ဗဂေါ၊ အံက်တဝ်ဗာ(၁၀)
ရးဒေသဇၞော်ဗဂေါ၊ ပ္ဍဲဍုၚ်ဗဂေါဂှ် ဟိုတ်ဗြဲဇၞော်ကဵုဇြဟတ်ဂူတရိုပ်စှ်ေတုဲ ဒးဆဵုဂဗဒၟံၚ်ကဵုဘဲဍာ်ဇၞော် လောန်ၜက်နူသၞောတ်ဗ္ၜတ် လၟိဟ်မၞိဟ်မွဲလက်ပြၚ် ဒးဒၟံၚ်ဘဲဒဏ်ဍာ်တုဲ မၞိဟ်ထပ်ဒးဆုဲပြံၚ် နဒဒှ်ကာတၟေၚ်တအ်လေဝ် ထပ်နွံဒၟံၚ်ဏီရဂှ် ညးဒေသကီု သီုကဵုဂကောံရီုဗၚ်ဟံၚ်ပြာ်တအ် ဟီုလဝ်ရ။
ပ္ဍဲဂိတုအံက်တဝ်ဗာ စၟတ်တ္ၚဲ (၇)တုဲကၠုၚ်တေံ နူကဵုအခိၚ်ဗ္တံဂှ် မွဲကရောံကဵု ဗြဲဇၞော်ကဵုဇြဟတ်ဂူတရိုပ်စှ်ေတဂှ် ဍာ်ၜဳဗဂေါ ကၟိုဟ်တိုန်ကၠုၚ်ကီု၊ ပ္ဍဲကဵုဂိတုအံက်တဝ်ဗာ စၟတ်တ္ၚဲ (၈) ဂှ်လေဝ် နူကဵုကၟိုန်ဍာ်ဇြောၚ်တူ ဗ္ၜတ်ဍာ်လောန်ၜက်နူဗ္ၜတ်တုဲ ဟိုတ်နူဗလးဖျေံဒၟံၚ်ဍာ်ကီုဂှ်ရ အလုံဍုၚ်ဗဂေါမွဲ ဒးဆဵုဂဗဒၟံၚ် ဘဲဍာ်ဇၞော်ရ။
“ကၟိုန်ဍာ်ဇြောၚ်တူဂှ် ဍာ်ဂၠိုၚ်တိုန်ကၠုၚ်ခ္ဍၚ်တုဲ ဗလးပ္တိတ်ဒၟံၚ်ဍာ်ကီု ဍာ်ၜဳတိုန်ကၠုၚ်ကီုဂှ်ရ ဍာ်ဂှ် သာကၠုၚ်ရ။ ဍာ်ဂှ်တှ်ေ ပ္ဍဲသ္ကုတ်သဝ်သဝ်ဂှ် ဒမျိုဟ် (၂) သၠုၚ်မၞိဟ်ပြၚ်ကဵု လ္ပာ်သ္ကုတ်သၠုၚ်သၠုၚ်တအ်ဂှ်တှ်ေ တိုန်ဒၟံၚ် ၜိုတ်ၜါပေပြၚ်၊ ဍာ်ဇၞော်ဒၟံၚ် ကြပ်ဒှ်အလုံံဍုၚ်မွဲရ”ဂှ် ညးတာလျိုၚ်ရီုဗၚ်ဟံၚ်ပြာ်မွဲတၠ ဟီုကဵု ဌာန်ပရိုၚ် သြၚ်လောန်တိုၚ်(မ်)ရ။
ဟိုတ်နူဍာ်ဇၞော်တုဲ ညးဒေသ ၁၀၀၀၀ ပြၚ် နူကဵုအရာပ် (၁၁) အရာပ် ပါလုပ်သီုအရာပ်လ္တူဍုၚ် မပ္တံကဵုဍုၚ်တၟိ၊ ကျောက်ဂျဳသု၊ ကလျာဏဳ သီုကဵုကွာန် မပ္တံကဵုကွာန်ဝါပျာန်၊ ကလိ၊ မုမ်တိုၚ်၊ ကျာ်ဇၞော်တအ်ဂှ် ဒးလဝ်ဘဲဒဏ်ဍာ်တုဲ ပြံၚ်ပဆုဲစၠောံလဝ် ဇရေၚ်ဗဒိုပ်ရီုဗၚ်ဟံၚ်ပြာ် ဘဲဒဏ်ဍာ်ရ။
ညးဍုၚ်ကွာန်ဒးဘဲဒဏ်ဍာ်တအ်ဂှ် ပြဟ်ဟ်ဏံ ပံက်လဝ်ဗဒိုပ်ရီုဗၚ်ဟံၚ်ပြာ် (၂၉) ဗဒိုပ် ပါလုပ်သီုဘာလကျာ်အရာပ်ဇြိုၚ်တောၚ်၊ ဇြိုၚ်မျောက်၊ အရာပ်ကျောန်တာယာ၊ မၚ်္ဂလာဇေယျုံ၊ ပုဏ္ဍာသုတအ်ရ။
ဟိုတ်နူဍာ်ဇၞော်တုဲ ပ္ဍဲဗ္ဒာဲကွာန်ယှိုဲလှေ ဂၠံၚ်ဓလေတ်ဍုၚ်ဗဂေါဂှ် ဂၠံၚ်လိုက်စှ်ေအာ ဗ္ဒာဲ (၆) ပေတုဲ ဟိုတ်နူစက်ဆက်စၠောံတိုၚ်တာဝါ MPT ဗၠိုက်ဒၟံၚ်ဍာ်ဂှ်ရ လာၚ်ဆက်စၠောံ MPT ပိုတ်သ္ကုတ်ဒၟံၚ်ရဂှ် ဂွံတီကေတ်ရ။
စၟတ်အပိုၚ်ခြာဍာ်ဒးဒှ်ဓဝိၚ် ၜိုန်ရနွံ ၈၈၀ ဇြေန်တဳမဳတာကီုလေဝ် အတိုၚ်တၚ်ၜတ်ဗၞတ်ဂွံလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၉)အခိၚ်နူဂယးဂှ် လောန်ၜက်ဒၟံၚ် ၁၀၀၄ ဇြေန်တဳမဳတာတုဲ လ္တူနူဗ္ၜတ်အပိုၚ်ခြာဒးဒှ်ဓဝိၚ် လောန်ၜက်ဒၟံၚ် (၄) ပေပြၚ်ရ။
ဟိုတ်နူဍုၚ်ဗဂေါဍာ်ဇၞော်တုဲ သွက်ညးဍုၚ်ကွာန်ပါဲဘဲဒဏ်တအ်ဂှ် နွံဒၟံၚ်ပၟိက် ဇွောံစၞစ၊ သွက်ကမၠောန်ရီုဗၚ်ဟံၚ်ပြာ်ဂှ် နွံဒၟံၚ်ပၟိက် အရီုဗၚ်ဂၠုၚ်စက် ကေုာံဇြဟတ်ရီုဗၚ်ဟံၚ်ပြာ်ရဂှ် ဂွံတီကေတ် အတိုၚ်ဂကောံရီုဗၚ်ဟံၚ်ပြာ်တအ် ဟီုလဝ်ရ။
ပရိုၚ် – သြၚ်လောန်တိုၚ်(မ်)
ဗီု – CJ
sanlontai