ကလလတ ကဵုသမ္တီ ပံၚ်တောဲပါလုပ်အာ ပ္ဍဲချဳဒရာၚ်ပၞာန် ၁၀၂၇ ဏောၚ်

မတ်မလီု၊ အံက်တဝ်ဗာ (၂၉)

ပံၚ်တောဲပါလုပ်အာ ပ္ဍဲချဳဒရာၚ်ပၞာန် ၁၀၂၇ ပ္ဍဲကဵုဂကောံကောဒေံမဟာမိတ်သ္ကုတ်သၟဝ်ကျာတံဏောၚ်ဂှ် ဒပ်ပၠတရဴဗၠးၜးညးဍုၚ်ကွာန် ဂကူပံၚ်ကောံ (ကလလတ) လလောၚ်ပ္တိတ်လဝ်ပရိုၚ်ရ။

ပ္ဍဲဂိတုအံက်တဝ်ဗာ (၂၇) တေံ ဂကောံမဟာမိတ်ကောဒေံ ၃ ဂကောံ ဒပ်ပၞာန်ရခေၚ် (AA) ၊ ဂကောံကဝ်က (MNDAA) ကေုာံ ဂကောံတအာၚ် (TNLA) တံ စလဝ် ချဳဒရာၚ်ပၞာန် ၁၀၂၇ ပရေၚ်လၞိန်ဗပိန် ကံၚ်ဇြဳပၞာန် ကေုာံ ဂကောံပျဳတုသေတ်တံဂှ်ရ။

ပ္ဍဲကဵုဝိုၚ်တက်ကျာပရေၚ်ဍုၚ်ကွာန်တံသၟးဟွံက မဟာမိတ်ကောဒေံ မလုပ်ဒၟံၚ်ပေါဲဗ္တိုက် သီုပရေၚ်ဍုၚ်ကွာန်၊ ပရေၚ်ပၞာန်ညဳညဳသာသာ ပ္ဍဲဗလးတိ မထ္မံက်ထ္ၜးလဝ် ပ္ဍဲကဵုတၚ်လလောၚ်တြး မဟာမိတ်ကောဒေံပိဂကောံတံဂှ်ဝွံ တၚ်ရန်တၟံပရေၚ်ဍုၚ်ကွာန် မွဲဂကောံဂှ် ဂကောံသှ်ေသၟေဟ်တံ သ္ပစၟတ်သမ္တီတုဲ ပ္ဍဲအရာကိစ္စလဵုဟွံဟီု နကဵုစိုတ်စေတနာပြဲပြဲ မူဝါဒမရီုဗၚ်ထ္ၜဘိုက်ညးသ္ကအ် ဗွဲမသၟဟ်အစောံဂှ်ဝွံ ဂကောံဗော်သွးတၞဟ်ဟ် မဗ္တိုက်ဒၟံၚ် သၞတုပ်ပ်တံ ထေက်ကဵုဒးလ္ၚတ်ပတုပ်ဗက်ရောၚ်ဂှ် (ကလလတ) သ္ဂးလဝ်ရ။

သ္အာၚ်နူဂှ်ပၠန် သၞောဝ်သ္ဇိုၚ် ၂၀၀၈ ဂှ်ကဵု အလဵုအသဳပၞာန်−သၞောတ်တၠအဝဵုပၞာန်−ဂကောံပၞာန်တံဂှ် ဇၟာပ်ပ်မၞိဟ်နွံပၟိက် ကုကၟိန်ဍုၚ်ပံၚ်ကောံ ကေုာံ ဒဳမဝ်ကရေဇြဳ မဍာံဇေတ်တံဂှ် ဒှ်သၞသီုညးဖအိုတ် မ္ဒးဗ္တိုက်သရိုဟ်ဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ကလလတဂှ်ရ။

မုက်ပၞာန် ကလလတ မ္ဒးဆေၚ်ဒၟံၚ်မုက်တံဂှ် ဗ္တိုက်ဒပ်(စကစ) မဒှ်သၞတုပ်တံဂှ်တုဲ ပံၚ်တောဲပါလုပ်အာ ပ္ဍဲကဵုပေါဲဗ္တိုက် မိဿဟာဲတံ နူကဵုလ္ပာ်မသၟဟ်အစောံတံဂှ်တုဲ စိုတ်ဓာတ်လုပ်ပေါဲဗ္တိုက် ဂကောံကလလတ ဂှ် ကဵုဏာသမ္တီ နကဵုတၚ်လလောၚ်တြးဏံ ဗွဲမတန်ကြန်ရောၚ် ရဴဝွံ သ္ဂးလဝ်ရ။

ဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG ဂှ်လေဝ် ပံၚ်တောဲကဵု မဟာမိတ်ကောဒေံ ၃ ဂကောံတံ ဗွဲမညဳသၟဟ်တုဲ သွက်ဂွံထ္မံက်ရုပ်ရဴ ချဳဒရာၚ်ပၞာန် ၁၀၂၇ ကဵု သၟဟ်ညဳချဳဒရာၚ်ပၞာန်တံဂှ် လလောၚ်တြးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−ကလလတ