AA သီဂွံလဝ် ဗဒိုပ်ကံၚ်ဇြဳပၞာန် (၃) ဗဒိုပ်၊ ရပ်ဂွံလဝ်ကောန်ဒပ်ကံၚ်ဇြဳပၞာန် စှ်မွဲတၠ ပါလုပ်သီုဒုသ္ကိုပ်တံဒပ်

​

သေတ်တွေ – နဝ်ဝေမ်ဗာ(၁၅)

ဂကောံကောန်ဂကူရခေၚ်/ဒပ်ပၞာန်ရခေၚ် (ULA/AA) ဂှ် ပ္ဍဲကဵုပေါဲဗတိုက် တွဵုရးရခေၚ်ပွိုၚ်ၜါတ္ၚဲဂှ် သီကေတ်လဝ်ဗဒိုပ်ကံၚ်ဇြဳပၞာန် ပိဗဒိုပ်မာန်လဝ်တုဲ ရပ်ဂွံလဝ်ကောန်ဒပ်ကံၚ်ဇြဳပၞာန် စှ်မွဲတၠ ပါလုပ်သီုဒုသ္ကိုပ်တံဒပ်ကံၚ်ဇြဳပၞာန်ရဂှ် လလောၚ်တြးပ္တိတ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၄) တ္ၚဲဏံရ။

သ္အာၚ်နူဂှ်ပၠန် ညးကၠုၚ်လုပ်စိုပ်ဖျေံလွဟ် နူကဵုလ္ပာ်ကံၚ်ဇြဳပၞာန်တအ်ဂှ်လေဝ် ဆက်ဒုၚ်တၠုၚ် ဒုၚ်အာတဲရောၚ်ဂှ် ဟီုလဝ်ရ။

ပ္ဍဲကဵုတၚ်လလောၚ်တြး AA ဂှ် ပ္ဍဲဒေသရခေၚ် ဒပ်ကံၚ်ဇြဳပၞာန်ကဵု ဒပ်ပၞာန်ရခေၚ်တအ်ဂှ် ဒှ်ဒၟံၚ်ပေါဲဗတိုက် ပ္ဍဲဒၞာဲ (၅) ဒၞာဲ မၞုံပွိုၚ်ဍုၚ်ယျတေံတံၚ်၊ မံၚ်တဝ်ကဵု ပွိုၚ်ဍုၚ်မေန်ပျာတအ်တုဲ သီဂွံလဝ် ဗဒိုပ်ဒပ်မၚ်ပယျဵုဒုမ်ပိုက်ဂှ်ရဂှ် လလောၚ်တြးလဝ်ရ။

ဗဒိုပ်ဒပ်မၚ်ပယျဵုခါလဳဂှ်လေဝ် တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၁၄)၊ အခိၚ်နူဂယး ၜိုတ် (၇)နာဍဳကဝက်ဂှ် သီဂွံလဝ်ပေၚ်ပေၚ်ရဂှ် ဟီုဂးလဝ်ရ။

သ္အာၚ်နူဂှ်ပၠန် ပ္ဍဲပေါဲဗတိုက် ပွိုၚ်ဍုၚ်မေန်ပျာ (၂)ပေါဲဂှ် ပါလုပ်သီု သ္ကိုပ်ဗိုလ်တာန်ဇြေန်ထောန် (ဒု-သ္ကိုပ်တံဒပ်) တိုက်-၄၁၅၉၇၊ ဗိုလ်ဇၞော် ဖျိုဝ်ဇြေယျာလှိုၚ်(သ္ကိုပ်ဒပ်ကောံ) တိုက်-၅၀၇၃၂၊ နူကဵုတံဒပ်ကံၚ်ဇြဳပၞာန် ခမရ (၃၄၄)၊ ဖျေံသ္ဇိုၚ်သေတ်တွေတအ် ရပ်ဂွံလဝ်နဒဒှ်ဂၠုဲပၞာန် အပံၚ်လၟိဟ် (၁၀)တၠရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ပ္ဍဲကဵုပေါဲဗတိုက်ဏံ နူလ္ပာ်ကံၚ်ဇြဳပၞာန် ဒးချိုတ်လဝ် (၁၀) တၠပြၚ်တုဲ မၞိဟ်ဒးလဝ်ဘဲဝပ်တအ်လေဝ် မၞိဟ်ဂွံဆဵုလဝ်နွံရဂှ် ဟီုလဝ်ရ။

