ဗရာတ်ဇြဴ၊ အံက်တဝ်ဗာ ၃၀
အခိၚ်ညောန်ကြပ်ကၠုၚ်ကဵု ဂွံကၠောန်ဗဒှ် ပေါဲရုဲမာဲသမ္မတအမေရိကာန် သှ်ေၜိုတ်မွဲသတ္တာဟဂှ် သမ္မတတြေံ ဒဝ်နေဝ်ထြာပ် ကလေၚ်စိုပ်ကၠုၚ် သ္ၚိဗုဂှ် ဍုၚ်ဥရဝ်ပဗွဲမဂၠိုၚ် ဒှ်ဒၟံၚ်ဓဝိၚ်အိုတ်ရ။
ပ္ဍဲဂိတုနဝ်ဝေမ်ဗာ ၅ ဏံ ယဝ်ရအလံၚ်ညးစၞး ဗော်ရဳပါပလေတ်ကာန် ထြာပ် ဂွံဇၞးအာမ္ဂး အမေရိကာန်ဝွံ ဂတးအာက္ဍိုပ် ကုသၞောတ်တၠအဝဵုပၞာန်ဏောၚ်တုဲ ဖဵုအဆက်ဂှ်တှ်ေ အပ္ဍဲတိုက်ဥရဝ်ပ၊ လောန်ၜက်နူဏံတုဲ က္ဍိုပ်သ္ကိုပ် ဝါဒဳဆာန်ဂကူတံ သာတုဲဂံၚ်သ္ကာဂၠံၚ် ဟွံရောမ်ဟွံဓညတံ ဒှ်ကၠုၚ်ဏောၚ်ဂှ် ဍုၚ်ဥရဝ်ပဂမၠိုၚ် စှ်ေလဝ်စိုတ်ရ။
ဣဏံဝွံ ပ္ဍဲကဵုဥရဝ်ပ အခိၚ်ဗော်ပရေၚ်ဍုၚ်ကွာန် ဒစေၚ်လ္ပာ်တဲပုၚ် မၞိဟ်ဒးစိုတ်ဂၠိုၚ်ကၠုၚ်ဂှ် မံက်တိတ်ကၠုၚ် မဒှ်ရ။
သ္ကိုပ်ဝန်ဇၞော်ဟာန်ဂေရဳ ဗေတ်တာ အဝ်ဗေန် သၟာဝါဒဳဆာန်ဂကူ ဒစေၚ်လ္ပာ်တဲပုၚ်ဂှ်တှ်ေ ထံက်လဝ်ဂလာန် ကုထြာပ် မဒှ်ရ။
ကၠာဟွံဂွံကၠောန်သ္ပပေါဲရုဲမာဲသမ္မတအမေရိကာန်ဂှ် နကဵုက္ဍိုပ်သ္ကိုပ်ဥရဝ်ပဂမၠိုၚ် ပွမဟီုဂးဒစေၚ်မွဲလ္ပာ်ဓဝ်တံဂှ် ကၠောန်သ္ပဟီုပ္တိတ်ဟွံလေပ်ကီုလေဝ် ပ္ဍဲကဵုဟီုဂး ပ္ဍဲကၠတ်ထဝ်ဥရဝ်ပဂှ် သ္ကိုပ်ဝန်ဇၞော် ဟာန်ဂေရဳ အဝ်ဗာန်ဂှ်တှ်ေ ယဝ်ရထြာပ် ဂွံဇၞးမ္ဂး ပ္တိုန်စရာဲ နကဵုယှာန်ပိန်ဏောၚ် ဟီုလဝ်ရ။
က္ဍိုပ်သ္ကိုပ်ကၟိန်ဍုၚ် အဳယူ အာယုက်ဂၠိၚ်အိုတ် သ္ကိုပ်ဝန်ဇၞော်အဝ်ဗေန်ဝွံ ပ္တိတ်ဒၟံၚ်ဇြဟတ် ညံၚ်သၞောတ်ဒဳမဝ်ကရေဇြဳ မၞုံကဵုသဘဴဓဝ် ဟွံစိုပ်တၞုၚ်တၞောတ် ဂွံမံက်ဂတဝ်ကၠုၚ်ဂှ်ရ အကြာကောန်သာဗေတေတ်တံဂှ်တှ်ေ ကလိဂွံဒၟံၚ် ပရေၚ်ထံက်ဂလာန်ရ။
ယဝ်ရထြာပ် ကလေၚ်ဒှ်ကၠုၚ် သမ္မတမ္ဂး တိဍာ်ရုယှာ သီဂွံလဝ်တံဂှ် သွက်ဂွံဗလးတဲဒုၚ်ကျဂှ် စန်ဒက်ကၠုၚ် ယူကရုၚ်မာန်ဂှ် ဍုၚ်ဥရဝ်ပတံ ဂွိၚ်ဒၟံၚ်အိုတ်ရ။
ထြာပ်ဂှ်တှ်ေ ညးဒှ်ကၠုၚ်သမ္မတမ္ဂး ဒဒှ်မကဵုဒၟံၚ်အရီုဗၚ် ကုယူကရုၚ်ဂှ် ထပိုတ်အာဏောၚ်တုဲ အပ္ဍဲပွိုၚ် ၂၄ နာဍဳ ပတုဲဒှ်အာ ပေါဲပၞာန်ဂှ်ဏောၚ်ဂှ် ဟီုလဝ် ဂၠိုၚ်ၚ်ကဵုဝါရ။
အခိၚ်စန်ဒက်မာဲဂှ်လေဝ် ထြာပ် ပါ်ပါဲလဝ် သမ္မတယူကရုၚ် ဗလာဒဳမာ ဇြဳလာန်သကဳ နဒဒှ်ညးသွံဖျာ ခိုဟ်အိုတ်မွဲ မဒှ်ရ။
နဒဒှ်ဂကောံမဟာမိတ်နေတိုဝ်မွဲ ယဝ်ထြာပ် ဒှ်ကၠုၚ်သမ္မတအမေရိကာန်မ္ဂး အတိုၚ်ပမာဏခရိတ်အရပ်အစပ် ကာစဵုဒၞါ ညးကဵုသၠုၚ်ပ္တိုန်ရပ်စပ်လဝ်ဂှ် လ္တူဍုၚ်ရပ်စပ်ဟွံမာန်တံ ဇြဟတ်ဂရိုဟ် နွံကၠုၚ်မာန်ဏောၚ်ဂှ်လေဝ် ဍုၚ်ဥရဝ်ပဂမၠိုၚ် ဂွိၚ်ဒၟံၚ်အိုတ်ရ။
Ref: CNA