ပ္ဍဲတွဵုရးဍုၚ်မန်လေဝ် ပေါဲဗ္တိုက်သီဗ္ဒိုပ်တံ ဒှ်ကၠုၚ်မာန်ရောၚ် ညးခါတ်အကာဲတံ ဟီု

မတ်မလီု၊ နဝ်ဝေမ်ဗာ ၁၅

အခိၚ်ဂကောံဒပ်ပၠန်ဂတးရပ်လွဟ် ကေုာံ EAO တံ ထ္ပက်ပၞာန်ဗ္တိုက်ဒၟံၚ် ဗ္ဒိုပ်ဒပ်ကံၚ်ဇြဳပၞာန်၊ ဍုၚ်ဇၞော်ဇၞော် ကြပ်အလုံမွဲကၟိန်ဍုၚ်ဂှ် ပ္ဍဲတွဵုရးဍုၚ်မန်လေဝ် ပေါဲဗ္တိုက်သီဗ္ဒိုပ်တံ ဒှ်ကၠုၚ်မာန်ရောၚ် ညးခါတ်အကာဲပရေၚ်ပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပရေၚ်ပၞာန်သီအဝဵု ကြပ်ပေၚ် ၃ သၞာံဂှ် ကရောံချဳဒရာၚ်ပၞာန် ၁၀၂၇ နူကဵုရးသေံသ္ကုတ်သၟဝ်ကျာ မလုက်ဒွံဒး လတေၚ်ကံၚ်ဇြဳပၞာန်ဂှ် ပ္ဍဲကဵုကရေၚ်ဍာဲ၊ ချေၚ်၊ သက်ကိုၚ်၊ မဂွဵု ကေုာံ ရခေၚ်တံဂှ်လေဝ် အရိုဟ်ဒဒှ်တ္ၚဲ ဗ္ဒိုပ်ဒပ်ကံၚ်ဇြဳပၞာန်တံ ဒးဒုၚ်ဗ္တိုက်သီဒၟံၚ်ရ။

ဒုၚ်သ္ဇိုၚ်ကဵု အကာဲအရာဏံတုဲ အလုံဒေသတွဵုရးမန်မွဲလေဝ် ပေါဲဗ္တိုက်ပၞာန်ထ္ပက်တံ ကၠောံထၞာန်ကၠုၚ်မာန်ဂှ် ညးခါတ်အကာဲပရေၚ်ပၞာန်မွဲတၠ သ္ၚဳဂၠိပ်လဝ်ရ။

“ဟီုဂွံမွဲဂှ်တှ်ေ ပေါဲဗ္တိုက်တံ၊ ပၞာန်ထ္ပက်တံ ပြးထၞာန်ကၠုၚ် အလုံဒေသတွဵုရးမန်မာန်ဂှ် သ္ၚဳဂၠိပ်ကေတ်ဂွံရ။ မွဲပၠန်ဂှ် ဒဵုဗၞတ်ၜိုတ်လဵု ထိၚ်ဒက်ဗ္ဒိုပ်တံဂှ်မာန်ရောဟီုဂှ် ဟီုဝါတ်ဒၟံၚ်ဏောၚ်။ ဆ္ဂး အလုံဒေသမွဲ ပြးထၞာန်ကၠုၚ်ဂှ် ဇီုကပိုက်အာကဵု ဗ္ဒိုပ်ဒပ်ပၞာန်တံ ပၞာန်ထ္ပက်တံသီုဖအိုတ်မာန်ရောၚ်ဂှ် မ္ဒးသ္ၚဳဂၠိပ်ဏာရ” သာ်ဝွံ ညးသ္ဂးရ။

သ္အာၚ်နူဂှ်ပၠန် နကဵုကံၚ်ဇြဳပၞာန် ဒုၚ်တဝ်စၞေဟ် ကုပၞာန်ထ္ပက်ဂကောံဇြဟတ်ပၠန်ဂတးတံ နူကဵုမုက်ပၞာန်နာနာ ဗွဲမဇၞော်ကဵုဇြဟတ်တုဲ ဒးဒုၚ်ဗိုၚ်ဗ္တိုက်ဒၟံၚ်ဂှ် ဇြဟတ်စိုတ် ကောန်ပၞာန်သၟဝ်ဝ်တံဂှ်လေဝ် စှ်ေကၠုၚ်အိုတ်ဂှ် ထံက်ထ္ၜးလဝ်ရ။

