ကျာ်ထဝ်၊ အဝ်ဂါတ် (၂၉)
ပ္ဍဲကွာန်မုခ်ပြေၚ် (မုပ္ပလၚ်စံပြ) ၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန် ကရေပ်ဂၠံၚ်ဆေၚ်ပ္ကဴ ( ရတနာငွေမိုး) ပ္ၚံက်ကၠအ် (ဥသျှဉ်) ဂှ် ဒပ်ကံၚ်ဇြဳပၞာန် (၃) တၠ ဒးဒုၚ်ဗ္တိုက်ဗ္တိုဟ်မာၚ်တုဲ ချိုတ်အာလဝ်ဂှ် ညးဒုၚ်တာလျိုၚ် PDF ခရိုၚ်သဓီုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုအဝ်ဂါတ် (၂၆) ၜိုတ် (၆) နာဍဳပယျာံဂယး ကရေပ်ဂၠံၚ်ဆေၚ်ပ္ကဴ ( ရတနာငွေမိုး) ပ္ၚံက်ကၠအ် ( ဥသျှဉ်) ဂှ် အတိုၚ်ပရိုၚ်မဂွံလဝ် ပစူလဝ်မာၚ်ဂးတုဲ ကောန်ဒပ်ကံၚ်ဇြဳပၞာန်တံ သွက်ဂွံပသောၚ်မာၚ် အဃောမကၠုၚ်စိုပ်ဂှ် ဒးဒုၚ်ဗ္တိုက်ဗ္တိုဟ်လဝ်မာၚ်ရ။
ကုကောန်ဒပ်ကံၚ်ဇြဳပၞာန် မစိုပ်ကၠုၚ် သွက်ဂွံပသောၚ်မာၚ်ဂှ် ဂကောံပံၚ်ကောံ PDF ၊ ဒပ်ပၞာန်ဗၠးၜးကောန်ဂကူကရေၚ် KNLA တံ ဗ္တိုဟ်မာၚ်ဗ္တိုက်လဝ်ရ။
ဒးဒုၚ်ဗ္တိုဟ်မာၚ် ဗ္တိုက်လဝ်ဂှ်ရ ကောန်ဒပ်ကံၚ်ဇြဳပၞာန် (၃) တၠ ချိုတ်အာလဝ်တုဲ ကုကောန်ဒပ်ကံၚ်ဇြဳပၞာန် မချိုတ်အာလဝ်တံဂှ် ကလေၚ်ယိုက်ဏာလဝ် နကဵုယာန်ဟိုက်ဂျက် အပ္ဍဲဍုၚ်ကျာ်ထဝ်တေံရောၚ် ညးဒုၚ်တာလျိုၚ် PDF ခရိုၚ်သဓီု ဟီုရ။
ကောန်ဒပ်ကံၚ်ဇြဳပၞာန်တံ ဒးဒုၚ်ဗ္တိုဟ်မာၚ်တုဲဂှ် ဒပ်ကံၚ်ဇြဳပၞာန်တံ ထပ်ရပ်ဒက်ဏာလဝ် ညးဒေသဗ္ဒါဲဗ္ဒါဲဂှ် (၂) တၠတုဲ ဒဵုကဵုအခိၚ်လၟုဟ် ဟွံကလေၚ်ဗလးဏီပုဟ်ဂှ် ညးဒေသတံ ဟီုရ။
ပ္ဍဲပွိုၚ်ဍုၚ်ကျာ်ထဝ်ဂှ် ဗွဲကြဴဒပ်ပၞာန်သီအဝဵုတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ ဆက်က္တဵုဒှ်ဒၟံၚ် ပေါဲဗ္တိုက်တံတုဲ ကရောၚ်ကွဳစက်ကံၚ်ဇြဳပၞာန်တံ ဒးဒုၚ်ဗ္တိုဟ်မာၚ် ဗ္တိုက်ဒၟံၚ်ရ။
ဟိုတ်နူပေါဲဗ္တိုက်ၜါလ္ပာ်တံတုဲ အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံဘာ်ပြၚ် ညးဍုၚ်ကွာန် (၂၂၀၀၀) ပြၚ်တံဝွံ ဒၞါဲဗၠးဘဲဂှ် ဒးဂြိပ်ဒဴပါဲဒလေတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)