒိုပ်ဗၠာဲသၟိၚ်တိဍာ် ပါလုပ်သီုခေါဇာ၊ လမိုၚ်သီုဖအိုတ်ဂှ် ဒးရုပ်သီလဝ်တုဲ ပံၚ်ကောံမံၚ်ဒၟံၚ် ပ္ဍဲဗဒိုပ်ဗၠာဲသၟိၚ်ဍုၚ်ရေဝ်တုဲ ကမၠောန်ရုၚ်ဌာနမဆေၚ်စပ်လ္ၚဵုဂှ်လေဝ် ဆုဲပြံၚ်ကၠောန်ဒၟံၚ် ပ္ဍဲဒပ်ပၞာန် နွံဒၟံၚ်ရ။
ပ္ဍဲကဵုဂိတုသေပ်တေမ်ဗာတုဲကၠုၚ်တေံလေဝ် တံဒပ်ဖျေံသ္ဇိုၚ်ပွိုၚ်ဍုၚ်ရေဝ် (၄) တံဒပ်ဂှ် ဒပ်ပံၚ်ကောံ ဂကောံဇြဟတ်တအ် မ္ၚးလွဟ်ဇၞော်၊ လွဟ်ဍောတ်တုဲ သုၚ်စောဲက္ၜၚ်ကျာမသက္ကုမၞိဟ်ဒဳ အဇာဍောတ်တုဲ ဗတိုက်လဝ်ရ။
ပရိုၚ် – သြၚ်လောန်တိုၚ်(မ်)
ဗီု -CJ
sanlontai