ဍာ်ဗု၊ အံက်တဝ်ဗာ (၃၁)
ပ္ဍဲဒေသနဗုလေဝ်၊ ပွိုၚ်ဍုၚ်ဍာ်ဗု၊ ရးဒေသဇၞော်တၞၚ်သဳဂှ် ဒပ်ကံၚ်ဇြဳပၞာန် စံၚ်ပလီုပလာ်လဝ် သ္ၚိဒၟံၚ်ညးဒေသတံတုဲ မကလေၚ်တိတ်ကၠုၚ်တံဂှ် ကြတ်ဗ္တိုက်လဝ်အကြာရောၚ် တမ်ဒပ် စၟတ် (၁) ခရိုၚ်ထဝါဲ လလောၚ်ပ္တိတ်လဝ်ပရိုၚ်ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ၜိုတ် (၅၀) ပြၚ် စံၚ်ပလီုပလာ်လဝ် သ္ၚိဒၟံၚ်ညးဒေသတံတုဲ မကလေၚ်တိတ်ကၠုၚ်တံဂှ် တုဲကၠုၚ်ပ္ဍဲဂိတုအံက်တဝ်ဗာ (၂၆) အခိၚ်ဗ္တံ ၜိုတ် (၉) နာဍဳကဝိုက်တေံဂှ် ကြတ်ဗ္တိုက်လဝ် ဗ္ဒါဲကွာန်ယာန်ကေန်ရ။
ဟိုတ်နူဒးဒုၚ်ကြတ်ဗ္တိုက်လဝ်ဂှ်ရ ကွဳစက်မွဲဖ္ဍိုက် လီုလာ်အာလဝ်တုဲ ကောန်ဒပ်ကံၚ်ဇြဳပၞာန် ၁၆ တၠ ချိုတ်တုဲ ၁၀ တၠဟွံအောန် ဇီုကပိုက်ကလိဂွံလဝ်ဝပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ညးဒုၚ်တာလျိုၚ် ဂကောံဒပ်ဒမၠုက်နဂါနဳ မပါလုပ်လဝ် ပ္ဍဲချဳဒရာၚ်ပံၚ်တောဲဂှ် ဂွံပရိုၚ်တုဲ ဒစးဒုၚ်မၚ်ဒၟံၚ် ဒပ်ကံၚ်ဇြဳပၞာန်ဂှ်တုဲ ဗ္တိုက်လဝ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် ပ္ဍဲဒေသနဗုလေဝ်ဂှ်ဝွံ အပ္ဍဲကာလပွိုၚ်မွဲသတ္တာဟပြၚ်ဂှ် စံၚ်ပလီုပလာ်ဏာလဝ် သ္ၚိဒၟံၚ်ညးဍုၚ်ကွာန် ဟွံအောန်နူကဵု ၂၄ မတုဲ ရပ်ဒက်ဂစိုတ်ဏာလဝ် ညးဒေသ ၄ တၠဂှ်လေဝ် ဂွံတီကေတ် အတိုၚ်ဂလာန်ညးဒေသတံရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ညးဒေသဂၠိုၚ်ကဵုလ္ၚီ နူကဵုကွာန်ယာန်ကေန်၊ ဨကနိ၊ ခမံက်ချံၚ်၊ ရလိုၚ်၊ ကုန်သာယာ၊ မူဒူ၊ လေဝ်ယှံၚ်၊ ပရဒါတ်၊ ဝက်ချံၚ်၊ ပဂဝ်ဇြောန်တံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
တုဲကၠုၚ် ပ္ဍဲဂိတုအံက်တဝ်ဗာ ၁၉ တေံဂှ်လေဝ် ဒပ်ကံၚ်ဇြဳပၞာန် မလုပ်စိုပ်ထ္ပက်ကၠုၚ်ကရောၚ်ပၞာန် လ္ပာ်သ္ကုတ်ပလိုတ် ပွိုၚ်ဍုၚ်ဍာ်ဗုဂှ်ကဵု ဒပ်ပံၚ်တောဲစဵုဒၞါညးဍုၚ်ကွာန်တံဂှ် ပေါဲဗ္တိုက်ၜါလ္ပာ် က္တဵုဒှ်လဝ်ဏီရ။
ပရိုၚ်−သြၚ်လောန်တိုၚ်(မ်)
ဗီု−PDF
လိက်စၞောန်သွက်ဗီု− ကၞောတ်သၞာံတုဲကၠုၚ်တေံ အခိၚ်ရေၚ်ကွဳစက်ကံၚ်ဇြဳပၞာန် ဒးဒုၚ်ကြတ်ဗ္တိုက် ပ္ဍဲပွိုၚ်ဍုၚ်ကျာ်ထဝ် တွဵုရးဍုၚ်မန်။
sanlontai