ပ္ဍဲတွဵုရးဍုၚ်မန် ကၠေၚ်စက်ပိုတ်အိုတ် သာပရေံကၠုၚ်

မတ်မလီု၊ နဝ်ဝေမ်ဗာ ၁၄

ဆေၚ်ကၠေၚ်စက် အပ္ဍဲတွဵုရးဍုၚ်မန် ဗွဲမဂၠိုၚ် အပ္ဍဲအကြာတ္ၚဲတံဏံ ကၠေၚ်စက်ပိုတ်အိုတ်တံ က္တဵုဒှ်ဒၟံၚ်တုဲ ဆေၚ်ကၠေၚ်ပိုတ်အာဖအိုတ်တံလေဝ် နွံဒၟံၚ်ဂှ် တၠကမၠောန်ပရေၚ်သွံရာန်ကၠေၚ်စက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကၠေၚ်စက်ပိုတ်အိုတ်ဂှ် စနူဂိတုနဝ်ဝေမ်ဗာ ၁၀ တုဲကၠုၚ်တေံတုဲ ပ္ဍဲကဵုတွဵုရးဍုၚ်မန်ဂှ် က္တဵုဒှ်လဝ်တုဲ သီုလ္ဂုၚ် သီုကဵုဍုၚ်ဇၞော်ဇၞော်တံဂှ်လေဝ် ဒးဂဗဒၟံၚ်ကဵု ကၠေၚ်စက်ပိုတ်တံကီုရ။

ကၠေၚ်စက်ပိုတ်ဂှ်ဝွံ ဟိုတ်နူအာကၠုၚ်တရဴဂၠိုၚ်ကီု၊ သွက်ပရေၚ်ပလံၚ်ဗစိုပ် ခက်ခုဲကၠုၚ်ကီု၊ ဟိုတ်နူပၟတ်ဓာတ်လလဳ ဟွံမှာန်တုဲ ပ္ဍဲကဵုရုၚ်ကမၠောန်ရုၚ်စက်တံဂှ် ဒးသုၚ်စောဲဒၟံၚ် ပၟတ်စက်ဇၞော်ဇၞော်တံဂှ်ရ ဆေၚ်ဆက်ဒၟံၚ်ကဵု ဇြဟတ်ရာန်ကၠေၚ်စက် သၠုၚ်တိုန်ကၠုၚ်ရ။

တၠကမၠောန်သွံရာန်ကၠေၚ်စက်မွဲတၠဂှ် ပ္ဍဲကဵုသၞေဟ်ကၚ်စၟဳတ် ညံၚ်ခါယှေ ဂှ် ဒးဒုၚ်စၟဳတ်ဒၟံၚ် အခိၚ်ဗွဲမလအ်လဂှ်ကီု၊ နူကဵုကံၚ်ဇြဳပၞာန်တံ ၜိုတ်နွံပၟိက်ဂှ် ဟွံသွံကဵုကၠေၚ်စက်တံတုဲ ဒၟါနူသွံကဵုဒၟံၚ် နကဵုအရၚ်တံသၟးဂှ်ရ ကၠေၚ်စက်ပိုတ်အိုတ် မ္ဒးက္တဵုဒှ်ဒၟံၚ်ရောၚ် ဟီုရ။

