ကျာ်ထဝ်၊ အံက်တဝ်ဗာ(၁၀)
တွဵုရးဍုၚ်မန်၊ ပ္ဍဲပွိုၚ်ဍုၚ်ကျာ်ထဝ် ဗြဲဇၞော်ကဵုဇြဟတ် ဂူတရိုပ်စှ်ေတုဲ ဟိုတ်နူဍာ်ကြုၚ်ကဒက်ကၟိုဟ်တိုန်တုဲ ဒးပဆုဲပြံၚ်လဝ် ညးဒေသမွဲလ္ၚီပြၚ် ပ္ဍဲဒၞာဲဗၠးဘဲ နဒဒှ်ကာတၟေၚ်ရဂှ် ဂွံတီကေတ် နူညးဒေသကီု သီုဂကောံရီုဗၚ်ဟံၚ်ပြာ်မၞိဟ်တအ်ရ။
သ္ပတံနူဂိတုအံက်တဝ်ဗာ စၟတ်တ္ၚဲ (၈) တုဲကၠုၚ်တေံ အခိၚ်ဒေါဝ်တ္ၚဲတုဲဂှ် ဗြဲဇၞော်ကဵုဇြဟတ် ဂူတရိုပ်စှ်ေတုဲ ဟိုတ်နူဍာ်ကြုၚ်ကဒက် ကၟိုဟ်တိုန်ကၠုၚ်ဂှ်ရ ပ္ဍဲကဵုအရာပ် (၆) အရာပ် ပါလုပ်သီုအရာပ်ဇေယျာမန်၊ ကအ်သာန်နိုၚ်၊ တောၚ်ဒူသု၊ မျောက်ပိုၚ်၊ အေယုက်ညုၚ် မဒှ်အရာပ်သဝ်ဝ်တအ်ဂှ် ဍာ်ဇၞော်ကၟိုဟ်ဒၟံၚ်ရ။
ဟိုတ်နူဍာ်ဇၞော်တုဲ ညးဍုၚ်ကွာန် ဒးဘဲဒဏ်ဍာ် မွဲလ္ၚီပြၚ်တအ်ဂှ် ပံက်လဝ်ဗ ဒိုပ်ဇၞူရီုဗၚ်ကာတၟေၚ်ယာယဳ ပ္ဍဲဘာလကျာ် မၞုံလ္တူဍုၚ်ကျာ်ထဝ် (၅) ဘာတုဲ မၚ်မွဲရံၚ်စံၚ်လဝ်ရ။
ပြဟ်ဟ်ဏံ သွက်ညးဍုၚ်ကွာန် ဒးဘဲဒဏ်ဍာ်တအ်ဂှ် နွံဒၟံၚ်ပၟိက် အရီုအဗၚ်ဇွောံမစၞစသ္ဇိုၚ် ပါလုပ်သီုဍာ်သုၚ်ရဂှ် ညးတာလျိုၚ်ရီုဗၚ်ဟံၚ်ပြာ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဏံ ပ္ဍဲဂိတုအံက်တဝ်ဗာ စၟတ်တ္ၚဲ (၉) ဏံလေဝ် ဟိုတ်နူဍာ်ထပ်တိုန်ကၠုၚ်တုဲ ဂၠံၚ်ကွဳစက်လဂုၚ်မတ်မလီု ဂတမုက် ရုၚ်သၞောဝ်ဓဝ်ကျာ်ထဝ်ဂှ် ဍာ်ၜက်ဒၟံၚ်တုဲ ကၟာတ်လဝ်အခေါၚ်တတ်ကၠောံအာကၠုၚ် မွဲချိုန်ခနရဂှ် ဂွံတီကေတ်နူညးဒေသတအ်ရ။
ဟိုတ်နူဗြဲဇၞော်ကဵုဇြဟတ် တရိုပ်ဂူစှ်ေတုဲ ပ္ဍဲဂိတုအံက်တဝ်ဗာ စၟတ်တ္ၚဲ (၈) ဂှ်လေဝ် ဂၠံၚ်တိုန်ဒဵုကျာ်ဣသိယဵု ပ္ဍဲဗ္ဒာဲမိုၚ်တိုၚ် စၟတ် (၇) ဂှ် ဗ္ဒၚ်တိဒဵုခရိုဟ်လာ်စှ်ေ က္တဵုဒှ်လဝ်ရ။
ပွိုၚ်ဍုၚ်ကျာ်ထဝ်ဂှ် ပ္ဍဲကဵုဂိတုအဝ်ဂါတ်တုဲကၠုၚ်တေံ ဟိုတ်နူဍာ်ဇၞော် ဒးပဆုဲပြံၚ်လဝ်ညးဒေသတအ်တုဲ သီုကဵုဍာ်ထပ်ဇၞော်အလန်ဏံတုဲ ပ္ဍဲသၞာံဏံ ဍာ်ဇၞော်လဝ် စဵုကဵုၜါဝါ က္တဵုဒှ်လဝ်ရ။
တုပ်ဗီုဂှ်ကီု လ္တူဍုၚ်ဗဂေါ၊ ရးဒေသဗဂေါဂှ်လေဝ် သ္ပတံနူဂိတုအံက်တဝ်ဗာ စၟတ်တ္ၚဲ (၈)တုဲ ဟိုတ်နူဍာ်ဇၞော်ကၟိုဟ် ဒှ်ဒၟံၚ်ဂှ်ရ ညးဒေသမွဲလက်ပြၚ် ဒးဂဗဒၟံၚ်ဘဲဒဏ်ဍာ်ရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်(မ်)
ဗီု – Twitter
sanlontai