ပ္ဍဲတိဍာ် KNU ဟိုတ်နူ​လွဟ်ဇၞော်စှ်ေတုဲ ကောန်အရာပ် ဒးချိုတ်လဝ် (၁) တၠ ဒးလဝ်ဘဲဝပ် ၃ တၠ

ညံၚ်လေဝ်ပေန်၊ နဝ်ဝေမ်ဗာ (၁၅)

ပ္ဍဲကဵုတိဍာ်ထိၚ်ဒဝ် ဗော်သွးကောန်ဂကူကရေၚ် KNU ခရိုၚ်ညံၚ်လေဝ်ပေန် ဒပ်မဟာ (၃) ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ကောန်အရာပ် ဒးချိုတ်လဝ် (၁) တၠတုဲ ဇီုကပိုက်ဒးလဝ်ဘဲဝပ် (၄) တၠရဂှ် ဗဟဵု KNU လလောၚ်တြးလဝ်ပရိုၚ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၂) ဂှ် ပ္ဍဲပွိုၚ်ဍုၚ်မုမ် KNU ဟိုတ်နူလွဟ်ဇၞော်ကံၚ်ဇြဳပၞာန် ဒတုံစှ်ေပါ်ခတိုဟ်လဝ်တုဲ ညးဒေသ နူကဵုကွာန်တေန်နှဳကျောၚ် (၂) တၠ ဒးလဝ်ဘဲဝပ်ကဝေက်မကမ်တုဲ ပ္ဍဲကဵုကွာန်ဝေတ်တူဂှ်လေဝ် သ္ၚိဒၟံၚ်ညးဒေသ (၂) တၠ (၂) မ ဒးကဝေက်မကမ် ဒးလီုလာ်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး KNU ရ။

သ္အာၚ်နူဂှ်ပၠန် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၁၃) အခိၚ် (၄) နာဍဳ ကဝက် ဇိုၚ်သဝ်တ္ၚဲဂှ်လေဝ် နူတံဒပ်ကံၚ်ဇြဳပၞာန် ခမရ-၃၀၇ ပန်ဖျေံလဝ်လွဟ်ဇၞော် ၁၂၀-မမ သီုပန်ပှော်လဝ် ပ္ဍဲကွာန် ဒၞာဲညးဍုၚ်ကွာန်တအ် မံၚ်တန်တဴဒၟံၚ်ဂှ် ဒတုံစှ်ေပါ်ခတိုဟ်လဝ် ပ္ဍဲကွာန်ဂွေကုမ်တုဲ ကောန်ဒေသ ညးဗြဴ (၂) တၠ ဒးလဝ်ဘဲဝပ်ကဝေက်မကမ်ရဂှ် ဓမံက်ထ္ၜးလဝ်ပ္ဍဲတၚ်လလောၚ်တြးရ။

ပ္ဍဲတ္ၚဲဂှ်ဟေၚ် တံဒပ်ကံၚ်ဇြဳပၞာန် ခမရ-၅၉၈ မၞုံဗ္ဒာဲကွာန်ဇလုပ်ဂျဳဂှ် ပန်ဖျေံလဝ်လွဟ်ဇၞော် ၈၁-မမ ပ္ဍဲကဵုကွာန် (၄) မဂှ် ဒတုံစှ်ေပါ်ခတိုဟ်လဝ် ပ္ဍဲဝါဗ္ၚ (မၞုံသြၚ်မွဲလ္ပာ် ကွာန်ချောၚ်ဝ) ဝါသ္ကုတ်ကွာန်ယှာန်သု ပါ်ခတိုဟ်လဝ်တုဲ ကောန်ကွာန်ချောၚ်ဝ (၁) တၠ ဒးလဝ်ကဝေက်လွဟ်ဇၞော်တုဲ ဒးချိုတ်လဝ်ဂှ် ဂွံတီကေတ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၁) ဂှ်လေဝ် ဒပ်ကံၚ်ဇြဳပၞာန် ဖျေံလဝ်သၞေဟ်ကၚ် ပ္ဍဲဂၠံၚ်ကွဳစက်သဌေကုမ်၊ ပွိုၚ်ဍုၚ်ကျောက်ဂျဳ KNU ဂှ် သီုဟိုတ်ဟၟဲမွဲသာ် ရပ်ကေတ်လဝ်ကောန်ကွာန်ၚဖေဝ်အေန် ဃောအာရာန်ကပေါတ်ကွဳလိုန်ဓာတ် လ္တူဍုၚ်တုဲ စဵုကဵုအခိၚ်လၟုဟ် ဟွံဂွံက္လေၚ်ဗလးကဵုဏီရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲပွိုၚ်ဍုၚ်မုမ်၊ ပွိုၚ်ဍုၚ်ကျောက်ဂျဳကဵု ပွိုၚ်ဍုၚ်ယှိုဲကျေန် မၞုံခရိုၚ်ညံၚ်လေဝ်ပေန် KNU ဂှ် ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကဵုကွာန်တအ် အဆက်ဟွံပိုတ်သ္ကုတ် နွံဒၟံၚ်ရဂှ် KNU ဟီုရ။

သ္အာၚ်နူဂှ်ပၠန် ညးဍုၚ်ကွာန် တိုန်အာရာန်ဖျာ ပ္ဍဲဍုၚ်တအ်ဂှ်လေဝ် ရပ်ကေတ်ဒၟံၚ်ကီု သီကေတ်ဒၟံၚ်ကပေါတ် ဗွဲအဓမ္မကီု သီုကဵုအာတ်မိက်ဒၟံၚ်သြန် နွံဒၟံၚ်ရဂှ် ဂွံတီကေတ် အတိုၚ်တၚ်လလောၚ်တြး KNU ရ။

ပရိုၚ် – သြၚ်လောန်တိုၚ်မ်

ဗီု -KNU