“ပိုတ်ဂှ်တှ်ေ သွံဟွံရုမ်တုဲ ဒှ်စသာ်ဏံလေပ်ရ။ စိုပ်ရာသဳဗြဲကျာတၟးမ္ဂး မၞိဟ်တံဂှ် ဒးသုၚ်စောဲဂၠိုၚ်ကၠုၚ်ရ။ အရၚ်မပရအ်ကဵုဂှ်တှ်ေ အခိၚ်ကသီုလေဝ် ၜိုတ်ဏံရ စိုပ်က္ညၚ်လေဝ် ၜိုတ်ဏံရဟီုတှ်ေ ပ္ဍဲရာသဳဗြဲကျာတၟးဂှ် သၞာံတုဲတေံလေဝ် ပိုတ်။ သၞာံဏံလေဝ် ပိုတ်။ ကမၠောန်တံကီု၊ မၞိဟ်တံကီု၊ စနူကဵုကမၠောန်အာတရဴ ပရေၚ်ပိုန်ဒြပ်တံ အရာရာအိုဿီု ဒးသုၚ်စောဲဂၠိုၚ်ကၠုၚ်တုဲ သွံဟွံရုမ်ပုဟ်။ မွဲပၠန်ဂှ် တရဴလအ်လတံလေဝ် ပါရ။ လၟုဟ်ဂှ်တှ်ေ ညံၚ်ခါယှေ ဂှ် ကၟာတ်ဒၟံၚ်ကွေံကွေံဏောၚ်။ လၟေၚ်ၚ်မ္ဂး ၜါပိတ္ၚဲဟီုတှ်ေ ကၠေၚ်ဂှ် နူကဵု(သီလဝါ) စိုပ်မတ်မလီုဏောၚ်။ ဆ္ဂး လၟုဟ်ဂှ် ၜိုတ်မွဲသတ္တာဟမှ စိုပ်ဏောၚ်ဟီုတှ်ေ အကာဲအရာ လအ်လဒၟံၚ်တံလေဝ် နွံရ” သာ်ဝွံ သ္ဂးရ။

ဒဒှ်မကၠေၚ်စက်ပိုတ်ဂှ် သာပရေံကၠုၚ်ဂှ်ရ တၠကမၠောန်ကၠေၚ်စက်ဂမၠိုၚ် ၜိုန်ရအာတ်မိက်ဒၟံၚ်ကံၚ်ဇြဳပၞာန် သွက်ဂွံသၠုၚ်ပ္တိုန်သွံတြးကဵုဗ္ၜတ်အရၚ်တံဂှ်ကီုလေဝ် ဒၟါနူသွံတြးကဵုဒၟံၚ် အတိုၚ်သၞောတ်တြေံဂှ်ရ ဒးဂဗအာ ကုကၠေၚ်စက်ပိုတ်တံ မွဲဏှမွဲဏှဏောဝ်ဂှ် ညးဆက်ဟီုရ။

တၠကမၠောန်သွံရာန်ကၠေၚ်စက်မွဲတၠပၠန်ဂှ်လေဝ် ဗ္ၜတ်အရၚ်ကၠေၚ်စက်တံဂှ် ၜိုတ်နွံပၟိက် ပ္တိုန်ဟွံဂွံသၟးဟွံက ကမ္ပဏဳမွဲတုဲမွဲဂှ် ရာန်ဟွံဂွံတုဲ ကမ္ပဏဳဂမၠိုၚ်ပံၚ်တုဲ ဒးရာန်ဒၟံၚ်ဂှ်ရ ဒးမၚ်ဒၟံၚ် ဒဒှ်မပါ်ပရအ်ကဵုအရၚ်တံတုဲ ကၠေၚ်စက်ပိုတ်အိုတ် ဒးက္တဵုဒှ်ဒၟံၚ်ရောၚ် ဟီုရ။

