သြန် ဂကောံဇြဟတ်ပၠန်ဂတးတအ် သီဂွံလဝ် အပံၚ်လၟိဟ် (၉၅၀) ပြကောဋိကိုတ်ဒ္ကေဝ်ပြၚ်ဂှ် တိုက်သြန်ဗဟဵုကာလအကြာ သီဂိုၚ်ဒေပ်လဝ်

ကဝ်လေန်၊ နဝ်ဝေမ်ဗာ (၁၅)

အပံၚ်လၟိဟ်သြန် ၉၅၀ ပြကောဋိကိုတ်ဒ္ကေဝ်ပြၚ် မသြန်သှ်ေ တိုက်သြန်မျာန်မဇြဳပွာယျေ ခရိုၚ်ကဝ်လေန်၊ ရးဒေသသေတ်ဂါၚ် ဂကောံဇြဟတ်ပၠန်ဂတးတအ် သီဂွံလဝ်ဂှ် တိုက်သြန်ဗဟဵုအလဵုအသဳညဳသၟဟ်ကောန်ဂကူ ပ္တိုန်လဝ်စရၚ်စၟတ်သမ္တီ သီဂိုၚ်လဝ်ရဂှ် တိုက်သြန်ဗဟဵုကာလအကြာ လလောၚ်တြးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၄) အခိၚ်ဒေါဝ်တ္ၚဲ တ္ၚဲဏံရ။

ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ ၆ တုဲကၠုၚ်တေံဂှ် နကဵုအစဳဇန်ပရေၚ်ကောပ်ကာဲ ခရိုၚ်ကဝ်လေန်၊ ဒေသပၞာန်စၟတ် (၁) ဂှ် ဒပ်ပၞာန်ဗၠးၜးကောန်ကဂကူကချေၚ် (KIA)၊ ဒပ်ပၞာန်စဵုဒၞာညးဍုၚ်ကွာန် (PDF)၊ ဂကောံစဵုဒၞာညးဍုၚ်ကွာန် (ပကဖ) ကဵုဂကောံ ဇြဟတ်ပၠန်ဂတးတအ် ဗတိုက်သီကေတ်လဝ် ဍုၚ်ကဝ်လေန်၊ ခရိုၚ်ကဝ်လေန်၊ ရးဒေသသေတ်ဂါၚ်ရ။

ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၈) ဂှ် အလဵုအသဳညဳသၟဟ်ကောန်ဂကူ၊ ဥက္ကဋ္ဌကဝ်မတဳပရေၚ်အုပ်ဓုပ်ဒေသန္တရကာလအကြာ၊ သ္ကိုပ်ဝန်ဇၞော်ကၟိန်ဍုၚ် မာန်ဝေန်ခိုၚ်တာန်ဂှ် နကဵုအသံပၟိၚ် စၟတ် (၁/၂၀၂၃) ဒက်ပ္တန်အပ်ပြာပ်ကဵုလဝ်တာလျိုၚ် ဂကောံပ္ညဳပ္ညပ်ပံၚ်ဗစပ် ပရေၚ်အုပ်ဓုပ်ခရိုၚ်ကဝ်လေန်ကာတၟေၚ်ရ။

ရေၚ်တၠုၚ်ဒ္ဂေတ်ဗက်လဝ် အတိုၚ်တၚ်စဳမာန် လၟေၚ်ကမၠောန် ပရေၚ်အုပ်ဓုပ်ညးဍုၚ်ကွာန် ဆေၚ်ကဵုသွာၚ်ဘဏ္ဍာ (SOPs-Standard Operating Procedure) နူဂကောံပ္ညဳပ္ညပ်ပံၚ်ဗစပ် ခရိုၚ်ကဝ်လေန်တုဲ သီဂွံလဝ် မသြန်သှ်ေ တိုက်သြန်မျာန်မဇြဳပွာယျေ ခရိုၚ်ကဝ်လေန် အပံၚ်လၟိဟ် (၉၅၂.၃၄၃) ဒ္ကေဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

နအလဵုတိုက်သြန်ဗဟဵုကာလအကြာ အလဵုအသဳညဳသၟဟ်ကောန်ဂကူဂှ် မသြန်သှ်ေ ဒုၚ်တဲသီဂိုၚ်လဝ်တအ်ဂှ် ပ္တိုန်လဝ်စၟတ်သမ္တီတုဲ ညံၚ်သြန်ဘဏ္ဍာကၟိန်ဍုၚ်ကဵု သြန်ညးဍုၚ်ကွာန် အပ်စွံလဝ်တအ် ဟွံဂွံဆောံလေၚ်အာဂှ် စဳမာန်ဒၟံၚ်သၞောတ်စှ်ေစှ်ေရဂှ် တိုက်သြန်ဗဟဵု အလဵုအသဳညဳသၟဟ်ကောန်ဂကူ လလောၚ်တြးလဝ်ရ။

ပရိုၚ် – သြၚ်လောန်တိုၚ်မ်

ဗီု – CBM