သက်ကိုၚ်၊ အံက်တဝ်ဗာ ၃၀
ဒပ်ပၞာန်ဗၠးၜးညးဍုၚ်ကွာန်ဗၟာ BPLA မံက်တိတ်ကၠုၚ် နူကဵုပၠန်ဂတးက္ညၚ်ဏံဂှ်ဝွံ ပြံၚ်ဆုဲဒပ် လ္ပာ်ဒေသအညာ သ္ကုတ်လဒေါဝ်ကၟိန်ဍုၚ်ဂှ်တုဲ ပံၚ်တောဲအာကဵု ဂကောံဇြဟတ်အပ္ဍဲဒေသတံဏောၚ် က္ဍိုပ်သ္ကိုပ်ဂကောံ မာၚ်သံၚ်ခ ဟီုရ။
အပ္ဍဲပရေၚ်ပၞာန် ၁၀၂၇ တေံ BPLA လုပ်လဝ်ပေါဲဗ္တိုက် သၟဝ်ပၠတရဴ ဂကောံမဟာမိတ်ကောဒေံပိဂကောံဂှ်ဝွံ ပ္ဍဲကဵုပရေၚ်ပၞာန် ပေၚ်မွဲသၞာံ ဂိတုအံက်တဝ်ဗာ ၂၇ ဂှ် က္ဍိုပ်သ္ကိုပ်ဂကောံ ကဵုကၠုၚ်သမ္တီ နူကဵု FACEBOOK ပရူပရာဆုဲပြံၚ်ဒပ် လ္ပာ်အညာဂှ်ရ။
ခြာဟွံလအ် BPLA ဖျေံသ္ဇိုၚ်ဒေသအညာတုဲ ဝေၚ်ကၠုၚ်ပရေၚ်ပၞာန်တံမာန်ဏောၚ်ဂှ်ရ ညးဍုၚ်ကွာန်အညာတံလေဝ် ဒုၚ်တၠုၚ်ဏောၚ် စှ်ေစိုတ်စၟဳကေတ်တုဲ သွက်ဂွံသ္ပစၞးဂကူဗမာ၊ သွက်သ္ဂောံဂွံစၟတ်သမ္တီ နူညးဍုၚ်ကွာန်ဗၟာတံဂှ် ထ္မံက်အာရုပ်ရဴ သိုက်က်ဏောၚ်ဂှ် သ္ဂးရ။
ညးခါတ်အကာဲပရေၚ်ပၞာန်တံဂှ်တှ်ေ BPLA ဝွံ ဒှ်ဒပ်ဗမာတုဲ လမိၚ်လညာတ်ပေါဲဗ္တိုက်တံလေဝ် နွံတဴတၟာဂလိုၚ်ဂှ်ရ သွက်ဒပ်ပၠန်ဂတးရပ်လွဟ် ဒေသအညာတံဂှ်တှ်ေ ဒှ်ဇြဟတ်မွဲသာ်မာန်ဂှ် သ္ၚဳဂၠိပ်ဒၟံၚ်တံလေဝ် နွံရ။
အကြာပ်ဒပ် ဇြေယျ နူကဵုဒပ်ကျာ CDM ဂှ် ယဝ်ရဂကောံပၠန်ဂတး ညးဒေသအညာတံကဵု ညးဍုၚ်ကွာန်တံ ဒုၚ်တဲမ္ဂး စဵုကဵုတိုန်သီဍုၚ် အကာဲအရာသာ်ဏံ ဒှ်ကၠုၚ်မာန်ဂှ် ဟီုလဝ် လညာတ်ညးရ။
