သွက်ဂွံတာဒၞါ ပရေၚ်ဘပဠ ကိုဝ်ရဳယျာသၟဝ်ကျာတံဂှ် အမေရိကာန် ကေုာံ ကိုဝ်ရဳယျာသၠုၚ်ကျာတံ ကလေၚ်ပလေဝ်ပလေတ်

သဵု(လ်) ၊ နဝ်ဝေမ်ဗာ ၁၃

သွက်ဂွံတာဒၞါ ပရေၚ်ဘပဠကမ်လှောဝ် ကေုာံ နျူကလဳယျာ ကိုဝ်ရဳယျာသၟဝ်ကျာ မဂၠိုၚ်တိုန်ကၠုၚ်ဂှ် ဒဒှ်ရကလေၚ်ပလေဝ်ပလေတ်လဝ် တၚ်တုပ်စိုတ်ပရေၚ်ဂီုကၠီုၜါဍုၚ်ရောၚ် ဌာနဝန်ဇၞော်ကာစဵုဒၞါကိုဝ်ရဳယျာသၠုၚ်ကျာ ဟီုဂးလဝ်ရ။

အပ္ဍဲပေါဲသဳကၠဳ ဂိတုနဝ်ဝေမ်ဗာ ၁၃ ကိုဝ်ရဳယျာသၠုၚ်ကျာကဵု အမေရိကာန်တံဂှ် တုပ်လဝ်စိုတ်သာ်ဏံရောၚ် ဂွံတီကေတ်ရ။

ဗျူဟာတာဒၞါ TDS မရန်တၟံလဝ် သွက်ဂွံကလေၚ်ခၠေဝ် ကုပရေၚ်ဘပဠလွဟ်လက်နက်နျူကလဳယျာ ကိုဝ်ရဳယျာသၟဝ်ကျာတံဂှ်ဝွံ ဒှ်တၚ်တုပ်စိုတ် ၜါဍုၚ်ထ္ပက်လဝ်စၟတ်တဲ လောန်ကၠုၚ် နူကဵု ၁၀ သၞာံပြၚ်တေံမွဲရ။

တၚ်တုပ်စိုတ် ကဆံၚ်လက္ကရဴအိုတ် မကလေၚ်ပလေဝ်ပလေတ်လဝ်ဏံဂှ် ဝန်ဇၞော်ကာစဵုဒၞါကိုဝ်ရဳယျာသၠုၚ်ကျာ ယှေန်ဝါန်သေတ် ကေုာံ ဝန်ဇၞော်ကာစဵုဒၞါအမေရိကာန် လွိုက်အဝ်သတေန်တံ ထ္ပက်လဝ်စၟတ်တဲ ပ္ဍဲကဵုပေါဲသဳကၠဳ စပ်ကဵုပရေၚ်ဂီုကၠီု ပ္ဍဲဍုၚ်သဵုဂှ် ဌာနဝန်ဇၞော် ဟီုဂးလဝ်ရ။

မဟာဗျူဟာဂှ်ဝွံ အစဳဇန် နျူကလဳယျာ ကေုာံ ကမ်လှောဝ်ကိုဝ်ရဳယျာသၟဝ်ကျာ မတောတက်ကၠုၚ်ဒၟံၚ် နကဵုအသိၚ်မြက်က်ဂှ် ဒၟါနူသောၚ်ကလးကဵု ဟွံမာန်ဂှ်ရ မ္ဒးကလေၚ်ပလေဝ်ပလေတ်လဝ်ရောၚ်ဂှ် ညးသ္ဂးလဝ်ရ။

ပ္ဍဲအခိၚ်မပြဟ်ပြေဟ်တေံ ယှေန် ကေုာံ အဝ်သတေန်တံဝွံ သွက်ဂွံကလေၚ်ခၠေဝ် ကုပရေၚ်ဘပဠ ကိုဝ်ရဳယျာသၟဝ်ကျာဂှ် သဳကၠဳအာ သွက်ကေၚ်ကာဗျူဟာ မတာဒၞါသၠုၚ်ပ္တိုန်အာဂှ်ကီု သီုကဵုပရေၚ်ပံၚ်တောဲခၠေဝ်ပလန်တံရောၚ်ဂှ် ဌာနဝန်ဇၞော်ကာစဵုဒၞါကိုဝ်ရဳယျာသၠုၚ်ကျာ သ္ဂးလဝ်ရ။