ပ္ဍဲတွဵုရးဍုၚ်မန်ဂှ် ပေါဲဗ္တိုက်သီဗ္ဒိုပ်ၜါသွာၚ် မစလဝ် နူဂိတုနဝ်ဝေမ်ဗာ ၁၀ တေံဂှ်ဝွံ ဗ္ဒိုပ်ဒပ်ကံၚ်ဇြဳပၞာန်တံ၊ ဗ္ဒိုပ်ဗၠာဲသၟိၚ်တံ၊ ဗ္ဒိုပ်သၞေဟ်ကၚ်တံဟွံက ဘပဠကၠုၚ်ဒၟံၚ် သီုကဵုရုၚ်ဌာနမဆေၚ်စပ်တံကဵု ဍုၚ်ဇၞော် အလုံဒေသမန်မွဲမဒှ်ရ။

ကြဴနူဒပ်ပံၚ်ကောံမဟာမိတ်တံ ကေုာံ ဒပ်သၟဝ်တဲ KNU တံ ထ္ပက်ပၞာန်ဗ္တိုက် ဗ္ဒိုပ်ကၚ်မၞုံဒဒန်အာတ္ထရာန် (ဒဒန်ၜဳကဍတ်)ကဵု ဗ္ဒိုပ်ဗၠာဲသၟိၚ်ၜါသွာၚ် နူကဵုပွိုၚ်ဍုၚ်ကျာ်မြဟ်တံ ပွိုၚ် ၄ တ္ၚဲတုဲဂှ် ပ္ဍဲဂိတုနဝ်ဝေမ်ဗာ ၁၃ ဂှ် သီဂွံလဝ်ရ။

အပ္ဍဲပေါဲဗ္တိုက်ဏံဂှ် သ္ကိုပ်တမ်ဒပ် နူကဵုၝောံဒပ် ဖျေံသ္ဇိုၚ်ဘာအၚ် မၞုံသၟဝ်တဲ ရတခ ကံၚ်ဇြဳပၞာန်ဂှ်ကဵု သၞာဲဒဴတံ ပါလုပ်ဂှ် ၁၄ တၠ ချိုတ်အာလဝ်တုဲ ရပ်ဂွံလဝ် ၅ တၠဂှ် ဌာနဝန်ဇၞော်ကာစဵုဒၞါ NUG လလောၚ်ပ္တိတ်လဝ်ရ။

ဒဒန်ၜဳအာတ္ထရာန် မၞုံကွာန်ၜါသွာၚ် ဂကောံဇြဟတ်ပၠန်ဂတးတံ မသီဂွံလဝ်ဂှ်ဝွံ ဆက်စၠောံလဝ် လှာဒကှ်−ကျာ်မြဟ်−မုဟ်ဍုၚ်ရ။

ဗီုပြၚ်ရုပ်ရဴ ကောန်ဒပ်ကံၚ်ဇြဳပၞာန် မဒုၚ်ကျဖျေံလဝ်လွဟ် လ္တူဒဒန်တံ မဍောၚ်ၜိုတ်ဒၟံၚ်ပၞာန်ဂှ်လေဝ် ဂွံဆဵုကေတ် ပ္ဍဲကဵုဖိုၚ်ရုပ်ရမျာၚ် ပြးထၞာန်ဒၟံၚ် လ္တူဇာဇၞိက်ပရေၚ်မၞိဟ်ဂှ်ရ။

ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF နာဲနဂါဂှ် ဒပ်ပၠန်ဂတးအလုံဍုၚ်တံ ပံၚ်ကောံတုဲ ဗဒှ်ဒၟံၚ်ပေါဲဗ္တိုက်သီဍုၚ်တံဂှ်တုဲ ပ္ဍဲတွဵုရးဍုၚ်မန်လေဝ် ပေါဲဗ္တိုက်သီဗ္ဒိုပ်သီဍုၚ်တံ ဒှ်ကၠုၚ်ဏောၚ် ချိုတ်ပၠိုတ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အလုံမွဲကၟိန်ဍုၚ် မဟာမိတ်ပၠန်ဂတးတံ ပံၚ်ကောံတုဲ ဗဒှ်ဒၟံၚ်ပေါဲဗ္တိုက်သီဗ္ဒိုပ် ပေါဲဗ္တိုက်သီဍုၚ်တံဂှ်တုဲ ပ္ဍဲကဵုတွဵုရးဍုၚ်မန်ဂှ်လေဝ် ပေါဲဗ္တိုက်သီဗ္ဒိုပ်၊ သီဍုၚ်တံ ဒှ်ကၠုၚ်ဏောၚ်ဂှ် ချိုတ်ပၠိုတ်ရ။ အခိၚ်လဵု ဒှ်ကၠုၚ်ဂှ်ရော၊ ဗ္ဒိုပ်လဵုသီရောဟီုဂှ် တန်တဴကဵု လ္တူအခိၚ်အခါအကာဲအရာဲတုဲ ဂကောံပၠန်ဂတးပိုယ်တံ ပံၚ်ကောံတုဲ ထ္မံက်အာပေါဲဗ္တိုက်တံဏောၚ်” သာ်ဝွံ ညးသ္ဂးရ။

