ဍုၚ်သီဂွံလဝ် ၜါဍုၚ်ဂှ် ယန္တယာပရေၚ်အုပ်ဓုပ် စဒၟံၚ်ယျရောၚ် NUG ဟီု

ကဝ်လေန်၊ နဝ်ဝေမ်ဗာ ၁၄

ဟိုတ်နူပရေၚ်ဗ္တိုက်ပံၚ်တောဲ ဂကောံဇြဟတ်ပၠန်ဂတးတံတုဲ ကုဍုၚ်ကဝ်လေန် ကေုာံ ဍုၚ်ခါန်ပါတ် မၞုံအပ္ဍဲရးသက်ကိုၚ် မသီဂွံထိၚ်ဒက်လဝ်ဂှ် စထ္မံက်ဒၟံၚ်ရုပ်ရဴ ယန္တယာပရေၚ်အုပ်ဓုပ်တံယျဂှ် အလဵုအသဳညဳသၟဟ်ဂကူ NUG ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဂကောံဒပ်ပၠန်ဂတးရပ်လွဟ်ဂမၠိုၚ် ပ္ဍဲဂိတုနဝ်ဝေမ်ဗာ ၃ ဂှ် ကြဴနူစလဝ် ပေါဲဗ္တိုက်သီဍုၚ် ကုဍုၚ်ကဝ်လေန် ရးသက်ကိုၚ်ဂှ်တုဲဂှ် ပ္ဍဲဂိတုနဝ်ဝေမ်ဗာ ၆ ဂှ် ထိၚ်ဒက်ဂွံလဝ်ပေၚ်ၚ်ရ။

လအာတုပ်သာ်ဂှ်ကီု မွဲတ္ၚဲဓဝ် ဗ္တိုက်လဝ် ဍုၚ်ခါန်ပါတ် မၞုံလ္တူဂၠံၚ်ဇၞော် ကလေဝ်−တမူ−အာယှ နူကဵုပွိုၚ်ဍုၚ်တမူတံဂှ်တုဲ ပ္ဍဲဂိတုနဝ်ဝေမ်ဗာ ၇ တေံဂှ် ဂကောံဇြဟတ်ပၠန်ဂတးရပ်လွဟ်တံ သီဂွံလဝ်ရ။

ညးမၞုံအခေါၚ်ဟီုဂး ရုၚ်သမ္မတ အလဵုအသဳညဳသၟဟ်ဂကူ NUG ဥူကျဝ်ဇြဝ်ဂှ် စထ္မံက်ဒၟံၚ်ရုပ်ရဴ ကုဍုၚ်ကဝ်လေန် သွက်ပရေၚ်အုပ်ဓုပ်ကဵု ပရေၚ်သၞောဝ်အုပ်လဒံတံဂှ်တုဲ ဍုၚ်ခါန်ပါတ်ဂှ်လေဝ် ရေၚ်တၠုၚ်ဒၟံၚ် နနဲသာ်ဏံကီုဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပ္ဍဲကဵုဍုၚ်ကဝ်လေန်ပိုယ်တံဟီုတှ်ေ ဂကောံအုပ်ဓုပ်တံဂှ် စထ္မံက်ဒၟံၚ်ရုပ်ရဴ ယန္တယာအုပ်ဓုပ်တံရ။ ပပ္တံနူကဵု သ္ဂောံကလေၚ်ဂွံ ပၟတ်ဓာတ်လလဳ မလီုလာ်အာတံဂှ် ထ္မံက်ရုပ်ရဴ ရေၚ်တၠုၚ်ဒၟံၚ် ယန္တယာအုပ်ဓုပ်တံ ဗွဲမစှ်ေကဵုသၞောတ်ရ။ ပရေၚ်အုပ်လဒံသၞောဝ်ဓဝ်ဂှ်လေဝ် ရေၚ်တၠုၚ်ဒၟံၚ်ရ။ လအာတုပ်သာ်ဏံကီု ဍုၚ်ခါန်ပါတ်ဂှ်လေဝ် ညံၚ်ဂွံဗၠးၜးနူ သၟဝ်ယန္တယာကံၚ်ဇြဳပၞာန်ဂှ် သီမာန်လဝ်ယျ။ အဏံလေဝ် ညံၚ်ဂွံဗၠးၜး ပ္ဍဲကဵုဒၞါဲထိၚ်ဒက်လဝ်မာန်တံဂှ် ပရေၚ်အုပ်ဓုပ်၊ ပရေၚ်စဳရေၚ်သၞောဝ်ဓဝ်ပိုယ်တံ ဒှ်တမ် ပရေၚ်ရေၚ်တၠုၚ်ကေတ်တာလျိုၚ်တံဂှ် စထ္မံက်ရုပ်ရဴ ရေၚ်တၠုၚ်ဒၟံၚ် ဗွဲမစှ်ေကဵုသၞောတ်ရ” ရဴဝွံ သ္ဂးလဝ်ရ။

