ကျာ်ထဝ်၊ နဝ်ဝေမ်ဗာ ၁၄
ဒပ်ကံၚ်ဇြဳပၞာန် ပန်ပှော်စုတ် လွဟ်ဇၞော် ပ္ဍဲခဠာတ်ဝါ ဗ္ဒါဲဂကောံကွာန်ယှာန်သု ပွိုၚ်ဍုၚ်ကျာ်ထဝ်၊ တွဵုရးဍုၚ်မန် ဒတုံဗ္တိုဟ်ထ္ကးအာဂှ်ရ သၟာဗ္ၚမွဲတၠ ချိုတ်အာလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာဂှ်ရ ဥူမေန်နာၚ် သၟာဗ္ၚအာယုက် ၅၄ သၞာံမွဲတၠ ရတ်ဒၟံၚ်သြောံဂှ်ဝွံ ပ္ဍဲကဵုတဲ ကေုာံ ထာၚ်ဒဳတံဂှ် ဒးအာမကမ်ကလိဂွံလဝ်ဝပ်ရ။
ကြဴနူဂှ်တုဲ အခိၚ်ပလံၚ်ဥူမေန်နာၚ် သၟာဗ္ၚမဒးအာလဝ်မကမ် ကလိဂွံလဝ်ဝပ် ရုၚ်ဂဥုဲဂှ် ဒၟါနူဆီတိတ်လောန်ၜက်အာတုဲ ချိုတ်အာလဝ် ပ္ဍဲကဵုဂၠံၚ်ဂှ် ညးဒေသတံ ဟီုရ။
ဥူမေန်နာၚ် မချိုတ်အာဂှ်ဝွံ ကောန်ဇာတ် ၇ တၠ နွံတုဲ ဒှ်ညးဍုၚ်ကွာန်သာမည ကၠောန်ၜိုတ်စသုၚ်ဒၟံၚ် ကမၠောန်တဵုလွဳမွဲတၠဂှ် ဂွံတီကေတ်ရ။
တုဲကၠုၚ် ပ္ဍဲဂိတုနဝ်ဝေမ်ဗာ ၇ တေံဂှ်လေဝ် ကြဴနူရုၚ်ဌာနက္ဍိုက်ပ်ပရေၚ်အုပ်ဓုပ်ကာနာနာ မၞုံဍုၚ်ဒုၚ်ဇြယိတ်၊ ပွိုၚ်ဍုၚ်ကျာ်ထဝ် ဒးဒုၚ်ဗ္တိုက်တုဲဂှ် လ္ပာ်ကံၚ်ဇြဳပၞာန် ဟိုတ်နူပန်ပှော်လဝ် လွဟ်ဇၞော်တံတုဲ ညးဒေသ ကွာန်တနဝ်ကျောန်၊ ပွိုၚ်ဍုၚ်ဝဝ် ၄ တၠ ချိုတ်တုဲ ၆ တၠ ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai