မတ်မလီု – အံက်တဝ်ဗာ(၃၁)
ရုၚ်ဂအုပ်ဌာန်ပရိုၚ် Development Media Group (DMG) ဖျေံသ္ဇိုၚ်သေတ်တွေ၊ တွဵုရးရခေၚ်ဂှ် ဒပ်ကံၚ်ဇြဳပၞာန် လုပ်စိုပ်စၟဳစၟတ်တုဲ ဟိုတ်နူရပ်ကေတ်ဏာလဝ် သၟာပရိုၚ် (၁) တၠကဵု ညးမၚ်ရုၚ် (၁) တၠဂှ်ရ ပျုတ်ဗ္ဒေက်အာ သ္ကာတ်တ်မြဟ်ဟ်ရဂှ် DMG လလောၚ်တြးလဝ် ပရိုၚ်ရ။
ပ္ဍဲဂိတုအံက်တဝ်ဗာ စၟတ်တ္ၚဲ (၂၉) အခိၚ်ဒေါဝ်တ္ၚဲဂှ် စပိမ သၟဝ်တဲကံၚ်ဇြဳပၞာန်၊ ဒပ်ပရိုၚ်တၟေၚ် SB ၊ ဒပ်ဗၠာဲသၟိၚ် ကေုာံ ကောန်ဒပ်ကံၚ်ဇြဳပၞာန် ပါလုပ် (၂၀) လုပ်ကၠုၚ်ကဵုကွဳစက် (၃)ဖ္ဍိုက်တုဲ ရပ်ကေတ်ဏာလဝ်ရ။
ဃောလုပ်စိုပ်ရပ်ကေတ် ပ္ဍဲဌာန်ပရိုၚ်ဂှ် သီကေတ်ဏာလဝ် ကေမ္မရာသုၚ်စောဲရုၚ် သီုကောန်ပျူတာတအ်တုဲ ဗ္ဒမ်ရုၚ်ဌာန်ပရိုၚ်ဂှ်လေဝ် ကၟာတ်ဒၞာဏာလဝ်ရဂှ် ဟီုလဝ်ရ။
အခိၚ်လၟုဟ်ဏံ သၟာပရိုၚ်ကေုာံ ညးမၚ်ရုၚ် ဒပ်ကံၚ်ဇြဳပၞာန် ရပ်ကေတ်ဏာလဝ်တအ်ဂှ် ရပ်စွံလဝ် ပ္ဍဲဗဒိုပ်ဗၠာဲသၟိၚ် စၟတ် (၁) ဍုၚ်သေတ်တွေတုဲ ကေတ်အာအရေဝ် နကဵုၝောံပိုဒ်လဵုရော ဟွံဂွံတီကေတ်ဏီရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ဌာန်ပရိုၚ် DMG ရ။
ကြဴဴနူဒပ်ပၞာန်သီအဝဵုတုဲ ကၟာတ်လဝ်လိုၚ်ဇြေန် ဌာန်ပရိုၚ် (၁၅) ဌာန ပါလုပ်သီု DVB၊ မဇ္ဈိမ၊ Myanmar Now၊ ခေတ်တေတ်၊ ဨရာဝတဳတိုၚ်၊ တိုက်တြးလိက် ပန်တိုက် ကေုာံ တိုက်ပ္ဍဵုဗီုလိက် ၜါတိုက်ရ။
သ္အာၚ်နူဂှ်ပၠန် သၟာပရိုၚ် (၁၅၆) တၠလေဝ် ဒးဒုၚ်ရပ်လဝ်တုဲ ပ္ဍဲကဵုဂှ် ၜိုန်ရကလေၚ်ဗၠးတိတ်ကၠုၚ်လဝ် (၁၀၅) တၠကီုလေဝ် ဗ္ဒာဲ (၅၀) တၠ ဒးဆက်ဒုၚ်ဒၟံၚ်ဒဏ်ထံၚ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံဗၠးၜးတအ်ရ။
ပရိုၚ် – သြၚ်လောန်တိုၚ်မ်
ဗီု – နိရဥ္စရာ
sanlontai