နဒဒှ်ပေါဲဗတိုက်ပါဲနူဂှ် ဒှ်လဝ်ပေါဲဗတိုက်ကဵုတံဒပ် ခလရ (၂၃၂) ဗ္ဒာဲကွာန်တေန်ဗဝ်လှ၊ သ္ကုတ်သၟဝ်ကျာ ဍုၚ်မံၚ်တဝ်တုဲ နူကဵုလ္ပာ်ကံၚ်ဇြဳပၞာန် ပါလုပ်သီု ဒု-သ္ကိုပ်ကရောၚ်ပၞာန် ကျဝ်တေတ်နိုၚ် ဒးချိုတ်လဝ် ၜိုတ် (၁၄) တၠတုဲ ရပ်ဂွံလဝ်ဂၠုဲပၞာန် မွဲတၠ၊ ဂွံလဝ်လွဟ်လက်နက်မကမ်၊ ကပေါတ်အရပ်စပ်ပၞာန်တအ်ရဂှ် ဟီုလဝ်ရ။

နကဵု AA ဂှ် ပါလုပ်သီုသၞာဲဒဴ ကောန်ဒပ်ကံၚ်ဇြဳပၞာန် ရပ်ဂွံလဝ်သီုဖအိုတ်တအ်ဂှ် မၚ်မွဲကဵုလဝ် ဗွဲမကိတ်ညဳကဵု သၞောဝ်ဥပဒေဂၠုဲပၞာန် ကၟိန်ဍုၚ်နာနာရဂှ်လေဝ် ဓမံက်လဝ်ပ္ဍဲလလောၚ်တြးရ။

ပ္ဍဲကဵုပေါဲဗတိုက်ပွိုၚ်ၜါတ္ၚဲဂှ် ကောန်သ္ဂံၚ် နူဒပ်ပၞာန်ရခေၚ် ဒးပြဟ်လလုဲလဝ် (၆) တၠရဂှ်လေဝ် ဂွံတီကေတ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၃) ဂှ် ကောန်ဒပ်ဗၠာဲသၟိၚ် နူကဵုဗဒိုပ်ဗၠာဲသၟိၚ် အပေါက်ဝ သၟဝ်တဲကံၚ်ဇြဳပၞာန် မၞုံပွိုၚ်ဍုၚ်အပေါက်ဝ (၂၂) တၠ၊ ကောန်ဒပ်ဗၠာဲသၟိၚ် နူဗဒိုပ်တၞဟ်သ္အာၚ် (၆) တၠ ဒဒှ်ရလုပ်ကၠုၚ်ဖျေံလဝ်လွဟ် ဇရေၚ် AA သီုလွဟ်လက်နက်တအ်ကီု ပါဲနူဏံ ညးလုပ်ကၠုၚ်ဖျေံလွဟ်တအ်ဂှ်လေဝ် ဆက်တုဲ ဒုၚ်တၠုၚ်ဒုၚ်အာတဲရောၚ်ဂှ်လေဝ် AA ဟီုလဝ်ရ။

ပ္ဍဲကဵုပေါဲဗတိုက်ရခေၚ်တ္ၚဲ ပထမဂှ် ဒပ်မၚ်ပယျဵု၊ ဗဒိုပ်ဗၠာဲသၟိၚ် သၟဝ်တဲကံၚ်ဇြဳပၞာန် အပံၚ်လၟိဟ် ဗ္ဒာဲ (၄၀) ဗဒိုပ် ဒးဗလးထောံလဝ်တုဲ ဗဒိုပ်ကံၚ်ဇြဳပၞာန် ကြပ်ညောန်ကဵု ဗဒိုပ်ဗၠာဲသၟိၚ် (၃) ဗဒိုပ်တအ်ဂှ် ဒဒှ်ရပံၚ်ကောံလဝ် နဒဒှ်မွဲဗဒိုပ်ဂှ်ရ နကဵု AA ဂှ် ညးဟွံဒုၚ်ကမျ ဟွံဖျေံလွဟ်တအ်ဂှ် ဆက်ဗတိုက်အာရောၚ်ဂှ်လေဝ် ဟီုသ္ဂးလဝ်ရ။

ပ္ဍဲကဵုတၚ်လလောၚ်တြး AA ဂှ် ပ္ဍဲပွိုၚ်ဍုၚ်တောၚ်ကုပ်၊ တာန်တွဲ၊ ဂွ၊ ရာမ်ဗြဲကဵု ပွိုၚ်ဍုၚ်ကျောက်ဖျူတအ်ဂှ် ကောန်အရာပ်ဒှ်သံသယ ဆက်စပ်ကဵု ULA/AA တအ် ကံၚ်ဇြဳပၞာန် စွံလဝ်တၚ်ပ္တဝ် ပရေၚ်ဂၠိုက်ဂၠာဲရပ်စပ်ဒၟံၚ် ကၠောန်သ္ပကၠုၚ်ဒၟံၚ်ရဂှ်လေဝ် ဟီုလဝ်ရ။

ပရိုၚ် – သြၚ်လောန်တိုၚ်မ်

ဗီု – AA