အပ္ဍဲပေါဲဗ္တိုက်သီဗ္ဒိုပ် တွဵုရးကရေၚ်ဍာဲဂှ် ကောန်အရာပ် ၁၁ တၠ ချိုတ်အာ

လွိုၚ်ကဝ်၊ နဝ်ဝေမ်ဗာ ၁၄

အပ္ဍဲကာလ ချဳဒရာၚ်ပၞာန် ၁၁၁၁ မက္တဵုဒှ်ဒၟံၚ် ပ္ဍဲတွဵုရးကရေၚ်ဍာဲဂှ် ဒပ်ကံၚ်ဇြဳပၞာန်တံ မ္ၚးနူကဵုလွဟ်ဇၞော်တံဂှ် ဗ္တိုက်ဒၟံၚ် သီုကဵုက္ၜၚ်ကျာတံဂှ်ရ ကောန်အရာပ် ၁၁ တၠ ချိုတ်အာလဝ်ဂှ် ကံၚ်ဇြဳအုပ်ဓုပ်ကရေၚ်ဍာဲ ကာလအကြာ IEC ဟီုရ။

တုဲကၠုၚ် ပ္ဍဲဂိတုနဝ်ဝေမ်ဗာ ၁၁ တေံ ဂကောံဒပ်ပံၚ်ကောံပၠန်ဂတးတံ ကြဴနူလုပ်စိုပ်ဗ္တိုက် ဗ္ဒိုပ်ဒပ်ကံၚ်ဇြဳပၞာန် မဖျေံလဝ်သ္ဇိုၚ်သၞာံဇမၠိၚ် အပ္ဍဲတွဵုရးကရေၚ်ဍာဲ ၇ ဗ္ဒိုပ်ဂှ်တုဲ ပေါဲဗ္တိုက်တံ သ္ကာတ်မြဟ်လဝ်ရ။

အပ္ဍဲပေါဲဗ္တိုက်တံဏံဂှ် ဟိုတ်နူပရေၚ်ပန်ပှော်လွဟ်ဇၞော် လွဟ်ဍောတ် ကံၚ်ဇြဳပၞာန် လ္တူဍုၚ်လွိုၚ်ကဝ်ဂှ်တုဲ ကောန်အရာပ် ၅ တၠ ချိုတ်အာလဝ်တုဲ လ္တူဍုၚ်မိုဝ်ဗျေဝ်ဂှ်လေဝ် ကောန်အရာပ် ၆ တၠ ချိုတ်အာလဝ်ရောၚ် ဂွံတီကေတ်ရ။

ဟိုတ်နူပေါဲဗ္တိုက်ၜါလ္ပာ်တံတုဲ ညးကလိဂွံဝပ်ဇီုကပိုက်တံ ၁၀ တၠ ဟွံအောန် နွံဒၟံၚ်တုဲ ညးတံဂမၠိုၚ်ဝွံ အပ္ဍဲပေါဲဗ္တိုက် တုဲတုဲကၠုၚ်တေံဂှ် ဟွံပါဲဒဴပၞာန်မွဲသာ် ဒှ်ညးသှ်ေဒၟံၚ်တံကဵု ညးကလေၚ်စဴဌာန်ဒၟံၚ်တံရောၚ်ဂှ် ဂကောံဇြဟတ်ပၠန်ဂတးကရေၚ်ဍာဲတံ ဟီုရ။

အပ္ဍဲတွဵုရးကရေၚ်ဍာဲဂှ် ပေါဲဗ္တိုက်တံ ဆက်သ္ကာတ်မြဟ်ကၠုၚ်မာန်ဂှ်ရ နကဵုညးဍုၚ်ကွာန်တံ ၜိုတ်သ္ပမာန် သွက်ဂွံပါဲဒဴကဵုဘဲပၞာန်အိုတ်ဂှ် ညးအုပ်ကာ IEC ဥူဗညာ ဖ္တိုက်ဖ္အောဝ်လဝ်ရ။

အပ္ဍဲပေါဲဗ္တိုက်တံဂှ် နကဵုဒပ်ပံၚ်ကောံစဵုဒၞါညးဍုၚ်ကွာန်တံ ၜိုတ်သ္ပမာန် ညံၚ်ညးဍုၚ်ကွာန် သ္ဂောံဇီုကပိုက်ဒးအောန်၊ ညံၚ်ဒြပ်ရတ်သ္ၚိဌာန် ညးဍုၚ်ကွာန်တံ သ္ဂောံဇီုကပိုက်ဒးအောန် သွက်ဂွံရေၚ်တၠုၚ်ကဵုဂှ် IEC စၞောန်ပ္ညုၚ်လဝ်ရ။

ဂကောံဇြဟတ်ပၠန်ဂတးတံဂှ် ဟိုတ်နူဗဒှ်ဒၟံၚ် ပေါဲဗ္တိုက်သီဍုၚ်တံဂှ်ရ ညးဍုၚ်ကွာန်ကောန်အရာပ်တံကဵု စမြိုၚ်ဂမၠိုၚ် ဇီုကပိုက်လီုလာ်မာန်ဂှ်ရ ညးဍုၚ်ကွာန်တံ ညံၚ်ဂွံဗၠးဘဲ ဒစးဒုၚ်တုဲ သွက်ဂွံပလေဝ်ပလေတ်ကဵုအိုတ်ဂှ် ကဵုလဝ်သတိရ။

ပ္ဍဲပေါဲဗ္တိုက် အပ္ဍဲ ၂ တ္ၚဲတုဲကၠုၚ်တေံ လ္ပာ်ကံၚ်ဇြဳပၞာန် နူကဵုဗ္ဒိုပ်ဒပ်ဖျေံသ္ဇိုၚ်မိုဝ်ဗျေဝ်၊ လွိုၚ်ကဝ် ကေုာံ ဒဳမအ်သဵုတံဂှ် ဘိုၚ်ပန်ပှော်ကဵုလဝ် လွဟ်ဇၞော်ဂၠိုၚ်ကဵုဆတုဲ ကၠုၚ်စိုပ်ပန်ပှော်ကဵုလဝ် က္ၜၚ်ကျာဗ္တိုက် ၂ ဖ္ဍိုက် ဗၞတ် ၂၀ လ္တုန်ဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−CJ