ပ္ဍဲကၟိန်ဍုၚ်အဳယူတအ်လေဝ် ဝါဒက္ဍုဟ်မၠေံ ဂကူမၞိဟ်အရံၚ်လမ္စံက် က္ဍိုပ်ကလေၚ် စူတိုန်ကၠုၚ်

ဗဳယေန်နာ၊ အံက်တဝ်ဗာ(၂၆)

ဂျာမနဳ၊ အဝ်သတြဳယာ ကေုာံ ဖေန်လာန်တအ်ဂှ် ပရေၚ်ပါ်ခြာဂကူမၞိဟ် လ္တူမၞိဟ်ဂကူလမ္စံက် ပ္ဍဲဥရောပ သာတုဲ ဇၞော်ဂေါဝ်တိုန်ကၠုၚ်ဒၟံၚ်တုဲ ပ္ဍဲကဵုပရေၚ်ဆက်ဆောံပါ်ကဆံၚ်ကေုာံ ပရေၚ်ပလာပ်ပထုဲတအ်လေဝ် စိုပ်ကၠုၚ်ဒၟံၚ်ကိုန်စၞောန် သၠုၚ်အိုတ်ရဂှ် အကံက်တၚ်ဂၞၚ် ညးဆုဲပြံၚ်မံၚ်တန်တဴ နူကဵုအဳယူ ၁၃ ဍုၚ်မွဲစံၚ် လလောၚ်တြးလဝ်ရ။

အေဂျေန်ဇြဳ ဥရောပသမဂ္ဂ ဆေၚ်ကဵုအခေါၚ်အရာသ္ဇိုၚ် (FRA) ဂှ် ကံက်ကေတ်တၚ်ဂၞၚ် ပ္ဍဲလိက်ဒုၚ်စဳရေၚ်တုဲ အတိုၚ်တၚ်ဂၞၚ်သ္ၚဳဂၠိပ်ပါ်ပါဲ ဂွံညာတ်ကေတ်လဝ်မ္ဂး ပ္ဍဲလောန်ကၠုၚ် ပွိုၚ် ၁၂ ဂိတု ပရေၚ်ပါ်ခြာဆက်ဆောံဂကူမၞိဟ်ဂှ် ယဝ်တၟော်ကဵု ပ္ဍဲပွိုၚ်တြဴဴသၞာံတေံမ္ဂး သၠုၚ်ဂၠိုၚ်တိုန်ကၠုၚ် နူ ၁၀ တၟံကၠံ စဵုကဵု ၃၄ တၟံကၠံရဂှ် ဟီုလဝ်ရ။

ပ္ဍဲကဵုအဝ်သတြဳယာကဵု ဂျာမနဳဂှ် ဓမံက်ထ္ၜးလဝ် ၆၄ တၟံကၠံတုဲ အတိုၚ်တၚ်ဂၞၚ်ဂျာမနဳ ကံက်ကေတ်လဝ်မ္ဂး လ္တူနူ ကဆံၚ် ၃၃ တၟံကၠံ ဂၠိုၚ်တိုန်ကၠုၚ်လဝ် ဗ္ဒာဲၜါဂအုံတုဲ အဝ်သတြဳယာဂှ်မ္ဂး လ္တူနူကဵုအကံက်တၚ်ဂၞၚ် လောန်ကၠုၚ်ပွိုၚ်တြဴဴသၞာတေံ ဂၠိုၚ်တိုန်ကၠုၚ် ၄၂ တၟံကၠံ ကၠးကၠးမးမးတုဲ နဒဒှ်အကာဲအရာပရေံအိုတ် ဖေန်လာန်ဂှ် စဵုကဵု ၅၄ တၟံကၠံ နွံရဂှ် ဓမံက်ထ္ၜးလဝ်ရ။

“ပ္ဍဲကဵုအကံက်တၚ်ဂၞၚ် ပိုဲလကြဴအိုတ်ဏံ ဟွံဂွံညာတ်ကေတ် ပရေၚ်တဴတက်ဂှ် ဒးအံသဝ်ရ” ဂှ် ဒါရိုက်တာ FRA မိုက်ကေဝ် ဟီုလဝ်ရ။

“စၞးဂှ် အစေန်ဆက်ကောန်ဂကူအာဖရိကတအ် ဟိုတ်နူဖျုန်ဇကုညးတအ်ရ သာတုဲ ဒးဆဵုဂဗကၠုၚ်ဒၟံၚ်ကဵု ပရေၚ်ပါ်ကဆံၚ်ဆက်ဆောံရ” ဂှ်လေဝ် ညးဆက်ဟီုလဝ်ရ။

လ္တူနူလိက်ဒုၚ်စဳရေၚ် ပ္ဍဲပွိုၚ် လောန်ကၠုၚ် ၅ သၞာံတေံ ကံက်ကေတ်လဝ် ပ္ဍဲကၟိန်ဍုၚ် အပံၚ်လၟိဟ် ၁၃ ကၟိန်ဍုၚ်ဂှ်မ္ဂး အကံက်တၚ်ဂၞၚ်လၟုဟ်ဏံ ဒးဒုၚ်ပါ်ကဆံၚ်ဆက်ဆောံလဝ် အတိုၚ်ပရေၚ်ဂကူမၞိဟ်ရဂှ် ဗ္ၜတ်မၞိဟ်ဟီုသှ်လဝ် စဵုကဵု ၄၅ တၟံကၠံ သၠုၚ်ဂၠိုၚ်တိုန်ကၠုၚ်ရ။

