ဗြဝတဳ၊ အံက်တဝ်ဗာ ၃၀
တွဵုရးကရေၚ် ပ္ဍဲဂၠံၚ်ဇၞော်အာယှ ဗြဝတဳ−ကအ်ကြိက်ကဵု ဂၠံၚ်ဒဵုဒဝ်ဏတြေံတံဂှ် အကြာဒပ်ပံၚ်ကောံ ဂကောံဇြဟတ်ပၠန်ဂတး KNLA PDF တံကဵု ဒပ်ကံၚ်ဇြဳပၞာန်တံ ပေါဲဗ္တိုက်ၜါလ္ပာ် သာသ္ကာတ်မြဟ်ကၠုၚ်ဂှ် ဂွံတီကေတ် ဇရေၚ်တမ်ရိုဟ်ပရိုၚ်ဒေသတံရ။
လ္တူဂၠံၚ်ဇၞော်အာယှ ဗြဝတဳ−ကအ်ကြိက်ကဵု ဗ္ဒါဲဍုၚ်ကအ်ကြိက် ဂၠံၚ်ဒဵုဒဝ်ဏတြေံ မွဲဒမြိပ်ကွာန် ( ရန်ကုတ်) ဂှ် အကြာကရောၚ်ပၞာန်ပံၚ်ကောံ ဒပ်ကံၚ်ဇြဳပၞာန် ကရောၚ်ပၞာန်အံၚ်ဇေယျဂှ်ကဵု ဒပ်ပံၚ်ကောံ ဂကောံဇြဟတ်ပၠန်ဂတး KNLA PDF တံဂှ် ဂိတုဏံ ပ္ဍဲဂိတုအံက်တဝ်ဗာ ၜိုတ်သတ္တာဟတတိယကြပ်အိုတ်ဂှ် ပေါဲဗ္တိုက်ၜါလ္ပာ်တံ သ္ကာတ်မြဟ်ကၠုၚ်ဒၟံၚ် အဆက်က်ရ။
ပ္ဍဲဂိတုအံက်တဝ်ဗာ ၁၇ တေံ ဒပ်ပံၚ်ကောံဇြဟတ်ပၠန်ဂတး KNLA PDF တံ လုပ်သီဗ္တိုက်လဝ် ကုန်အမၠံက်(စွယ်တော်) ဒပ်ကံၚ်ဇြဳပၞာန် နွံဗ္ဒါဲဍုၚ်လေဝ်ကေကဝ်တၟိဂှ်တုဲဂှ် ဒၞါဲပွဳပွူဗ္ဒါဲဍုၚ်ကအ်ကြိက်တံကဵု လ္ပာ်ဂၠံၚ်ဇၞော်အာယှတံဂှ် ပေါဲဗ္တိုက်တံ သာသ္ကာတ်မြဟ်ကၠုၚ်ရ။
ပ္ဍဲဂိတုအံက်တဝ်ဗာ ၂၇ တေံ အပ္ဍဲပေါဲဗ္တိုက် မက္တဵုဒှ်လဝ် ဗ္ဒါဲဍုၚ်ကအ်ကြိက်ဂှ် လွဟ်ဇၞော် ၃ မ ဒတုံဗ္တိုဟ်ထ္ကးအာလဝ် ပ္ဍဲအရာပ်စၟတ် (၇) ဍုၚ်ကအ်ကြိက်ဂှ်တုဲ ကောန်ၚာ်သၟတ်မွဲတၠ မပါလုပ် ကောန်အရာပ် ၃ တၠ ဇီုကပိုက်ကလိဂွံလဝ်ဝပ်ရောၚ် ညးဒေသတံ ဟီုရ။
အတိုၚ်တၚ်လလောၚ်တြး ဌာနလလောၚ်ပရိုၚ် ဒေသပၞာန်သ္ကုတ်သၠုၚ်ကျာ ဒပ်ပၞာန်စဵုဒၞါညးဍုၚ်ကွာန် PDF တံဂှ်မ္ဂး ပ္ဍဲဂိတုအံက်တဝ်ဗာ ၂၆ တေံ ပ္ဍဲကဵုဒၞါဲဂၠံၚ်ဇၞော်အာယှမွဲဒၞါဲဂှ် အကြာကရောၚ်ပၞာန်အံၚ်ဇေယျကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတး KNLA PDF တံ ပေါဲဗ္တိုက်က္တဵုဒှ်လဝ်တုဲ နူကဵုဒပ်ကံၚ်ဇြဳပၞာန်တံဂှ် သီဂွံလဝ် မကမ်လွဟ်ဇၞော် ကေုာံ ပလောံခြပ်တံဂှ် ဂွံတီကေတ်ရ။
အပ္ဍဲပေါဲဗ္တိုက်ဂှ် လ္ပာ်ဒပ်ပံၚ်ကောံတံ ကောန်သ္ဂံၚ် ၃ တၠ ကလိဂွံလဝ်ဝပ်ရောၚ် ကဵုလဝ်သမ္တီရ။
အပ္ဍဲပေါဲဗ္တိုက် လ္တူဂၠံၚ်ဇၞော်အာယှ ကဵု ဂၠံၚ်ဒဵုဒဝ်ဏတြေံ ဗ္ဒါဲဍုၚ်ကအ်ကြိက်ဂှ် လ္ပာ်ဒပ်ကံၚ်ဇြဳပၞာန် ရပ်စပ်ဗ္တိုက်ဒၟံၚ် လွဟ်ဇၞော်ကဵု ဘိုၚ်ပန်ကဵုဒၟံၚ်ပၞာန်ကျာတံတုဲ ပန်ခ္ဍာၚ်နၚ် လ္ပာ်ကွာန် ပွဳပွူဗ္ဒါဲဍုၚ်ကအ်ကြိက်တံ နကဵုလွဟ်ဇၞော်တုဲ ညးဍုၚ်ကွာန်ကောန်အရာပ် ဇီုကပိုက်ဒးနွံတုဲ သ္ၚိဒၟံၚ်တံလေဝ် ဇီုကပိုက်ဒးလီုလာအာလဝ်ရ။
ဒပ်ကံၚ်ဇြဳပၞာန်ဝွံ သွက်ဂွံကလေၚ်ထိၚ်ဒက် ဒေသဗြဝတဳ တေန်ဂါန်ညဳနံၚ်ဂှ်မာန်ဂှ် စနူဂိတုမာတ်တုဲကၠုၚ်တေံတုဲ စထ္မံက်လဝ် ပရေၚ်ပၞာန်အံၚ်ဇေယျတုဲ ဒပ်ပံၚ်ကောံပၠန်ဂတးတံ ကၟာတ်လဒဵုဗ္တိုက်လဝ် ကရောၚ်ပၞာန်အံၚ်ဇေယျတုဲ ဒပ်ကံၚ်ဇြဳပၞာန် ဒးဂိအာလဝ်ရ။
ပ္ဍဲကရောၚ်ပၞာန်အံၚ်ဇေယျ ဒးဂိလဝ်သာ်ဏံဂှ် ဗွဲကြဴဏံ ဒပ်ကံၚ်ဇြဳပၞာန် ကလေၚ်ဗပေၚ်ကၠုၚ်ဇြဟတ် နကဵုကောန်ဒပ်စှ်ေနူတန်ဗ္တောန်တၟိတၟိတံဂှ် ကၠောန်သ္ပကၠုၚ် အဆက်က်ရ။
ပရိုၚ်−သြၚ်လောန်တိုၚ်(မ်)
ဗီု−KNU