သ္အာၚ်နူဂှ်ပၠန် ညံၚ်ညးဍုၚ်ကွာန်ဂမၠိုၚ် ဂွံဂေတ်ဂြိပ် ပရေၚ်ပိုန်ဒြပ် ပရေၚ်သၠာဲဂတးဗၞိက်တံမာန်ဂှ် ပ္ဍဲကဵုတိဍာ်မထိၚ်ဒက်လဝ်တံဂှ် ရေၚ်တၠုၚ်ဒၟံၚ် ပရေၚ်အုပ်ဓုပ် အခိၚ်ကာလအကြာကဵု ယန္တယာပရေၚ်အုပ်ဓုပ်ဒေသန္တရတံ ဗွဲမစှ်ေကဵုသၞောတ်ဂှ် ဆက်ဟီုရ။

ဆ္ဂး ဍုၚ်ကဝ်လေန် ကေုာံ ဍုၚ်ခါန်ပါတ် NUG မသီဂွံထိၚ်ဒက်လဝ်ဂှ် ညးဍုၚ်ကွာန်ကောန်အရာပ်ဒေသတံ ကလေၚ်သ္ပဒတဴမံၚ်တန်တဴ နွံ၊ ဟွံမွဲဂှ် ဟီုဂးလဝ်ဟွံမွဲရ။

မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ပ္ဍဲအရာပ္တိတ်ဇြဟတ် သွက်ဂွံကလေၚ်ကေတ် ဍုၚ်ကဝ်လေန် မဒးဆောံလေၚ်အာလဝ်ဂှ် ဟိုတ်နူပရေၚ်ကြတ်ဗ္တိုက် ဂကောံဇြဟတ်ပၠန်ဂတးတံတုဲ လ္ပာ်ဒပ်ကံၚ်ဇြဳပၞာန် မ္ဒးပြဟ်လလုဲအာတံ နွံတုဲ ဆုတ်ကလေၚ်အာအိုတ်ဂှ် ဥူကျဝ်ဇြဝ် ထပ်ဟီုလဝ်ရ။

အတိုၚ်တၚ်လလောၚ်တြး Kawlin Revolution-KR မထ္မံက်ထ္ၜးဒၟံၚ်ပရိုၚ် ဍုၚ်ကဝ်လေန် ပ္ဍဲဂိတုနဝ်ဝေမ်ဗာ ၇ တေံဂှ်မ္ဂး ဟိုတ်နူအကာဲအရာပရေၚ်ပၞာန်အခိၚ်လၟုဟ်တုဲ ဟွံကဵုအခေါၚ်ညးဍုၚ်ကွာန်တံ ကလေၚ်မံၚ် အပ္ဍဲဍုၚ်တံဏီတုဲ ဒပ် ပအဖ ကေုာံ ဒပ် ပကဖ မၞုံအပ္ဍဲပွိုၚ်ဍုၚ်တံ မၚ်မွဲကဵုလဝ်ရောၚ် သ္ဂးရ။

သ္အာၚ်နူဂှ်ပၠန် ညးပါဲဒဴဘဲပၞာန် ဗ္ဒါဲ ၅၀၀၀၀ ဂှ်လေဝ် ဂကောံ ပအဖ ပွိုၚ်ဍုၚ်တံ မၚ်မွဲကဵုလဝ်တုဲ ဟိုတ်နူဂၠံၚ်တရဴ ပရေၚ်ဆက်စၠောံတံ ကၟာတ်အာတံတုဲ နွံပၟိက်ဒၟံၚ်ကဵု ကၠေၚ်စက်၊ ကၠေၚ်စ၊ ဂဥုဲဇဗ၊ ယာတ်လ္တက် ကေုာံ ဗၞိက်စၞစသုၚ်သ္ဇိုၚ်တံရောၚ်ဂှ် ကဵုလဝ်သမ္တီရ။

