ဒပ်ကံၚ်ဇြဳပၞာန် ဒးဒုၚ်ကၟာတ်လဒဵုဗ္တိုက် ပ္ဍဲဘာပန်တုဲ ၁၁ တၠ ချိုတ်အာ

ဘာပန်၊ နဝ်ဝေမ်ဗာ ၂၉

ဒပ်ကံၚ်ဇြဳပၞာန် ဂြိပ်တိတ်ကၠုၚ် နူကဵုဗ္ဒိုပ်မထဝ် ခရိုၚ်ဘာပန် တွဵုရးကရေၚ်ဂှ်ကဵု ဒပ်ကံၚ်ဇြဳပၞာန် ကၠုၚ်ကဵုပၞာန်ရီု နူကမမံၚ်တံ ဒးဒုၚ်ကၟာတ်လဒဵုဗ္တိုက်ဒၟံၚ်တုဲ ကောန်ဒပ်ကံၚ်ဇြဳပၞာန် ၁၁ တၠ ချိုတ်အာလဝ်ရောၚ် ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော် သဝ်ကလာဒိုဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုနဝ်ဝေမ်ဗာ ၂၂ တေံ ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ပံၚ်ကောံမဟာမိတ်တံ ဗ္တိုက်သီဂွံလဝ် ဗ္ဒိုပ်ကံၚ်ဇြဳပၞာန် မဖျေံလဝ်သ္ဇိုၚ်ပ္ဍဲကွာန်မထဝ်ဂှ်တုဲ ဒပ်ကံၚ်ဇြဳပၞာန် ဂြိပ်တိတ်အာလဝ် လ္ပာ်ဗ္ဒိုပ်ဒဵုပိမ နွံသၟဝ်ဗ္ဒိုပ်မထဝ်ဂှ်ရ။

ဒပ်ကံၚ်ဇြဳပၞာန် နူဗ္ဒိုပ်မထဝ် မဂြိပ်တိတ်အာလဝ် လ္ပာ်ဗ္ဒိုပ်ဒဵုပိမဂှ် ပ္ဍဲဂိတုနဝ်ဝေမ်ဗာ ၂၃ တေံ ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ကြတ်ဗ္တိုက်လဝ်တုဲ သီဂွံလဝ် မကမ်လွဟ်လက်နက်ဗွဲမဂၠိုၚ်တုဲ ကောန်ဒပ်ကံၚ်ဇြဳပၞာန် ၁၀ တၠ ဒးပြဟ်လလုဲအာလဝ်ရောၚ် လ္ပာ်ဒပ်မဟာ ၅ လလောၚ်ပ္တိတ်ကဵုလဝ်သမ္တီရ။

ပ္ဍဲဂိတုနဝ်ဝေမ်ဗာ ၂၇ တေံဂှ်လေဝ် ဒပ်ပံၚ်ကောံပၠန်ဂတးတံ ကြတ်ဗ္တိုက်လဝ် ဒပ်ကံၚ်ဇြဳပၞာန် မဂြိတ်တိတ်ကၠုၚ် နူကဵုဗ္ဒိုပ်မထဝ်တံဂှ်တုဲ သှ်ေဒၟံၚ် ဇွကောန်ဒပ်ကံၚ်ဇြဳပၞာန်တံ ၅ ရောၚ် ညးမၞုံအခေါၚ်ဟီုဂး ဒပ်မဟာ ၅ သ္ကိုပ်ဗိုလ်ဇၞော်သဝ်ကလာဒိုဝ် သ္ဂးရ။

ဗ္ဒိုပ်ကံၚ်ဇြဳပၞာန်ပိ ပါလုပ်သီုကဵုဗ္ဒိုပ်ကူသုက်၊ ဗ္ဒိုပ်မထဝ်တံ မခြာဒၟံၚ်ကဵုဍုၚ်ဘာပန် ဗၞတ် ၁၀ မိုၚ်ဂှ် အပ္ဍဲဂိတုအံက်တဝ်ဗာကြပ်အိုတ်ကဵု အပ္ဍဲဂိတုနဝ်ဝေမ်ဗာတံဂှ် ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ဗ္တိုက်သီဂွံလဝ်ဒတုဲတုဲ နူကဵုဍုၚ်ကမမံၚ်ဂှ်မွဲကဆံၚ် ဒပ်ကံၚ်ဇြဳပၞာန် ပလံၚ်ဗစိုပ်လဝ် ပၞာန်ရီု ကုဗ္ဒိုပ်ဒဵုပိမ၊ ဗ္ဒိုပ်ကတိုၚ်တိတံဂှ်ရ။

ဒပ်ပံၚ်ကောံပၠန်ဂတးတံ ကြတ်ဗ္တိုက်လဝ် ကရောၚ်ပၞာန်ကံၚ်ဇြဳပၞာန် မကၠုၚ်ကဵုပၞာန်ရီု တိုန်ကၠုၚ် နူကဵုကမမံၚ်ဂှ်တုဲ လ္ပာ်ကံၚ်ဇြဳပၞာန် အောန်အိုတ် ၆ တၠ ချိုတ်အာလဝ်တုဲ အခိၚ်လၟုဟ်ဂှ်တှ်ေ ကရောၚ်ပၞာန်ကံၚ်ဇြဳပၞာန်ဝွံ စိုပ်ဒၟံၚ်လ္ပာ်ကွာန် (ဘောကြိုလယ်) ရ။

ဗ္ဒိုပ်ဒဵုပိမ ဒပ်ကံၚ်ဇြဳပၞာန်ဂှ်ဝွံ နွံဒၟံၚ် လ္တူဂၠံၚ်ကွဳစက် ဘာပန်−ကတိုၚ်တိ−ကမမံၚ်တံဂှ်တုဲ နူကဵုဗျူဟာကံၚ်ဇြဳပၞာန် ဖျေံသ္ဇိုၚ်ကမမံၚ်တံဂှ်မွဲကဆံၚ် သွက်ဂွံပလံၚ်ပၞာန်ရီု ဇရေၚ်ဗ္ဒိုပ်ဒပ်တံမာန်ဂှ် ဒပ်ကံၚ်ဇြဳပၞာန် ပ္တိတ်ဇြဟတ်ကၠောန်ဒၟံၚ်ရ။

မွဲလ္ပာ်ဂှ်ပၠန် ဒပ်ပံၚ်ကောံ ဂကောံဇြဟတ်ပၠန်ဂတးတံဝွံ ဗိုၚ်လဝ် ကုန်ဗျူဟာပၞာန် ဖျေံသ္ဇိုၚ်ဘာပန်ဂှ်ဖိုဟ်တုဲ ညံၚ်ဗ္ဒိုပ်ဟွံဂွံစှ်ေအာဂှ် ကံၚ်ဇြဳပၞာန် တဝ်စၞေဟ်ဒၟံၚ် နကဵုပၞာန်ကျာ ဗွဲမသ္ကာတ်မြဟ်ရ။

ပရိုၚ်−သြၚ်လောန်တိုၚ်(မ်)

ဗီု−KNU