နယူယံက် – နဝ်ဝေမ်ဗာ (၁၀)
အမာတ်ကလုတ် ဥူကျဝ်မိုဝ်ထောန် ညးစၞးဒ္တန်ကၟိန်ဍုၚ်ဗၟာကုသမဂ္ဂဂှ် ညံၚ်သၞောတ်တၠအဝဵုပၞာန်ကဵု ပြဝကြမ်ကြဓဇန်ကြာန်တအ် ဂွံပၠိုတ်အိုတ်အာဂှ် နကဵုကၟိန်ဍုၚ်လုပ်ဂကောံ ကုလသမဂ္ဂတအ် သွက်ဂွံပံၚ်တောဲရေၚ်တၠုၚ်အာ ကရောံအလဵုအသဳညဳသၟဟ်ကောန်ဂကူ (NUG) မွဲစွံဂှ် ဗတိုက်ဖ္အောဝ်လဝ်ရ။
ပ္ဍဲကဵုကောံဓရီုဆေၚ်မုက် ကာနာနာကုလသမဂ္ဂ မရနုက်ကဵု (၇၈)ဝါ ကၠောန်ဗဒှ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၈) ဂှ် အမာတ်ကလုတ်ဥူကျဝ်မိုဝ်ထောန် သ္ပစၞးကဵုကၟိန်ဍုၚ်ဗၟာ တိုန်စိုပ်လဝ်တုဲ ဟီုဂးလဝ် ပ္ဍဲကဵုအခိၚ်သဳကၠဳဒၟံၚ် ကာနာနာ စပ်ကဵု “လိက်ဒုၚ်စဳရေၚ် ရုၚ်သၞောဝ်ဓဝ်ကၟိန်ဍုၚ်နာနာ” ဆေၚ်စပ်ကဵု ကၟိန်ဍုၚ်ဗၟာရ။
ပ္ဍဲကဵုကောံဓရီုကာနာနာကုလသမဂ္ဂ မရနုက်ကဵု (၇၈) ဝါ ကၠောန်ဗဒှ်ဒၟံၚ် ပ္ဍဲဍုၚ်နယူယံက်၊ ကၟိန်ဍုၚ်အမေရိကာန်ဂှ် ကၠောန်ဗဒှ်အာ ကောံဓရီုဆေၚ်မုက် မရနုက်ကဵု (၂၀)၊ (၂၇)ကေုာံ (၂၈) ပါ်လဝ် (၃)တ္ၚဲ တုဲ သဳကၠဳလဝ် “လိက်ဒုၚ်စဳရေၚ် ဆေၚ်ကဵုရုၚ်သၞောဝ်ဓဝ်ကၟိန်ဍုၚ်နာနာ” ရ။
ဥူကျဝ်မိုဝ်ထောန်ဂှ် စပ်ကဵုလိက်ဒုၚ်စဳရေၚ် ရုၚ်သၞေဝ်ဓဝ်ကၟိန်ဍုၚ်နာနာ ဆေၚ်ကဵုကၟိန်ဍုၚ်ဗမာ ပ္ဍဲကုလသမဂ္ဂဂှ်တုဲ ဒ္ဂေတ်ဗက်ရေၚ်တၠုၚ်လဝ် အတိုၚ်ကဵုလဝ်ကတိ တၚ်ပျးဌာန် ပါလုပ်ပ္ဍဲပဋိဉာဏ်လိက်စံၚ်ကုလသမဂ္ဂတုဲ တၚ်ရေၚ်တၠုၚ်ကေတ်အရေဝ်တအ်ဂှ် ပိုၚ်ခြာ ဖျေံအာ ဗွဲမဂတာပ်အခိၚ်ဟေၚ် ဂွံဓမံက်အာရုပ်ရဴဴ ဓဝ်ၜိုဟ်လလံမာန်ရောၚ်ဂှ် ဟီုသ္ဂးလဝ်ရ။
