ဗိက်၊ နဝ်ဝေမ်ဗာ (၁၆)
ရးဒေသဇၞော်တၞၚ်သြဳ၊ ပွိုၚ်ဍုုၚ်ဗိက်၊ ဒပ်ကံၚ်ဇြဳပၞာန်ထ္ပက်လုပ်ကၠုၚ်ကရောၚ်ပၞာန် ပ္ဍဲဂကောံကွာန်တုမ်ဗျဝ်ကျဳဂှ် ဒးဒုၚ်ဖံက်ခတိုဟ်လဝ်မာၚ်တုဲ ပရေၚ်ဇီုကပိုက်ဒးချိုတ်လဝ် နွံဒၟံၚ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံဇြဟတ်ပၠန်ဂတးတအ်ရ။
ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၅) အခိၚ်နူဂယး ၜိုတ် (၈) နာဍဳကဝက်ဂှ် ကရောၚ်ပၞာန်ကံၚ်ဇြဳပၞာန် ဇြဟတ်နွံ ၜိုတ် ၁၀၀ ဂှ် ဒပ်ပံၚ်ကောံ ဒပ်စဵုဒၞာညးဍုၚ်ကွာန်တအ် ဖံက်ခတိုဟ်လဝ်မာၚ် ဗ္ဒာဲဒဒန်ကွာန်မွှိယှောၚ်(မွေ့ရှောင်)ရ။
ဟိုတ်နူဖံက်ခတိုဟ်လဝ်မာၚ်ဏံတုဲ လ္ပာ်ကံၚ်ဇြဳပၞာန် ဒးချိုတ်လဝ် (၅) တၠတုဲ ဒးလဝ်ဘဲဝပ် (၇) တၠရဂှ် ညးတာလျိုၚ်လလောၚ်ပရိုၚ် ပဖကတၞၚ်သြဳ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကြဴနူဒးဒုၚ်ဖံက်ခတိုဟ်လဝ်မာၚ်တုဲဂှ် ကရောၚ်ပၞာန်ကံၚ်ဇြဳပၞာန် ဟွံဆက်တိုန်အာဂတတေံတုဲ ဟိုတ်နူဆက်ဖျေံလဝ်ဗဒိုပ် ပ္ဍဲဗွိုၚ်ဒဒန်မွှိယှောၚ်ဂှ်ရ အကာဲအရာပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရဂှ် ဟီုလဝ်ရ။
ဂကောံဇြဟတ်ပၠန်ဂတးတအ်ဂှ် ပ္ဍဲကဵုပွိုၚ်ဍုၚ်တၞၚ်သြဳ၊ ဗိက် ကေုာံပွိုၚ်ဍုၚ်ကျောန်သုတအ်ဂှ် ဟိုတ်နူသၠုၚ်ပ္တိုန်အာ အသိၚ်ပၞာန်ဂှ်ရ နကဵုညးဍုၚ်ကွာန်တအ် ညံၚ်စွံသတိပရေၚ်ပၞာန်ဂှ် ဗတိုက်ဖ္အောဝ်လဝ်ရ။
ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၁၃) တုဲကၠုၚ်တေံလေဝ် ပ္ဍဲကဵုပွိုၚ်ဍုၚ်ကျောန်သု အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတအ် ပေါဲဗတိုက်ၜါလ္ပာ် က္တဵုဒှ်လဝ်တုဲ ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဓလေတ်ဒၟံၚ်ရ။
ပရိုၚ် – သြၚ်လောန်တိုၚ်မ်
ဗီု -Tanintharyi PDF
sanlontai