ဒဳမအ်သဵု၊ အဝ်ဂါတ် (၂၉)
ပ္ဍဲကဵုကောန်ၚာ် မမံၚ်တန်တဴဒၟံၚ် ပ္ဍဲဗ္ဒိုပ်ပါဲဒဴဘဲပၞာန် (၂) ဗ္ဒိုပ် သ္ကုတ်ဗၟံက် ဒဳမအ်သဵု၊ တွဵုရးကရေၚ်ဍာဲတံဂှ် ဒးဒုၚ်စသိုၚ်ဒၟံၚ် ယဲစၞော်တံရောၚ် အ္စာဂဥုဲ မလွဳလွတ်ကဵုဒၟံၚ် ညးပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဗ္ဒိုပ်ပါဲဒဴဘဲပၞာန်တံဂှ် ဒၟါနူဍာ်ဟွံသ္အးဇ္ၚးကီု၊ ဖ္ဍာန်ဒဒေၚ်ဒၞါဲမံၚ်တံ ဟွံရုမ်ဂပ်ကီုဂှ်ရ ပ္ဍဲကဵုကောန်ၚာ်သၟတ်တံသၟးဟွံက ပ္ဍဲကဵုမၞိဟ်ဇၞော်ဇၞော်လ္ၚဵုတံလေဝ် က္တဵုဒှ်ဒၟံၚ် ယဲစၞော်တံကီုရ။
“ပြဟ်ဟ်ဏံဂှ် စၟယဲဗိုၚ်ရာတ်တံရ၊ အရာမက္တဵုဒှ် ပ္ဍဲစၞာံမၞိဟ်တံဂှ် စၟယဲဗိုၚ်ရာတ်တံနွံ၊ ဗာတ်တဳရဳယျာတံနွံရ၊ လၟုဟ် ဒှ်ဂှ်တှ်ေ ဒှ်ဟိုတ်နူဗိုၚ်ရာတ်ဏောၚ်၊ သွက်ဒးဂွိၚ်နွံဟာဟီုဂှ် နူကဵုယဲစၞော် နူကဵုကလောံကလေန်တံဂှ် စၟလုပ်ဂွံမ္ဂး ဒးဂွိၚ်ရောၚ်၊ ပြဟ်ဟ်ဏံဂှ် ဟိုတ်နူဒှ် ဒၟါနူဗိုၚ်ရာတ်တုဲ အဓိကဂှ်တှ်ေ ညံၚ်ဇြဟတ်ဒုၚ်ဒဝ်ဂွံခိုဟ်ဂှ်မံၚ်၊ မံၚ်သ္အးသ္အးဇ္ၚးဇ္ၚးမ္ဂးတှ်ေ ပြေပြံၚ်ဂၠိုၚ်ရောၚ်” သာ်ဝွံ အ္စာဂဥုဲ မရီုဗၚ်ရေၚ်တၠုၚ်ကဵုဒၟံၚ် ပရေၚ်ညးပါဲဒဴဘဲပၞာန်တံ ဟီုရ။
သ္အာၚ်နူဂှ်ပၠန် စၟယဲဗိုၚ်ရာတ်(သ်) ပ္ဍဲကဵုကောန်ၚာ်သၟတ် ၜိုတ် (၂၀) ပြၚ် မၞုံဒၟံၚ် ပ္ဍဲဗ္ဒိုပ်ပါဲဒဴဘဲပၞာန် သ္ကုတ်ဗၟံက် ဒဳမအ်သဵု မဒးဒုၚ်ကၠောံထၞာန်လဝ်ဂှ်ဝွံ အခိၚ်ဒှ်ကၠုၚ်သရမ္ဂး ဒဂွိၚ်ရောၚ် သ္ဂးရ။
ဗိုၚ်ရာတ်(သ်) ဏံဝွံ ပ္ဍဲကဵုကောန်ၚာ်သၟတ် (၇) သၞာံ ကဵု (၈) သၞာံတံဂှ် ဒးဒုၚ်ကၠောံထၞာန်ဒၟံၚ်တုဲ အကာဲအရာကၠောံထၞာန်မြက် နွံဂှ် ဂွံတီကေတ်ရ။
ဗိုၚ်ရာတ်(သ်) မက္တဵုဒှ်ဒၟံၚ် ပ္ဍဲဗ္ဒိုပ်ပါဲဒဴဘဲပၞာန်တံဝွံ နူကဵုစဒှ်ဍာ်ပတိုဟ်ဂှ် ဂၠိုၚ်ကၠုၚ်သိုက်က်တုဲ ဗီုပြၚ်ယဲမက္တဵုဒှ်ဂှ် ဒဵုကဵုအခိၚ်လၟုဟ် ဟွံဂွံတီကေတ် ဗွဲလစှ်ေဏီရ။
အခိၚ်လၟုဟ် လၟိဟ်မက္တဵုဒှ်ဒၟံၚ် ပ္ဍဲဗ္ဒိုပ်ပါဲဒဴဘဲပၞာန် (၂) ဗ္ဒိုပ်ဂှ်ရ ဂွံတီကေတ်လဝ်တုဲ ပ္ဍဲဗ္ဒိုပ်ပါဲဒဴဘဲပၞာန် ဒၞါဲတၞဟ်ဟ်တံဂှ် ယဲမဖှ်သာ်ဏံ က္တဵုဒှ် နွံဟွံမွဲ နကဵုသြၚ်လောန်တိုၚ်(မ်) ဆက်ဂၠိုက်ဂၠါဲစၟဳစၟတ်ဒၟံၚ်ဖိုဟ်ရောၚ်။
ပ္ဍဲတွဵုရးကရေၚ်ဍာဲဂှ် ဗွဲကြဴဒပ်ပၞာန်သီအဝဵုတုဲ ပေါဲဗ္တိုက်တံ အရိုဟ်ဒဒှ်တ္ၚဲ က္တဵုဒှ်ဒၟံၚ်တုဲ ညးဍုၚ်ကွာန်ပါဲဒဴဘဲပၞာန် (၂) ကိုဋ်ပြၚ်ဝွံ ထောံလသာသ္ၚိဌာန်တုဲ ဒးဂြိပ်ဒဴပါဲဒလေတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)