ပ္ဍဲပေါဲဗတိုက်ၜါသွာၚ် ကောန်ဒပ်ကံၚ်ဇြဳပၞာန် (၂၃) တၠ ဒုၚ်ကမျဖျေံလဝ်လွဟ်

ကျာ်မြဟ်၊ နဝ်ဝေမ်ဗာ (၁၅)

ပၞောဝ်ကဵုကောန်ဒပ်ကံၚ်ဇြဳပၞာန် ဇြဟတ် (၅၀) ထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်ၜါသွာၚ်၊ ပွိုၚ်ဍုၚ်ကျာ်မြဟ်၊ တွဵုရးဍုၚ်မန်ဂှ် ဒုၚ်ကမျဖျေံလဝ်လွဟ် (၂၃) တၠရဂှ် ဌာနဝန်ဇၞော်ပရေၚ်စဵုဒၞာ အလဵုအသဳညဳသၟဟ်ကောန်ဂကူ NUG လလောၚ်တြးလဝ် ပ္ဍဲတ္ၚဲဏံ အခိၚ်ဇိုၚ်သဝ်တ္ၚဲဂှ်ရ။

ပ္ဍဲကဵုပေါဲဗတိုက်ၜါလ္ပာ် ဒှ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၃) တ္ၚဲဏံ ပါလုပ်သီုသ္ကိုပ်တံဒပ် တံဒပ်-၂၂ ဖျေံသ္ဇိုၚ် ဘာအၚ်ကဵု သၞာဲဒဴမွဲတၠ ဒးချိုတ်လဝ် (၁၄) တၠတုဲ ရပ်ဂွံလဝ်ဂျိုၚ်ဂျိုၚ် (၅) တၠ ပါလုပ်သီုသၞာဲဒဴ (၁) တၠရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ပ္ဍဲကဵုပေါဲဗတိုက်ဏံ ပါလုပ်သီုသၞာဲဒဴမွဲတၠ ကၠေံဒၟံၚ်မၞိဟ် (၈) တၠဖိုဟ်ရဂှ် ဟီုဂးလဝ် ပ္ဍဲတၚ်လလောၚ်တြး NUG ရ။

ဗဒိုပ်ဗၠာဲသၟိၚ်တိဍာ်ၜါသွာၚ်ကဵု ဗဒိုပ်သၞေဟ်ကၚ်ဒဒန် မၞုံကွာန်ၜါသွာၚ်တအ်ဂှ် တ္ၚဲဏံ ဂကောံပံၚ်ကောံဇြဟတ်ပၠန်ဂတးတအ် ဗတိုက်သီကေတ်လဝ်တုဲ ပ္ဍဲကဵုပေါဲဗတိုက်ဂှ် ဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာ ဟွံအောန်နူ (၈) ဝါနွံရ။

ဗဒိုပ်ဏံၜါဗဒိုပ်ဂှ် ဂကောံပံၚ်ကောံဇြဟတ်ပၠန်ဂတး ပါလုပ်သီု ဒပ်ပၞာန်ဗၠးၜးကောန်ဂကူကရေၚ် KNLA တအ် စဗတိုက်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၀) တုဲ တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၁၃) အခိၚ်ဒေါဝ်တ္ၚဲဂှ် သီကေတ် ပေၚ်ၚ်မာန်လဝ်ရ။

ပရိုၚ် – သြၚ်လောန်တိုၚ်မ်

ဗီု – MOD