“ညးဒေသတံ ဒုၚ်တဲ ပြေပြံၚ်တှ်ေ လ္ပာ်ဂှ် ဇြဟတ်ခိုဟ်တုဲ ဒဵုကဵုကဆံၚ် ၁၀၂၇ ဟွံစိုပ်ကီုလေဝ် ဒဵုကဵုအကာဲအရာ တိုန်ဗ္တိုက်ဍုၚ်တံ မုတံ ဒှ်ကၠုၚ်မာန်ဏောၚ်ဂှ် အဲညာတ်ကေတ်ရ။ အဓိကဂှ်တှ်ေ ဂကောံဒေသတံ ဒုၚ်တဲဏောၚ်။ ညးဍုၚ်ကွာန်တံ ဒုၚ်တဲဏောၚ်ဟီုမ္ဂး ဒှ်ကၠုၚ်မာန်ဏောၚ်။ ယဝ်ရ ဂကောံနွံဒၟံၚ်ပ္ဍဲဒေသတံဂှ် ဟွံဒုၚ်တဲပုဟ်ဟီုမ္ဂး ပြဒ္ဒညာတံ ဂၠိုၚ်ကၠုၚ်တုဲ သာယှုက်ထုဲကၠုၚ်မာန်ဏောၚ်ဂှ် အဲညာတ်ကေတ်ရ” သာ်ဝွံ သ္ဂးရ။
ပ္ဍဲအရာဖျေံသ္ဇိုၚ် ဒေသအညာဂှ် ကဵုတမ်ဒပ် PDF နွံသၟဝ်တဲဌာနဝန်ဇၞော်ကာစဵုဒၞါ NUG တံကီု သီုကဵုဂကောံဇြဟတ်တၞဟ်ဟ်တံဂှ် ဒက်ပ္တန်အာပရေၚ်ဆက်ဆောံ မခိုဟ်ဂေါဝ်တုဲ ညံၚ်ပၠန်ဂတး ဂွံအံၚ်ဇၞးဗွဲမပြဟ်ဂှ် ပ္တိတ်အာဇြဟတ်ဏောၚ် မာၚ်သံၚ်ခ သ္ဂးရ။
သ္အာၚ်နူဂှ်ပၠန် BPLA ဝွံ ဒှ်ဒပ်သၟဝ်တဲ ဌာနဝန်ဇၞော်ကာစဵုဒၞါ MOD, NUG တံ ဟွံသေၚ်ကီုလေဝ် ရန်ကဵုပရေၚ်ညဳသာတုဲ သွက်ဂွံပံၚ်တောဲရေၚ်တၠုၚ်အာ ကုဒပ်ညးဒေသအညာတံ သီုဖအိုတ်ဂှ် ပ္တိတ်အာဇြဟတ်လၟိုန်ဏောၚ် ညးကဵုလဝ်ကတိရ။
ဥူတာန်သဵုနာၚ် ညးလ္ၚတ်သ္ၚဳဂၠိပ် ပရေၚ်ဍုၚ်ကွာန်ဂှ်တှ်ေ BPLA ဝွံ ဒှ်ဒပ်ဒတူလိုၚ်တၞဟ်ခြာကီုလေဝ် သွက်ဂွံပြံၚ်လှာဲကၠေံ ပရေၚ်ပၞာန်ဒေသသ္ကုတ်လဒေါဝ်တေံ နူကဵုသၞောတ်ပၞာန်ဒမၠုက် နဒဒှ်ပေါဲပၞာန်ဂှ် ဒှ်တဴအထံက်အရီုတၟာဂလိုၚ်မာန်ဂှ် သ္ၚဳဂၠိပ်လဝ်ရ။
“ကဵု NUG ဂှ်တှ်ေ ၜိုတ်ပ္ညဳပ္ညပ်ရကၠောန်တုဲ နဒဒှ်ဂကောံသၟဝ်တဲ NUG ဂှ် ညးတံ ဒတူလိုၚ်အာဟွံသေၚ်ပုဟ်။ နဒဒှ်ဂကောံတၞဟ်ခြာမွဲရ ဒတူလိုၚ်အာဏောၚ်။ ဆ္ဂး ဂကောံဇြဟတ်တံဏံ ဂၠိုၚ်ကၠုၚ်သိုက်က်ဂှ်ဝွံ ပ္ဍဲအရာပ္တိတ်ဇြဟတ် သ္ဂောံပြံၚ်လှာဲ ပရေၚ်ပၞာန် ဒေသသ္ကုတ်လဒေါဝ် နူကဵုပၞာန်ဒမၠုက် နဒဒှ်ပေါဲပၞာန်ဂှ် ဒှ်တဴအထံက်အပံၚ်တၟာဂလိုၚ်မာန်ဏောၚ်။ ပ္ဍဲဒေသသ္ကုတ်လဒေါဝ်ဂှ် ညံၚ်ဂကောံဇြဟတ် ကောန်ဂကူဗၟာတံသၟး ပါလုပ်ဒက်ပ္တန်လဝ်ဂှ် ဂွံဒှ်ကၠုၚ်ဂှ် ဒှ်တဴလဂါံဇိုၚ်ပၟိက်ဇၞော်မွဲဂှ်ရ ဒးဒုၚ်တၠုၚ်ဏောၚ်” သာ်ဝွံ သ္ဂးရ။
ဒပ်ပၞာန်ဗၠးၜးညးဍုၚ်ကွာန်ဗၟာ BPLA ဂှ် ပ္ဍဲသၞာံသီအဝဵု ၂၀၂၁ ၜိုတ်လဒေါဝ်ဂိတုဨပရဴဂှ် မာၚ်သံၚ်ခ သ္ကိုပ်သ္ကတုဲ နကဵုအရီုဗၚ်ဗော်သွးကောန်ဂကူကရေၚ် KNU ကဵု ဒပ်ပၞာန်ရခေၚ် AA တံဂှ် စဒက်ပ္တန်လဝ် ပ္ဍဲတိဍာ် KNU ရ။
ကြဴနူဂှ်တုဲ အပ္ဍဲတွဵုရးကရေၚ် ဒေသပရေၚ်ပၞာန် KNU ကီု အပ္ဍဲရခေၚ်ကဵု ရးသေံသၟဝ်ကျာတံဂှ် ပံၚ်တောဲလုပ်ပေါဲဗ္တိုက် သၟဝ်ပၠတရဴ ဒပ်ရပ်လွဟ်ကောန်ဍုၚ်အရၚ်ဒေသတံဂှ်တုဲ ပၠန်ဂတးဒၟံၚ် သၞောတ်တၠအဝဵုပၞာန်ရ။
တၟေၚ်ဂှ်တှ်ေ ပြံၚ်လှာဲကၠေံ ဝၚ်ဒပ်ပၞာန်ဗၟာ မွဲပ္ၚံက်တုဲ ပ္ဍဲပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံ ကံၚ်ဇြဳပၞာန် မ္ဒးကျဗြံအာဂှ်လေဝ် နူကဵု BPLA ကလိဂွံလဝ်တၚ်ဆဵုဂဗပရေၚ်ပၞာန် မတောတက်တံရ။
နကဵု BPLA ဒက်ပ္တန်ချဳဒရာၚ်ဒၟံၚ် ဒေသပၞာန်စၟတ် ၂၀၃ ဖျေံသ္ဇိုၚ်ရးသေံသ္ကုတ်သၟဝ်ကျာကဵု ဒေသပၞာန်စၟတ် ၁၀၇ ဖျေံသ္ဇိုၚ်တွဵုရးကရေၚ်ဂှ်တုဲ ပ္ဍဲကဵုဒပ်မဟာကၟိန်ဍုၚ် စၟတ် ၆၁၁ ဒပ်ကဝ်က MNDAA ဂှ်လေဝ် ပါလုပ်လဝ်တုဲ အခါလၟုဟ် သွက်ဂွံချဳဒရာၚ်ပရေၚ်ပၞာန် လ္ပာ်ဒေသအညာဂှ် ဟီုပ္တိတ်ကၠုၚ်ရ။
ပရိုၚ်−သြၚ်လောန်တိုၚ်(မ်)
ဗီု−BPLA