ပ္ဍဲဂိတုနဝ်ဝေမ်ဗာ ၁၁ အခိၚ်နူဂယး ၜိုတ် ၅ နာဍဳပြၚ်ဂှ် ကရောၚ်ပၞာန်ဒပ်ကံၚ်ဇြဳပၞာန် ဇြဟတ်ဒပ်ပွဳပွူ ၁၀၀ ပါ မဇက်ဂၠေါဲတိုန်ကၠုၚ် နူကဵုဍုၚ်ဝန်တဝ် လ္ပာ်ဍုၚ်ကဝ်လေန်ဂှ် က္တဵုဒှ်လဝ် ပရေၚ်ဒိဓဗတ်ဆေၚ်မုက် ကုတမ်ဒပ်ခရိုၚ် ကဝ်လေန် (၁) ကဵု (၂) ဂှ်သၟးဟွံက သီုကဵု ပကဖ ပွိုၚ်ဍုၚ် ဗ္ဒါဲခဠာတ် golf (အၚ်းဘုတ်ကုန်း) ရ။

လအာတုပ်သာ်ဂှ်ကီု ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲဒဵုမိုဝ်ကံၚ် မၞုံဍုၚ်ဝန်တဝ်ဂှ် အခိၚ်လုပ်စိုပ်ဗ္တိုက် ဍုၚ်ကဝ်လေန်ဂှ် လ္ပာ်ကံၚ်ဇြဳပၞာန် ၅ တၠ ချိုတ်တုဲ လ္ပာ်ဂကောံဇြဟတ်ပၠန်ဂတးတံဂှ် ၂ တၠ ချိုတ်အာလဝ်ရောၚ် ပ္ဍဲဂိတုနဝ်ဝေမ်ဗာ ၁၂ တေံ ထပ်လလောၚ်ပ္တိတ်ကၠုၚ်ရ။

သ္အာၚ်နူဂှ်ပၠန် ပ္ဍဲဂိတုနဝ်ဝေမ်ဗာ ၁၂ အခိၚ်တ္ၚဲစေၚ် ၁ နာဍဳကဝိုက်ဂှ်လေဝ် နူကဵုတမ်ဒပ်ကံၚ်ဇြဳပၞာန် ခမရ ၁၂၀ မၞုံဍုၚ်ဝန်တဝ်ဂှ် ဟိုတ်နူပန်ပှော်လဝ် လ္ပာ်ကွာန်လှဲမံက် နကဵုဟံၚ်ဝေသ်ဇြာတံဂှ်ရ ညးဍုၚ်ကွာန်မွဲတၠ ချိုတ်တုဲ ဟွံအောန်နူကဵု ၅ တၠ ကလိဂွံလဝ်ဝပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ဍုၚ်ခါန်ပါတ်ဂှ် သွက်ဂွံထ္မံက်ရုပ်ရဴ သွာၚ်အုပ်ဓုပ်တံဂှ်တုဲ ဒပ်ပံၚ်ကောံပၠန်ဂတးတံ ကၠောန်သ္ပဒၟံၚ် ပရေၚ်ၚးတးတိဍာ်တုဲ အပ္ဍဲပေါဲဗ္တိုက်သီဍုၚ်ဂှ် ဟိုတ်နူပရေၚ်ဗ္တိုက်တရဴကျာ ကံၚ်ဇြဳပၞာန်တုဲ ညးဂြိပ်ဒဴပါဲဒလေတ်တံလေဝ် နွံဒၟံၚ်ဂှ် ဂွံတီကေတ် ဇရေၚ်ဂကောံဒပ်ပၠန်ဂတးရပ်လွဟ် အပ္ဍဲဒေသတံရ။

ပရိုၚ်−သြၚ်လောန်တိုၚ်(မ်)

ဗီု−NUG/KL PDF