အလုံတံဒပ်ကံၚ်ဇြဳပၞာန် ခမရ (၁၂၉) မွဲ သီုကဵုဂကောံသ္ၚိကၟိန်တအ် လုပ်ကၠုၚ်ဖျေံလွဟ်

လောက်ကိုၚ်၊ နဝ်ဝေမ်ဗာ(၁၅)

ဒေသတၟေၚ်ကိုဝ်က (၁) ဒေသယှဳယှာန်၊ တံဒပ် (၁၂၉) သၟဝ်တဲ ဒကစ (လောက်ကိုၚ်) နူကဵုကွာန်ယာန်ခွောန် ဂကောံကွာန်မာန်ဠဝ်ဂှ် အလုံတံဒပ်မွဲ သီုကဵုဂကောံသ္ၚိကၟိန်တအ် လုပ်ကၠုၚ်ဖျေံလဝ်လွဟ် ဇရေၚ် MNDAA ရဂှ် ဂကောံမဟာမိတ်ကောဒေံပိဂကောံ လလောၚ်တြးပ္တိတ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၄) အခိၚ်ဇိုၚ်သဝ်တ္ၚဲရ။

သ္ကိုပ်တံဒပ် သ္ကိုပ်ဗိုလ်ကျဝ်ယျေဝ်အောၚ် က္ဍိုက်လဝ်က္ဍိုပ် ပါလုပ်သီုသၞာဲဒဴဴ ဂကောံသ္ၚိကၟိန် နူတံဒပ်ပၞာန်တိုက်ကံၚ်ဇြဳပၞာန် စၟတ်(၁၂၉) အပံၚ်လၟိဟ် (၂၆၂) တၠတအ်ဂှ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၁၂) အခိၚ်ဗ္တံဂှ် ဆက်စၠောံကဵု ဂကောံကိုဝ်က MNDAA တုဲ လုပ်ကၠုၚ်ဖျေံလဝ်လွဟ်ရ။

ပ္ဍဲကဵုတံဒပ်ဂှ် ကောန်ဒပ်ကံၚ်ဇြဳပၞာန် ၁၂၆ တၠကဵု ဂကောံသ္ၚိကၟိန်ဒပ်ပၞာန် ၁၃၄ တၠ ပါလုပ်တုဲ သ္ကိုပ်ဗိုလ်ကျဝ်ယျေဝ်အောၚ် က္ဍိုက်လဝ်က္ဍိုပ်ညးတအ် လုပ်ကၠုၚ်ဖျေံလဝ်လွဟ်ဂှ် အလုံညးဍုၚ်ကွာန်ကၟိန်ဍုၚ်ဗၟာမွဲ ပ္တိုန်ဂုဏ်စရာဲစၟတ်သမ္တီ နဒဒှ်သ္ဂံၚ်အာဇာနဲ လၟိုန်ရဂှ် ဂကောံမဟာမိတ်ကောဒေံပိဂကောံ ကဵုလဝ်သမ္တီရ။

“ပ္ဍဲကဵုဝၚ်တှ်ေ ပ္ဍဲခေတ် ဗကပ ရ ကေၚ်နွံကၠုၚ်၊ အခိၚ်ဂှ်တှ်ေ လုပ်အာဂြိုပ်လေဝ်၊ လၟုဟ်ဂှ်တှ်ေ သီုတံဒပ်မွဲ ဖျေံလွဟ်ဒုၚ်ကျလေဝ်၊ တုပ်ဂှ် ဍေံဟွံတုပ်ပုဟ်၊ အလန်ပထမကၠာအိုတ် ဟီုစဂွံရ” ဂှ် ညးတာလျိုၚ်လလောၚ်ပရိုၚ် ABSDF Column 3 ကိုဝ်ပျိဖျိုဝ်ကျဝ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ညးကၠုၚ်ပံၚ်တောဲကဵုညးဍုၚ်ကွာန်တအ်ဂှ် ဂကောံမဟာမိတ်ကောဒေံပိဂကောံ အပ်ပြာပ်ကဵုလဝ် မွဲမွဲတၠ ပါဲနူသြန် ၁၀ ကိုတ်တုဲ ဂကောံသ္ၚိကၟိန်ဒပ်ပၞာန်တအ်ဂှ်လေဝ် မွဲတၠမ္ဂး ကဵုလဝ် သြန် (၁) ကိုတ်တုဲ ညးပရေၚ်ထတ်ယိုတ် ယောၚ်ယာဒၟံၚ်တအ်ဂှ် ရေၚ်တၠုၚ်မၚ်မွဲကဵုလဝ်ပရေၚ်ထတ်ယိုတ် ဗွဲမသက္ကုၚုဟ်မးရဂှ် ဂွံတီကေတ်ရ။

ဂကောံမဟာမိတ်ကောဒေံပိဂကောံဂှ် ညံၚ်ကောန်ဒပ်ကံၚ်ဇြဳပၞာန်တအ် ဂွံဖျေံလွဟ်ကီု သီုသွက်ဂွံပံၚ်တောဲကဵုညးဍုၚ်ကွာန်တအ်ဂှ် ကဵုလဝ်သတိတုဲ ကောန်ဒပ်ကံၚ်ဇြဳပၞာန်ကဵု ဗၠာဲသၟိၚ် ကၠုၚ်စိုပ်ပံၚ်တောဲလဝ် ကုညးဍုၚ်ကွာန် စဵုကဵု ၂၀၀ ပြၚ်နွံ ရဂှ်ဂွံတီကေတ်ရ။

ပရေၚ်တံဒပ် ခမရ (၁၂၉) လုပ်ကၠုၚ်ဖျေံလဝ်လွဟ် သီုအလုံမွဲဒပ်ဂှ် ကြဴနူဒပ်ပၞာန်သီအဝဵုတုဲ သ္ကုတ်လကြဴဏံ ဒှ်ပရေၚ်တံဒပ်ကံၚ်ဇြဳပၞာန် အလုံမွဲတံဒပ် လုပ်ကၠုၚ်ဗ္ဒာဲဒလာဲ ဇရေၚ်ဂၠံသြိုဟ်ညးဍုၚ်ကွာန်တအ် အလန်ကိုပ်ကၠာအိုတ်ရ။

ပရိုၚ် – သြၚ်လောန်တိုၚ်မ်

ဗီု – 3 Bortherhood Alliance