ၜါသွာၚ်၊ အံက်တဝ်ဗာ (၂၉)
အမိၚ်တိတ်ဗ္တံဟွံဂွံ ကံၚ်ဇြဳပၞာန် မလလောၚ်ပ္တိတ်လဝ် အပ္ဍဲပွိုၚ်ဍုၚ်ၜါသွာၚ်၊ တွဵုရးဍုၚ်မန်ဂှ် စနူဂိတုအံက်တဝ်ဗာ ၂၇ တေံတုဲ ကလေၚ်ရုပ်သီလဝ်ဂှ် ဂွံတီကေတ် ဇရေၚ်ညးဒေသတံရ။
ကံၚ်ဇြဳပၞာန်ဝွံ အပ္ဍဲကာလသီအဝဵုဏံ နကဵုဟိုတ်ပရေၚ်ဂီုကၠီုတိဍာ်ဂှ် နူကဵုဗ္တံ ၁၂ နာဍဳ စဵုကဵု ဂယး ၄ နာဍဳဂှ် လလောၚ်ပ္တိတ်လဝ် ၝောံပိုဒ် ၁၄၄ အမိၚ်တိတ်ဗ္တံဟွံဂွံ ပွိုၚ်ဍုၚ်ၜါသွာၚ်ရ။
အမိၚ်တိတ်ဗ္တံဟွံဂွံဏံဂှ် စနူဂိတုအံက်တဝ်ဗာ ၂၇ တေံတုဲ ဒဒှ်ရကလေၚ်ရုပ်သီလဝ်ဂှ် နူကဵုဌာနက္ဍိုက်ပ် ပရေၚ်အုပ်ဓုပ်ကာနာနာ ပွိုၚ်ဍုၚ်ၜါသွာၚ် ကံၚ်ဇြဳပၞာန် လလောၚ်ပ္တိတ်ကဵုလဝ်သမ္တီရ။
ကလေၚ်ရုပ်သီထောံလဝ် အမိၚ်တိတ်ဗ္တံဟွံဂွံဂှ် ၜိုန်ရပြေပြံၚ်ဒၟံၚ်ကီုလေဝ် ပ္ဍဲကဵုဍုၚ်မတ်မလီု ပွိုၚ်ဍုၚ်မဆက်ဒၟံၚ်ဂှ် ဒၟါနူအမိၚ်တိတ်ဗ္တံဟွံဂွံဂှ် ဆက်နွံဒၟံၚ်ဂှ်ရ သွက်ကိစ္စပရေၚ်ထတ်ယုက်တံဂှ် အခက်အခုဲနွံဒၟံၚ်ဏီဖိုဟ်ရောၚ် ညးဒေသတံ ဟီုဂးလဝ်ရ။
ပွိုၚ်ဍုၚ်ၜါသွာၚ်ဝွံ အပ္ဍဲကာလသီအဝဵု ပွိုၚ်မွဲသၞာံဘာ်ပြၚ်ဏံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးရပ်လွဟ်တံဂှ် ပရေၚ်ပန်ပှော်ညးသ္ကအ် နွံဒၟံၚ်ကီုလေဝ် ဗွဲကြဴဏံ ပရေၚ်ချဳဒရာၚ် ဂကောံဇြဟတ်ပၠန်ဂတးတံ စဵုကဵုဟွံမွဲ အောန်စှ်ေအာရ။
ကံၚ်ဇြဳပၞာန်ဝွံ ရုပ်သီလဝ် အမိၚ်တိတ်ဗ္တံဟွံဂွံ ပွိုၚ်ဍုၚ်ၜါသွာၚ် တွဵုရးဍုၚ်မန်မွဲဓဝ်ရတုဲ ပွိုၚ်ဍုၚ်သှ်ေဂမၠိုၚ် ပွိုၚ်ဍုၚ်မုဟ်ဍုၚ်၊ ဇြပ်ဗု၊ သဓီု၊ ပွိုၚ်ဍုၚ်ပံၚ်တံဂှ် နူကဵုအခိၚ်ဗ္တံ ၁၂ နာဍဳ စဵုကဵု ၄ နာဍဳဂှ် ပြံၚ်လှာဲစၟတ်သမ္တီလဝ်အခိၚ်ရ။
ဆ္ဂး ဍုၚ်မတ်မလီု ဍုၚ်ဇၞော်တွဵုရးဍုၚ်မန်ဂှ် ပြံၚ်လှာဲစၟတ်သမ္တီလဝ်အခိၚ်ဟွံမွဲတုဲ အမိၚ်တိတ်ဗ္တံဟွံဂွံ နူ ၁၂ နာဍဳ စဵုကဵု ၄ နာဍဳ မလလောၚ်ပ္တိတ်လဝ် ကၠာတေံဂှ် ဆက်တန်ကြန်ဒၟံၚ်ဖိုဟ်ရ။
မ္ၚးနူကဵုပွိုၚ်ဍုၚ်ကျာ်ထဝ်ကဵု ပွိုၚ်ဍုၚ်ၜဳကလေၚ် ပေါဲဗ္တိုက်ဒှ်ဒၟံၚ်မွဲဏှမွဲဏှတံဂှ် ပ္ဍဲပွိုၚ်ဍုၚ်ရေဝ် မလလောၚ်ပ္တိတ်လဝ် ပရေၚ်အုပ်ဓုပ်ပၞာန်ဂှ် ပြံၚ်လှာဲစၟတ်သမ္တီလဝ်အခိၚ်တိတ်ဗ္တံဂှ် ဟွံမွဲရ။
ပရိုၚ်−သြၚ်လောန်တိုၚ်(မ်)
ဗီု−TLT
sanlontai