“ဗ္ၜတ်အရၚ်မဂွံဂှ်ကဵု အခိၚ်ဒးမၚ် ဗ္ၜတ်အရၚ်တံဏံ ပ္ဍဲကဵု(သီလဝါ) တေံ မဒှ်ရ။ တုဲပၠန် ကၠေၚ်ဂှ်လေဝ် ပ္တိုန်ဟွံဂွံပုဟ်လေဝ်။ ကၠေၚ် (၃) ဂကူတှ်ေ ကမ္ပဏဳ ၜိုတ် (၄) ဒးပ္တိုန်ဒၟံၚ်ရ။ ကၠာတေံဟီုမ္ဂး ကၠေၚ်မွဲဂကူမ္ဂး ပိုယ်တံ ပ္တိတ်အာ (၄) ဠက်လဳတာဏောၚ်ဟီုမ္ဂး ပ္တိုန်မွဲဒၞါဲတှ်ေတုဲရ။ လၟုဟ်ဂှ် ဒှ်မံၚ်ၜိုတ် (၄) ဒၞါဲတုဲ အခက်အခုဲဂှ်တှ်ေ တၟာဂလိုၚ်ရ။ ဟိုတ်ဂှ်ရ (ကၠေၚ်ပိုတ်အိုတ်) ဂှ် ဒှ်ဒၟံၚ်ရ။ ဒးဟီုတပ်ပ် နကဵုဗ္ၜတ်အရၚ်ဏံဂှ်တှ်ေ အခိၚ်ရာသဳဗြဲကျာတၟးကၠုၚ်ဂှ်တှ်ေ နကဵုဗ္ၜတ်အရၚ် ဍေံတံကဵုဂှ် ကၠေၚ်ဂှ် ပိုတ်တွဵုရဏောၚ်၊ ဍေံဂှ် ဟွံပဵုတိုန်ကၠုၚ်ပုဟ်။ အောန်ရ အောန်စှ်ေအာဏောၚ်“ သာ်ဝွံ သ္ဂးရ။

ဒဒှ်မကၠေၚ်စက်ပိုတ်ဏံဂှ် ပ္ဍဲဍုၚ်မတ်မလီု ဍုၚ်ဇၞော်တွဵုရးဍုၚ်မန်ဂှ်ကီု ပ္ဍဲကဵုပွိုၚ်ဍုၚ်သၟေဟ်တံဂှ်လေဝ် ဒးဂဗဒၟံၚ် အကာဲအရာရာန်ကၠေၚ်စက်ဟွံဂွံတံကီု မဒှ်ရ။

ညးလိၚ်ဒဳယာန်မွဲတၠဂှ် ဒၟါနူကၠေၚ်စက်ပိုတ်ဒၟံၚ်ဂှ်တုဲ ဂွိုအ်ဂၠါဲသွက်ဂွံဂွံညးအာတရဴတံဂှ်မွဲသာ် ဒးရုန်ဂ္စါန်ဒၟံၚ် သွက်ဂွံဂွံကၠေၚ်စက်တံသၟးရဂှ်တုဲ အခိၚ်အိုတ်တုဲ သြန်လုပ်တံလေဝ် အောန်စှ်ေကၠုၚ်ဂှ် ဟီုရ။

“ပရူပရာကၠေၚ်ပိုတ်ဂှ်တှ်ေ ဆက်စပ်အာကဵုပိုယ်တံသီုညးဖအိုတ်ယျ။ လှုဲနွံတုဲ ကၠေၚ်ဟွံမွဲတှ်ေ မုပဟွံဂွံပုဟ်။ ပိုယ် ရဲဒဳပလံၚ်ဗစိုပ်တံဂှ်တှ်ေ သာပရေံရ၊ လၟုဟ်ဂှ် ဂွံဂွံမၞိဟ်ဂှ် ဟွံဒးဂၠါဲကၠာပုဟ်၊ အလဵုဂွံစုတ်ကၠေၚ်ရောဂှ် ဒးဂၠါဲဒၟံၚ်ကၠာ။ စုတ်ကၠေၚ်တုဲ ကၠေၚ်ပေၚ်မှ ဒဳဂွံဏောၚ်၊ ဒဵုကဵုအိုတ်ဂှ်လေဝ် ဟွံဂံၚ်ဒဳပုဟ်။ လၟုဟ်ဂှ် ဗက်ဂၠါဲဒၟံၚ်ကၠေၚ်သၟးဂှ် အခိၚ်အိုတ်ဒၟံၚ်၊ ကၠာတေံ မွဲတ္ၚဲဂွံၜါဠက်ဂှ် လၟုဟ် ၜိုတ်ဒ္စါံလ္ၚီရဂှ် တၟာလှ်ေမံၚ်။ အကာဲအရာပရေံအာကွေံကွေံယျ” သာ်ဝွံ သ္ဂးရ။

