မတ်မလီု၊ အံက်တဝ်ဗာ (၂၇)
ပ္ဍဲတွဵုရးဍုၚ်မန်ဂှ် သွက်ဂွံထ္ၜးပျး ဒဒှ်ရတိဍာ်ညိၚ်ဝတ် သွက်ဂွံကၠောန်ဗဒှ်ပေါဲသ္ဘၚ် ဂိတုဝှ်ကဵု ပေါဲသ္ဘၚ်မိပ်မြဟ်တအ်ဂှ် ကံၚ်ဇြဳပၞာန် ပတေၚ်ဂြတ်လဝ် ပရေၚ်ဂီုကၠီု ပ္ဍဲကဵုဒၞာဲ ဗွဲမဂၠိုၚ်ရရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကံၚ်ဇြဳပၞာန်တွဵုရး စဳဇန်ဒၟံၚ် သွက်ဂွံကၠောန်ဗဒှ် ပေါဲသ္ဘၚ်ကျာ်ဣသိယဵု ကေုာံသ္ဘၚ်ကျာ်ခမဳ ဗွဲမဂဵုလဟဵုဇၞော်ကဵုဇြဟတ်တုဲ ပ္ဍဲကဵုကွာန်အရာပ်တအ်လေဝ် ကဵုလဝ်အခေါၚ်ကၠောန်ဗဒှ်သ္ဘၚ်ကျာ် ပေါဲသ္ဘၚ်မိပ်မြဟ်တအ်ရ။
ပ္ဍဲမွဲကာလဂိတုဝှ်ဏံ သွက်ဂွံကၠောန်ဗဒှ် သ္ဘၚ်ကျာ် သီုပေါဲသ္ဘၚ်မိပ်မြဟ်ဂှ် ကံၚ်ဇြဳပၞာန် ပတေၚ်ဂြတ်လဝ်ပရေၚ်ဂီုကၠီု ပ္ဍဲဒၞာဲလုပ်တိတ်ဍုၚ် ပ္ဍဲကဵုပွိုၚ်ဍုၚ်တအ်တုဲ ကၠောန်သ္ပဒၟံၚ် ပရေၚ်ကၟာတ်လဒဵုစၟဳစၟတ် အဆက်ဆက်ရ။
ပ္ဍဲအရာကၟာတ်လဒဵုစၟဳစၟတ်ဂှ်လေဝ် သွက်ဂွံရပ်ကေတ် သၟတ်ဒှ်သၠေဟ်ပၟာ မွဲအလန်ဓဝ်ကီု သီုသွက်ဂွံမၚ်က္လၚ်ဒၟံၚ် ပရေၚ် ဒပ် PDF တအ် ချဳဒရာၚ်ဒရာၚ် လၟိုန်အခိၚ် ဟွံပိုတ်သ္ကုတ်ကီု စၞောန်ပ္ညုၚ်လဝ်ရဂှ် ညးစုက်လုက်ကဵု ဒပ်ဗၠာဲသၟိၚ်ကံၚ်ဇြဳပၞာန်မွဲတၠ ဟီုလဝ်ရ။
သ္အာၚ်နူဂှ်ပၠန် ကောန်ဒပ်ဗၠာဲသၟိၚ် သၟဝ်တဲကံၚ်ဇြဳပၞာန်တအ်လေဝ် ဂေတ်ဂေၚ် ပ္ဍဲကဵုကွာန် အရာပ် နကဵုကယိုၚ်ညးအရာပ်တုဲ သွက်ဂွံမၚ်ရံၚ်ဂၠိုက်ဂၠာဲစၟဳစၟတ် သီုသွက်ဂွံကၠောန်သ္ပ ပရေၚ်စၟဳစၟတ်စရၚ်ကၟုဲ အရိုဟ်အရိုဟ်တ္ၚဲ စၞောန်ပ္ညုၚ်လဝ် ဗွဲတၟေၚ်ရဂှ် သြၚ်လောန်တိုၚ်မ် လ္ၚတ်ဂၠိုက်ဂၠာဲ ဂွံတီကေတ်ရ။
သ္ကိုပ်ဝန်ဇၞော်တွဵုရးဍုၚ်မန် ဥူအောၚ်ကျဳတုၚ် ကံၚ်ဇြဳပၞာန်ခါန်ကၞက်လဝ်ဂှ် ပ္ဍဲလက်ထက်ညး တွဵုရးဍုၚ်မန် ဂဵုလဟဵုတုဲ မိက်ဂွံကဵုၜိုဟ်သြိုဟ်ညိၚ်ဝတ်ဂှ်ရ ကၠောန်ဗဒှ် ပေါဲသ္ဘၚ်မိပ်မြဟ်မာန်ရဂှ် ဃောဆဵုဂဗကဵု ဂကောံပေါဲဇာတ် ပ္ဍဲဂိတုသေပ်တေမ်ဗာ တုဲကၠုၚ်တေံ ဟီုဂးလဝ်ရ။
ဂကောံဇြဟတ်ပၠန်ဂတးတအ်ဂှ် ကံၚ်ဇြဳပၞာန် ကၠောန်ဗဒှ်ပေါဲသ္ဘၚ်တုဲ ထ္ၜးကၠုၚ်ဗီုပြၚ် ဒဒှ်ရတိဍာ်ညိၚ်ဝတ်မာန်တုဲ ပ္ဍဲကဵုပေါဲသ္ဘၚ်တအ်ဂှ် ကၠောန်သ္ပကၠုၚ် ပရေၚ်ဖံက်ခတိုဟ်ဗုမ် ပါ်ဒကးဆီ အကြာ ညးဍုၚ်ကွာန်ကဵု PDF တအ်မာန်ဒၟံၚ်ဂှ်ရ သွက်ဂွံစွံသတိဗွဲတၟေၚ် ဗတိုက်ဖ္အောဝ်လဝ်ရ။
သ္အာၚ်နူဂှ်ပၠန် သ္ပတံနူရာသဳဗြဲကျာတၟး ကၠုၚ်စိုပ်ဂတဏံတုဲ ဟိုတ်နူသၠုၚ်ပ္တိုန်အာ ပရေၚ်ချဳဒရာၚ်ပၞာန် ညံၚ်တၠအဝဵုပၞာန် ဂွံဒေါံကၟိုၚ်စှ်ေဂှ်ရ နကဵုညးဍုၚ်ကွာန်တအ် သွက်ဂွံအာကၠုၚ်မံၚ်စံၚ်ကဵုသတိဗွဲတၟေၚ်ကီု သွက်ဂွံပရဟ်ဒုၚ်ပလေဝ်ပလေတ်လဝ် အရာတၚ်နွံပၟိက်ကီုဂှ်လေဝ် ဂကောံဇြဟတ်ပၠန်ဂတး ဖျေံသ္ဇိုၚ်တွဵုရးဍုၚ်မန်တအ် ကဵုသတိဗတိုက်ဖ္အောဝ်လဝ်ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai