ဍာ်ဗု၊ အံက်တဝ်ဗာ(၂၇)
ရးဒေသဇၞော်တၞၚ်သြဳ၊ ပွိုၚ်ဍုၚ်ဍာ်ဗု၊ ပ္ဍဲကဵုပေါဲဗတိုက်ၜါလ္ပာ် ဒှ်လဝ် ဗ္ဒာဲကွာန်ယာန်ကေန်ဂှ် သ္ဂံၚ် PDF မွဲတၠ ဒးပြဟ်လလုဲလဝ်တုဲ ကောန်အရာပ်မွဲတၠ ဒးဒုၚ်ရပ်ဒက်ပြိုက်ဂစိုတ်လဝ်ရဂှ် ဂွံတီကေတ် အတိုၚ်တၚ်လောၚ်တြး ဂကောံဇြဟတ်ပၠန်ဂတးတအ်ရ။
ပ္ဍဲဂိတုအံက်တဝ်ဗာ တုဲကၠုၚ် စၟတ်တ္ၚဲ (၁၉) တေံ ဒပ်ကံၚ်ဇြဳပၞာန် ဇြဟတ်ဒပ်ပါလုပ် ၁၀၀ ပြၚ် နူကဵုဒဒန်ကွာန်ယာန်ကေန် ထ္ပက်ကရောၚ်ပၞာန် လုပ်စိုပ်ကၠုၚ် လ္ပာ်သ္ကုတ်ပလိုတ်ဂှ်ရ ပေါဲဗတိုက်ဆေၚ်မုက်ၜါလ္ပာ် က္တဵုဒှ်လဝ်ရ။
ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်တုဲ တ္ၚဲဂှ်အခိၚ်နူဂယး ၜိုတ် (၆) နာဍဳဂှ် ပေါဲဗတိုက် မွဲဝါ၊ အခိၚ် (၈) နာဍဳနူဂယးဂှ် ပေါဲဗတိုက်ဆေၚ်မုက် ထပ်ဒှ်လဝ် မွဲဝါပၠန်ရ။
ပ္ဍဲကဵုပေါဲဗတိုက်ဂှ် သ္ဂံၚ် PDF နူဒပ်ဇြေန်ယျဝ် ဒပ်စဵုဒၞာညးဍုၚ်ကွာန် ပွိုၚ်ဍုၚ်ဍာ်ဗုမွဲတၠ ဒးပြဟ်လလုဲလဝ်ရဂှ် ဂကောံဝေဟေန် ပွိုၚ်ဍုၚ်ဍာ်ဗုကဵု ဂကောံစဵုဒၞာညးဍုၚ်ကွာန် ပွိုၚ်ဍုၚ်ထဝါဲတအ် လလောၚ်တြးလဝ်ရ။
ပေါဲဗတိုက်ဒှ်တုဲဂှ် ဒပ်ကံၚ်ဇြဳပၞာန် ရပ်ကေတ်ဏာလဝ် ကောန်ဒေသ ညးဍုၚ်ကွာန် ကောန်ကွာန်ယာန်ကေန်မွဲတၠ သီုဟိုတ်ဟၟဲမွဲသာ် ပြိုက်ဂစိုတ်ဏာလဝ်တုဲ ညးဒေသလ္ၚဵုဂှ်လေဝ် ရပ်ကေတ်ဏာလဝ် နဒဒှ်ဒေၚ်ဒုၚ်ဒၞာမၞိဟ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ပ္ဍဲပေါဲဗတိုက်ၜါလ္ပာ်ဂှ် လ္ပာ်ဒပ်ကံၚ်ဇြဳပၞာန် ဒးဒုၚ်ကြတ်ဗတိုက်လဝ်ဂှ် ဒးချိုတ်လဝ် (၅) တၠတုဲ ဟွံအောန်နူ (၁၀) တၠ ဇီုကပိုက် ဒးလဝ်ဘဲဝပ်ရဂှ် ဟီုလဝ်ရ။
ပ္ဍဲကဵုပွိုၚ်ဍုၚ်ဍာ်ဗုဂှ် ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်တုဲ ပ္ဍဲကွာန်မပ္တံကဵုယာန်ကေန်၊ ဨကနိ၊ ခမောက်ချောၚ်၊ ယျလိုၚ်၊ ဝေတ်ချောၚ်၊ ပဂဝ်ဇြောန်တအ်ဂှ် ညးဒေသ ဂၠိုၚ်ကဵုလ္ၚီ ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် အတိုၚ်လဟီု ညးဒေသပါဲဒဴပၞာန်တအ် ဟီုလဴလဝ်ရ။
ပ္ဍဲရးတၞၚ်သြဳဂှ် ပ္ဍဲကဵုဂိတုသေပ်တေမ်ဗာတုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်ဟွံအောန်နူ ၅၀ ဝါ ဒှ်လဝ်တုဲ ဟိုတ်နူပေါဲဗတိုကတ်တအ်ဂှ်တုဲ ညးဒေသ ၄၅,၀၀၀ ပြၚ် ဒးဂြိပ်ဒဴပါဲဓလေတ်ဒၟံၚ်ရဂှ် ဂကောံသုတေသန FE5 Tanintharyi လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
ဗီု – CJ
လိက်စၞောန်ဗီုရုပ် – ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်ဍာ်ဗုတုဲ ဗီုညးဍုၚ်ကွာန်တအ်ဃောဂြိပ်ဒဴဴပါဲဓလေတ်ဒၟံၚ်
sanlontai