ဆ္ဂး သွက်ဂွံသီဗ္တိုက် ဍုၚ်ဇၞော် ကေုာံ ဗ္ဒိုပ်ဇၞော် ဌာန်ဂအုပ်ပၞာန်ရးအဂၞဲ မကော်ဂး ရတခ တံဂှ် ဒးဗ္တိုက်အာ ညံၚ်ရဴဒပ်မဟာမိတ်ကောဒေံသၟဝ်ကျာတံဗ္တိုက် မွဲကဆံၚ်တုဲမွဲကဆံၚ်ဏောၚ်ဂှ် နာဲနဂါ ထံက်ထ္ၜးလဝ်ရ။

ဌာန်ဂအုပ်ပၞာန်ရးအဂၞဲဝွံ ဖျေံသ္ဇိုၚ် ပ္ဍဲ( ရခိုၚ်ကုန်း) လ္တူဍုၚ်မတ်မလီုဂှ်တုဲ ဒးကေတ်တာလျိုၚ် ရေၚ်တၠုၚ်ကဵု ကိစ္စစပ်ကဵုပရေၚ်ချဳဒရာၚ်ပၞာန် ကေုာံ ပရေၚ်ဂီုကၠီု၊ ပရေၚ်စဵုဒၞါ တွဵုရးဍုၚ်မန် ကေုာံ တွဵုရးကရေၚ်တံ အဓိကရ။

နူကဵုဒဒန်ၜါသွာၚ် ဂကောံဒပ်ပံၚ်ကောံပၠန်ဂတးတံ မသီဂွံလဝ်ဂှ် လုပ်စိုပ်ဍုၚ်မုဟ်ဍုၚ်တုဲ နူကဵုဂၠံၚ်ကာမုဟ်ဍုၚ်−မတ်မလီုဂှ် ဂွံစိုပ်ဌာန်ဂအုပ်ပၞာန်ရးအဂၞဲဂှ် နကဵုကွဳစက်မ္ဂး လအ်စၜိုတ်မွဲနာဍဳဓဝ်ရ။

မွဲလ္ပာ်ဂှ်ပၠန် ဗ္ဒိုပ်ဒပ်ကံၚ်ဇြဳပၞာန် မၞုံအပ္ဍဲတွဵုရးဍုၚ်မန်ဗွဲမဂၠိုၚ်ဝွံ တန်တဴဒၟံၚ် လ္ပာ်ဗၟံက်ဂၠံၚ်ဇၞော်ပျဳထံၚ်သုဂှ်တုဲ လ္ဂောံကဵုအကာဲအရာတိဍာ်ဗလးတိဏံမ္ဂး ပွိုၚ်ဍုၚ်လ္ၚဵု နူကဵုတွဵုရးကရေၚ်ကဵု တွဵုရးမန်တံဂှ် ဆက်စၠောံလဝ် နကဵုရေၚ်ဒဵုတံရ။

နကဵုတွဵုရးဍုၚ်မန် သ္ကုတ်သၠုၚ်ကျာ ယဝ်ရပံက်မုက်ပၞာန် လ္ပာ်မုဟ်ဍုၚ်−မတ်မလီုမ္ဂး နူကဵုတဂေါန်ဒေၚ်−အၜေတ် စဵုကဵုဇြပ်ဗု−ဍုၚ်ရေဝ်ဂှ် မွဲအခိၚ်ဓဝ် ပံက်မုက်ပၞာန်တုပ်ပ်တုဲမှဟေၚ် ထပိုတ်ကၠေံရိုဟ်ကၞက် တမ်ဒပ်ကံၚ်ဇြဳပၞာန်တံမာန်ဏောၚ်ဂှ် ညးခါတ်အကာဲပရေၚ်ပၞာန်တံ ထံက်ထ္ၜးလဝ်အိုတ်ရ။

နကဵုကံၚ်ဇြဳပၞာန် ဟိုတ်နူချဳဒရာၚ်ပၞာန် ၁၀၂၇ တုဲ သၠုၚ်ပ္တိုန်လဝ်ပရေၚ်ဂီုကၠီု ကုပွိုၚ်ဍုၚ်ဒးဒုၚ်ဗ္တိုက်မာန်တံကဵု ပွိုၚ်ဍုၚ် ပရေၚ်ချဳဒရာၚ်ဂကောံဇြဟတ်ပၠန်ဂတး ဇြဟတ်ခိုဟ် အပ္ဍဲတွဵုရးတံဂှ်တုဲ ဒစးဒုၚ်တုဲပလေဝ်ပလေတ်ဒၟံၚ် သွက်ပၞာန်ဒုၚ်ရောၚ်ဂှ် ဂွံတီကေတ် ဇရေၚ်ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−S.O.F