သဓီု၊ အံက်တဝ်ဗာ (၃၁)
တွဵုရးဍုၚ်မန်၊ ပွိုၚ်ဍုၚ်သဓီု၊ သ္ၚိဒၟံၚ်ညးဒေသ မၞုံကွာန်ဒူရေန်ဇြုက် (၂) မဂှ် နူကဵုဂကောံကံၚ်ဇြဳပၞာန် ကၠုၚ်ကၟာတ်ဒၞာလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၂၉) တ္ၚဲတုဲကၠုၚ်တေံရဂှ် ဂွံတီကေတ် နူညးဒေသတအ်ရ။
ဒပ်ဗၠာဲသၟိၚ်ဍုၚ်တၟိသုဓမ္မဝတဳ ကံၚ်ဇြဳပၞာန်ကဵု ဂကောံအုပ်ဓုပ်ကွာန်ဒူရေန်ဇြုက်ဂှ် ပ္ဍဲတ္ၚဲတုဲကၠုၚ်ဏံ အခိၚ်နူဂယး ၜိုတ် (၁၀) နာဍဳဂှ် ကၠုၚ်ကၟာတ်ဒၞာလဝ် သ္ၚိဒၟံၚ် မၞုံအရာပ် စၟတ်(၂) ကဵုစၟတ်(၃) ကွာန်ဒူရေန်ဇြုက် (၂)မရ။
ကံၚ်ဇြဳပၞာန်ဂှ်မ္ဂး နကဵုတၚ်စောတ်စောဲ မမေတေန်ကျာန်၊ ကိုဝ်ဝေန်ဒူအောၚ်၊ ကိုဝ်နေလေန်ဥူ၊ ကိုဝ်ယာန်လေန်အောၚ် ကေုာံ ကိုဝ်အေလှာၚ် ဒၟံၚ်ကွာန်ဒူရေန်ဇြုက်တအ်ဂှ် ဒှ်ကောန်ဒုဟ်ပ္ကီုပရာပ်တုဲ ကၠုၚ်ကၟာတ်ဒၞာလဝ် သ္ၚိဒၟံၚ်တအ်ဂှ်ရ။
အတိုၚ်ညးဒေသတအ် ဟီုလဝ်မ္ဂး သ္ၚိဒၟံၚ်ကံၚ်ဇြဳပၞာန် ကၠုၚ်ကၟာတ်ဒၞာလဝ်တအ်ဂှ် ကြဴဴနူဒပ်ပၞာန်သီအဝဵုတုဲ မၞိဟ်မံၚ်ဟၟဲရဂှ် ဟီုလဝ်ရ။
သွက်ဂွံသၟာန်သၟုက် ညးဒေသဒးဒုၚ်ကၟာတ်ဒၞာလဝ်သ္ၚိဒၟံၚ်တအ်ဂှ် ၜိုန်ရသြၚ်လောန်တိုၚ်မ် ဂ္စာန်ပ္တိတ်လဝ်ဇြဟတ်ကီုလေဝ် စဵုကဵုအခိၚ်လၟုဟ် ကေတ်အဆက်ဟွံဂွံဏီရ။
ပွိုၚ်ဍုၚ်သဓီု ပ္ဍဲမွဲကာလဒပ်ပၞာန်သီအဝဵုဏံ နကဵုတၚ်ထ္ၜးဟိုတ် ဂဗုတ်ပ္ကီုပရာပ်တုဲ ဒပ်ကံၚ်ဇြဳပၞာန် ကၟာတ်ဒၞာလဝ် သ္ၚိဒၟံၚ်ညးဒေသတအ် ဟွံအောန်နူ (၂၀)မ ပါလုပ်သီုညးစၞးကၠတ်ထဝ်တအ်ရ။
အတိုၚ်ဂကောံရီုဗၚ်မၚ်မွဲကောန်ထံၚ်ပရေၚ်ဍုၚ်ကွာန် (AAPP ) ဟီုလဝ်မ္ဂး ပ္ဍဲမွဲကာလဒပ်ပၞာန်သီအဝဵုဏံ အလုံမွဲကၟိန်ဍုၚ် သ္ၚိဒၟံၚ် ဟွံအောန်နူ ၈၀၀ ဒးဒုၚ်ကၟာတ်ဒၞာလဝ်ရဂှ် လလောၚ်တြးပ္တိတ်လဝ် ပ္ဍဲဂိတုဨဗြဴ သတ္တာဟလကြဴအိုတ် ပ္ဍဲကဵုသၞာံဏံရ။
ပရိုၚ် – သြၚ်လောန်တိုၚ်မ်
ဗီု – SBM
sanlontai