သွက်ဂွံကလေၚ်ပၠုပ်လမျီုကတိကဝတ်တအ်ကီု၊ သွက်သၞောတ်တၠအဝဵုပၞာန် ကဵုကမၠောန်ပြဝကြံကြဓဇန်ကြာန် ကံၚ်ဇြဳပၞာန် ဂွံအိုတ်အာကီု သီုကဵုသွက်ဂွံစဵုဒၞာကဵု ဂကောံဗွဝ်ဇီုကပိုက်ဒးလောဲသွာတအ်ကီု သွက်ဂွံပံၚ်တောဲရေၚ်တၠုၚ်အာ မွဲကရောံမွဲစွံဂှ် ဗတိုက်ဖ္အောဝ်လဝ်တုဲ မိက်ဂွံကဵုကၠောန်ရေၚ်တၠုၚ် ပရေၚ်ကေတ်အရေဝ် ကုဒပ်ပၞာန်ဗွဲမစိုပ်တရဴရဂှ် ဥူကျဝ်မိုဝ်ထောန် ဟီုသ္ဂးရ။
တၚ်ဒုၚ်စဳရေၚ်ရုၚ်သၞောဝ်ဓဝ် ပ္ဍဲလ္တူဂဗုတ် ဍုၚ်ဂါမ်ဗဳယာ စောဲလဝ်ကၟိန်ဍုၚ်ဗၟာ ပ္ဍဲရုၚ်သၞောဝ်ဓဝ်ကၟိန်ဍုၚ်နာနာဂှ် နကဵုအလဵုအသဳညဳသၟဟ်ကောန်ဂကူ ဒဒှ်ရဒုၚ်လဝ်တဲ လလောၚ်တြးလဝ်တုဲရဂှ်လေဝ် ညးဟီုလဝ်ဏီရ။
သ္အာၚ်နူဂှ်ပၠန် ဒပ်ပၞာန်ဂှ် ဒစဵုဒစးဒၟံၚ်ကဵု အပိုၚ်ခြာဗၞတ်ဗ္ၜတ်သၞောဝ်ဥပဒေကၟိန်ဍုၚ်နာနာတုဲ ဟွံသ္ပဇြိုဟ်နက်ကဵု လမျီုမၞိဟ် ကၠောန်ရေၚ်တၠုၚ်ဒၟံၚ် ပရေၚ်ပြိုက်ဂစိုတ် အတိုၚ်ပၟိက်စိုတ်တုဲ က္လိလောန်ဒၟံၚ် ဒုဟ်ရာဇဝတ် သီုကဵု ဒုဟ်ရာဇဝတ်ပၞာန် လ္တူညးဍုၚ်ကွာန်ကောန်ကၟိန်ဍုၚ်ဗၟာ၊ လ္တူကောန်ဂကူတအ်ရဂှ် ဟီုလဝ်ရ။
နကဵုရုၚ်သၞောဝ်ဓဝ်ကၟိန်ဍုၚ်နာနာ ကဵုလဝ်အခေါၚ်စၟဳစၟတ်ဒပ်ပၞာန်တုဲ နူဥူကျဝ်မိုဝ်ထောန် မဒှ်ညးစၞးကၟိန်ဍုၚ်ဗမာဒ္တန် ဆေၚ်ကဵုကုလသမဂ္ဂဂှ် သွက်ဂွံရေၚ်တၠုၚ်ကဵု ပရေၚ်ကေတ်အရေဝ် လိက်ပလံၚ်ဗစိုပ်လဝ် ဇရေၚ်သၞာဲဒဴရုၚ်သၞောဝ်ဓဝ် ကေုာံ ဗီုသၞာဲအခေါၚ်စၟတ်သမ္တီတအ်ဂှ် ဟိုတ်နူလုတ်ဒကုတ်လဝ်ဂှ်ရ ဒးဗတိုက်ဖ္အောဝ်လဝ်သွက်ဂွံရပ်စပ် ကိစ္စဏံပၠန်ရဂှ် ဟီုသ္ဂးလဝ်ရ။
ပရိုၚ် – သြၚ်လောန်တိုၚ်မ်
ဗီု – ရုၚ်ညးစၞးကၟိန်ဍုၚ်ဗၟာ ကုလသမဂ္ဂ
sanlontai