ပမာဏဏံဂှ် ဂၠိုၚ်တိုန်ကၠုၚ် လ္တူပရေၚ်လ္ၚတ်လဝ် အခိၚ်ကၠာတေံ ၆ တၟံကၠံတုဲ ပ္ဍဲကဵုစရၚ်ကၟိန်ဍုၚ် နွံကဆံၚ်လ္တူဂၠိုၚ်အိုတ်ဂှ်မ္ဂး ဂျာမနဳ နွံဒၟံၚ် ၇၆ တၟံကၠံရ။

ပ္ဍဲကဵုအကံက်တၚ်ဂၞၚ် ကၠောန်လဝ် နူကဵု Ipsos သွက် FRA ဂှ် ဒှ်ကံက်ကေတ်လဝ်တၚ်ဂၞၚ် ပ္ဍဲညးဆုဲပြံၚ်မံၚ်တန်တဴဴ ၁၆၀၀၀ ပြၚ် မၞုံပ္ဍဲကၟိန်ဍုၚ်အပံၚ်လၟိဟ် ၁၅ ကၟိန်ဍုၚ် ကေုာ အစေန်ဆက်ညးတအ်တုဲ လိက်ဒုၚ်စဳရေၚ် FRA ကၠောန်ဗဒှ်လဝ် လ္တူဂကောံကောန်ဍုၚ်အရၚ် လၟိဟ်မၞိဟ်အောန် ကေုာံ မောဿလေန် ပ္ဍဲအပ္ဍဲ နူကဵုဂိတုအံက်တဝ်ဗာ သၞာံ ၂၀၂၁ စဵုကဵု ဂိတုအံက်တဝ်ဗာ သၞာံ ၂၀၂၂ ဂှ် ဓမံက်ထ္ၜးလဝ်ရ။

အကံက်တၚ်ဂၞၚ် ကံက်ကေတ်လဝ် နကဵုက္ဍိုပ်လိက် “ပရေၚ်ဒတူလာၚ် နဒဒှ်မၞိဟ်ဂကူဗ္စံက် ပ္ဍဲဥရောပ” သၠဲသၠဲလးလးဂှ် တြးပ္တိတ်လဝ် အလန်ပထမရ။

စွံအာရီုကံက်ကေတ်လဝ် လၟိဟ်မၞိဟ် ၆၇၅၂ တၠ ဍတ်ပါ်တိတ်ကၠုၚ် အောန်အိုတ်နူမိမမၞိဟ်ဗ္စံက်မွဲတၠ မံၚ်တန်တဴဒၟံၚ်ပ္ဍဲအဝ်သတြဳယာ၊ ဗေဝ်ဂျဳယာန်၊ ဒုၚ်မက်၊ ဖေန်လာန်၊ ပြၚ်သေတ်၊ ဂျာမနဳ၊ အိုၚ်ယာလာန်၊ အေတ်တလဳ၊ လူဇြေန်ဗေတ်၊ ပိုဝ်လာန်၊ ပဝ်တူကဳ၊ သပုၚ်ကေုာံ သွဳဒေန်တအ်ရ။

ပဝ်တူကဵုဆွဳဒေန်တအ်ဂှ်မ္ဂး ဒှ်ကၟိန်ဍုၚ် ဗ္ၜတ်ပလာပ်ပထုဲ သဝ်အိုတ်ဒှ်တုဲ ဒဒှ်ရပရေၚ်ပါ်ခြာဂကူမၞိဟ် အောန်အိုတ်တုပ်ကဵုပိုဝ်လာန်ဂှ် ဂွံတီကေတ် နူညးဟီုသှ်လဝ်တအ်ရ။

ပ္ဍဲလိက်ဒုၚ်စဳရေၚ် FRA ဂှ် သွက်ဂွံဒ္ဂေတ်ဗက် သၞောဝ်ဥပဒေဒစဵုဒစးပရေၚ်ပါ်ကဆံၚ်ဆက်ဆောံ ဗွဲမဍာံစၟတ်ကီု သီုပ္ဍဲအရာစၟတ်သမ္တီပိုၚ်ခြာ သွက်ဂဗုတ်ရာဇဝတ်တအ်ဂှ်လေဝ် ညံၚ်ရဴထပ်ချပ်စန်စာ ပရေၚ်ဆဝ်ပ္ၚုဟ် ဒုၚ်သ္ဇိုၚ်ကဵု လ္တူပရေၚ်ဗက်မုက်ဂကူမၞိဟ် မဒှ်အကာဲအရာ သာပရေံဒၟံၚ်ဂှ် သွက်ကၟိန်ဍုၚ် လုပ်ဂကောံအဳယူဂမၠိုၚ် တၚ်ကဵုက္သပ် ပါလုပ်ဗွဲမဂၠိုၚ်ရ။

Ref: Reuters