ဆေၚ်ကၠေၚ်စက် မၞုံအပ္ဍဲတွဵုရးဗွဲမဂၠိုၚ်ဂှ် ဂကူကၠေၚ်ဓာတ် 92 ကဵု 95 ပိုတ်အိုတ်ဂှ် ဒးဂဗဒၟံၚ်ဂၠိုၚ်အိုတ်တုဲ ပ္ဍဲကဵုဆေၚ်လ္ၚဵုတံဂှ် စနူကဵုဒဳဇြေဝ် ဂကူပရဳမဳယာန်တံ ပိုတ်အိုတ်ဒၟံၚ်ဂှ် ဂွံတီကေတ်ရ။

စပ်ကဵုကၠေၚ်စက်ပိုတ်အိုတ်ဂှ်တုဲ ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန်ဂှ် ဗ္ၜတ်အရၚ်ကၠေၚ်စက်တံဂှ် ဖအောန်ဖျေံဟွံသေၚ်တုဲ ပရေၚ်စၟဳတ်ဒၟံၚ်မွဲရ နွံတုဲ ကဵုဒၟံၚ် အတိုၚ်သၞောတ်တြေံရဂှ် ဟီုဂးလဝ်ကဵု ပ္ဍဲလိက်ပရိုၚ်တြးဝါဒ ပ္ဍဲဂိတုနဝ်ဝေမ်ဗာ ၁၃ တေံရ။

သ္အာၚ်နူဂှ်ပၠန် ကၠေၚ်စက် 92 ရပ်စပ်လေဝ်ဂၠိုၚ် အပ္ဍဲဍုၚ်ဂှ်လေဝ် ရုမ်မ်ဂပ်ပ်နွံဂှ်ဝွံ အပ္ဍဲဍုၚ်ဂှ် ၁၃ ပြကောဋိကိုဋ်ဂါလာန်ပြၚ် သှ်ေဒၟံၚ်တုဲ ဒဳဇြေဝ်ဂှ်လေဝ် ၃၀ ပြကောဋိကိုဋ်ဂါလာန်ပြၚ် နွံတုဲ က္ၜၚ်ဖ္ဍိုက်ကၠေၚ် ၁၅ ဖ္ဍိုက် ထပ်သ္ဂောံစိုပ်နွံဂှ် သ္ဂးရ။

ကၠေၚ်စက်ဂကူလဵုဟွံဟီု အပ္ဍဲဍုၚ်ဂှ် ကွက်မွဲဂိတုဂှ် စွံလဝ်လၟိုန်တုဲ သွက်ဂွံရာန်ကေတ်ကၠေၚ်စက်မာန်ဂှ်လေဝ် သွံတြးကဵုဒၟံၚ်ဒဝ်ဠာတံ အတိုၚ်တြေံရဂှ် ကံၚ်ဇြဳပၞာန် ဟီုဂးဒၟံၚ်ကီုလေဝ် နတဲဏံဂှ် သက်ဂွံရာန်ကေတ်ကၠေၚ်စက်ရဂှ် အခက်အခုဲနွံကၠုၚ်ရ။

ကၠေၚ်စက်ဝွံ ကြဴနူဒပ်ပၞာန်သီအဝဵုတုဲ ၚုဟ်သၠုၚ်တိုန်ကၠုၚ် ၄ ဆပြၚ်တုဲ ၚုဟ်ဟွံညိၚ်ဝတ်တံကဵု ဒဒှ်မပိုတ်အိုတ်တံဂှ်လေဝ် က္တဵုဒှ်ဒၟံၚ် မွဲဏှမွဲဏှရ။

ပရိုၚ်−သြၚ်လောန်တိုၚ်(မ်)

ဗီု−TLT