ပ္ဍဲကဵုဗျူဟာဏံဂှ် အခိၚ်သၠုၚ်ပ္တိုန်အသိၚ် ကၠောန်ၜိုတ်ဒၟံၚ် အစဳဇန်နျူကလဳယျာ ကေုာံ ကမ်လှောဝ်ထိၚ်သၞေဝ် ကိုဝ်ရဳယျာသၟဝ်ကျာတံဂှ် ကၟိန်ဍုၚ်အမေရိကာန်ဂှ် သွက်ဂွံတဝ်စၞေဟ်စဵုဒၞါ မဟာမိတ်ညးဂှ် ရပ်စပ်စကာအာ လွဟ်လက်နက်ပရေၚ်ပၞာန် စှ်ေကဵုမဟာဗျူဟာ သီုကဵုကောန်ဂကောံဒပ် နျူကလဳယျာတံဏောၚ်ဂှ် သ္ဂးလဝ်ဗိုန်န်ခိုၚ်ၚ်ရ။

ကၟိန်ဍုၚ်ၜါဍုၚ် ဒဒှ်ရသၠုၚ်ပ္တိုန်လဝ် ပရေၚ်ရေၚ်တၠုၚ်ပံၚ်တောဲပရေၚ်ဂီုကၠီု ပါလုပ်သီုကဵု ပရေၚ်ထ္မံက်ရုပ်ရဴ ဗျူဟာတာဒၞါ မသၠုၚ်ပ္တိုန်ဂှ်ကဵု ပရေၚ်ဒက်ပ္တန် ဂကောံကဵုကသပ်နျူကလဳယျာ NCG ဂှ် ဌာန်ပရိုၚ်ယောန်ဟက် ထ္မံက်ထ္ၜးလဝ်ရ။

အပ္ဍဲကာလဟွံလအ်ဏီတံဂှ်လေဝ် ပ္ဍဲကဵုပရေၚ်ပ္ကတ်ပ္ကေၚ် ပရေၚ်ပၞာန်သၠဲပ္တိုန် ကုကၟိန်ဍုၚ်ပံၚ်ကောံအမေရိကာန်ဂှ် ထ္ၜးပျးလဝ် ဒဒှ်မသၠုၚ်ပ္တိုန် ပရေၚ်ပံၚ်တောဲရေၚ်တၠုၚ် ပါလုပ်သီုကဵုက္ၜၚ်ဗၠိုပ်ဍာ် မဗ္ဂပ်စုတ်လဝ်ကမ်လှောဝ်ထိၚ်သၞေဝ် နျူကလဳယျာ ကေုာံ က္ၜၚ်ကျာထောံမခတိုဟ် မစှ်ေကဵုဗျူဟာတံဂှ် ထ္မံက်ထ္ၜးလဝ် ပ္ဍဲပရိုၚ်ယောန်ဟက်ရ။

ပေါဲပၞာန်အေဿရေ−ဟာမာသ် ကေုာံ ပရေၚ်ပံၚ်တောဲရေၚ်တၠုၚ် ရုယှာ ကေုာံ ကိုဝ်ရဳယျာသၟဝ်ကျာတံ သၠုၚ်တိုန်ကၠုၚ်တံဂှ်ဝွံ က္တဵုဗဒှ်ကဵု ပရေၚ်ဆဵုဂဗသာ်ဏံရ။

ညံၚ်ရဴဂကောံဟာမာသ်တံ ဗ္တိုက်လဝ်ဂှ်ကီု လ္ပာ်ကိုဝ်ရဳယျာသၟဝ်ကျာတံ ကၠောန်သ္ပကၠုၚ် ပရေၚ်ဗ္တိုက် ဗွဲမအံသဝ်တံမာန်တုဲ ဇၟာပ်ပ်ပရေၚ်ဂၠါဲသၞတံဂှ် ဒးဒတူလိုၚ်အာ ကုမဟာမိတ်တံဏောၚ်ဂှ်လေဝ် သမ္မတကိုဝ်ရဳယျာသၠုၚ်ကျာ ယောန်သက်ယော ဟီုဂးလဝ် ပ္ဍဲပေါဲစသုၚ်စၞဖာသဝ်တ္ၚဲ ဂိတုနဝ်ဝေမ်ဗာ ၁၂ တေံရ။

သ္ကိုပ်က္ဍိုက်ပ်ကာစဵုဒၞါ နူကဵုကိုဝ်ရဳယျာသၠုၚ်ကျာ၊ ဂျပါန် ကေုာံ အမေရိကာန်တံဝွံ စပ်ကဵုကမ်လှောဝ်ကိုဝ်ရဳယျာသၟဝ်ကျာတုဲ အစဳဇန်ပါ်ပရအ်ဒေတာ မွဲဒမြိပ်အခိၚ်ဂှ် တုပ်လဝ်စိုတ် သွက်ဂွံစအာ ပ္ဍဲဂိတုဒဳဇြေမ်ဗာဂှ် ဌာနဝန်ဇၞော်ကာစဵုဒၞါကိုဝ်ရဳယျာသၠုၚ်ကျာ ဟီုဂးလဝ်ရ။

Ref: Reuters