သဵု(လ်) ၊ နဝ်ဝေမ်ဗာ ၁၅
G7 ဝွံ ဒၟါနူဒတုဲဖဵုညးတံတုဲ က္တဵုဗဒှ်လဝ် ပဋိပက္ခဂမၠိုၚ်တုဲ ဒှ်ဒၟံၚ်ဆၜိုတ်အရာသှ်ေသၟေဟ် ခေတ်ပၞာန်ဂံက် မလုက်ဒွံဒၟံၚ် အဝဵုအပိုၚ်အခြာဍုၚ်တၞဟ်သ္အာၚ်တံဓဝ်ရဂှ် ဒဒှ်ရကိုဝ်ရဳယျာသၟဝ်ကျာ ပါ်ပါဲလဝ်ဂှ် ဌာန်ပရိုၚ် KCNA ထ္မံက်ထ္ၜးလဝ်ရ။
တၚ်လလောၚ်တြး ဝန်ဇၞော်ကာဍုၚ်သ္အာၚ် G7 အပ္ဍဲသတ္တာဟလောန်ကၠုၚ်တေံဂှ်ဝွံ ဒဒှ်ရဒှ်တၚ်လလောၚ်တြး ဖျေံကဝု ကုအဝဵုအပိုၚ်အခြာ ကေုာံ ပရေၚ်ဂီုကၠီုအပိုၚ် ကၟိန်ဍုၚ်ဂမၠိုၚ်တံဂှ် ဒါရိုက်တာကာနာနာ ဌာနက္ဍိုက်ပ် ဂကောံကေၚ်ကာဍုၚ်သ္အာၚ်၊ ဌာနဝန်ဇၞော်ကာဍုၚ်သ္အာၚ် ပျုၚ်ယာန် မေဿတာဂျိုဝ်ချိုဝ်သူ ကလေၚ်ပါ်ပါဲလဝ်ရ။
ပ္ဍဲကဵုတၚ်လလောၚ်တြးပံၚ်တောဲ G7 မလလောၚ်ပ္တိတ်လဝ်ဂှ် ရန်ကဵုကမၠောန်ပရေၚ်ဗ္စာရဏာမၞိဟ်တံဂှ်တုဲ သွက်ဂွံဒေါအ်ဇူကဵု ပေါဲဗ္တိုက်အေဿရေ−ဟာမာသ်တံ ခေတ္တဂှ်ကီု၊ ပ္ဍဲကဵုပေါဲပၞာန်ရုယှာဂှ် ဒဒှ်ရထံက်ဂလာန် ကုယူကရုၚ်ဂှ် သွက်ဂွံထပ်သ္ပဒတန်ဂှ်ကဵု ဒဒှ်မဖျေံကဝု ကုပရေၚ်ကိုဝ်ရဳယျာသၟဝ်ကျာ လှဲပြံၚ်လွဟ်လက်နက် ကုရုယှာတံ၊ ပရေၚ်စမ်ၜတ်ကမ်လှောဝ်တံ ဒှ်တမ် တၚ်နၚ်တံဏံ ပါလုပ်ရ။
“ G7 မသ္ကဵုဒှ်တဴ အကြေပ်အဂြတ်ဍုၚ်သ္အာၚ်ဂှ်ဝွံ သွက်ဂွံဂၠါဲဒုဟ် ကုကၟိန်ဍုၚ် မၞုံကဵုအဝဵုအပိုၚ်အခြာအပိုၚ် မဗၠးၜးတံဂှ်တုဲ ဟီုလဝ်သာ်ဏံ မဒှ်ရ၊ G7 ရဟေၚ် ဒှ်ရိုဟ်ကၞက်အဓိက မပလီုပလာ် ပရေၚ်ဂီုကၠီု ကေုာံ ပရေၚ်ၜိုဟ်လလမ် စပ်ကဵုအလုံဂၠးတိဂှ်တုဲ ပ္ဍဲအရာပ္တန်ပ္တူ စေဝ်ပၞောန်ဍုၚ်သ္အာၚ် မဗဗွဲဓဝ်တံဂှ်လေဝ် ဒှ်တဴအရာတာဒၞါအဓိကမွဲရ” သာ်ဝွံ မေဿတာဂျိုဝ် ဟီုဂးလဝ်ရ။
သ္အာၚ်နူဂှ်ပၠန် ဂကောံဏံဝွံ သ္ပစၞး ကုဗွိုၚ်ဍုၚ်သ္အာၚ်တံမာန်ဟွံသေၚ်တုဲ စဵုဒၞါလဝ်ဒတုဲဖဵု ကၟိန်ဍုၚ်လၟိဟ်မအောန်တံသၟးရတုဲ ပွမထံက်ပၚ်လွဟ်လက်နက် မသ္ကဵုချိုတ်တဴမာန် ကုယူကရုၚ်ဂှ်လေဝ် ပလီုပလာ်ဒၟံၚ် ပရေၚ်ဂီုကၠီု ကေုာံ ပရေၚ်ညိၚ်ဝတ် ဥရဝ်ပ နကဵုတၚ်ရန်တၟံနွံနွံရောၚ်ဂှ်လေဝ် မေဿတာဂျဵု ဟီုဂးလဝ်ဏီရ။
သ္အာၚ်နူဂှ်ပၠန် ပရေၚ်ဗ္တိုက်နကဵုဂအုံဗွဝ် ပ္ဍဲဂါဇြာ အေဿရေမကလိလောန်လဝ်ဂှ် ဝါယှေန်တာန် စဵုဒၞါကဵုလဝ်ရောၚ်ဂှ် စောတ်စောဲလဝ်ရ။
တၚ်လလောၚ်တြး ကိုဝ်ရဳယျာသၟဝ်ကျာ သာ်ဏံဂှ်ဝွံ ဒှ်ဒၟံၚ်မွဲအခိၚ်ဓဝ် ကုအခိၚ်ဒုၚ်တဲကၠောန်ဗဒှ် ပေါဲသဳကၠဳညးစၞး နူကဵုကၟိန်ဍုၚ် မလုပ်ဂကောံကောပ်ကာဲကုလသမဂ္ဂ (UNC) ၁၇ ဂကောံ မရေၚ်တၠုၚ်ဒၟံၚ် ပရေၚ်ဒေါအ်ပန်ပှော်ပေါဲပၞာန်ကိုဝ်ရဳယျာတံဂှ်ရ။
သွက်ဂွံခၠေဝ်ပလန် ကုပရေၚ်ဂၠါဲသၞ ကိုဝ်ရဳယျာသၟဝ်ကျာတံဂှ်တုဲ သွက်ဂွံဖျေံစၟတ် ကတိကဝတ်တံမာန်ဂှ်လေဝ် ပ္ဍဲကဵုပေါဲသဳကၠဳဏံ စၟဳစလဝ်ရောၚ်ဂှ် ဂွံတီကေတ်ရ။
Ref: Reuters
sanlontai