မောၚ်တဝ် – နဝ်ဝေမ်ဗာ (၁၆)
ၜိုန်ရဒပ်ပၞာန်ရခေၚ် AA ကဵုလဝ်သမ္တီ သွက်ဂွံဒုၚ်ကမျ ဖျေံလွဟ်ကီုလေဝ် ဒပ်ကံၚ်ဇြဳပၞာန် ဟွံဒုၚ်တဲတအ်ဂှ် ဟိုတ်နူဒးဒုၚ်ဗက်ဗတိုက်လဝ်တုဲ လ္ပာ်ဒပ်ပၞာန် ဒးချိုတ်လဝ် (၅) တၠရဂှ် လလောၚ်တြးပ္တိတ်လဝ် ပရိုၚ်ရ။
တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၁၅) အခိၚ်နူဂယးပြဟ်ဂှ် ပ္ဍဲကဵုခရာဇမ္ၚောဲ ၃.၃ ကဳလောမဳတာ လ္ပာ်ဒိုဟ်ဨသာန် ကွာန်ကာန်ပျေန် မောၚ်တဝ် တွဵုရးရခေၚ်ဂှ် ဗက်ဗတိုက်လဝ် ကောန်ဒပ်ကံၚ်ဇြဳပၞာန်ဟွံဒုၚ်ဖျေံလွဟ်တအ်ဂှ်ရ။
ဟိုတ်နူဗတိုက်လဝ်ဗီုဏံတုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၅) တၠ တုဲ ညးဇီုကပိုက်ဒးလဝ်ဘဲဝပ်တအ်လေဝ် နွံရဂှ် ဟီုလဝ်တုဲ ထပ်ဗတိုက်အာ ညးဟွံဖျေံလွဟ်ဟွံဒုၚ်ကမျတအ်ပၠန်ရောၚ်ဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။
ပ္ဍဲကဵုပေါဲဗတိုက်တွဵုရးရခေၚ် စချဳဒရာၚ်လဝ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၁၃) ဂှ် နူလ္ပာ်ကံၚ်ဇြဳပၞာန် ဗၠာဲသၟိၚ်ဖျေံလဝ်လွဟ်လဝ် ဗ္ဒာဲ (၅၀) နွံလဝ်တုဲ ဒးဗလးလဝ်တဲ ဗဒိုပ် ဗ္ဒာဲ (၄၀) ပြၚ်ပြၚ်ရ။
သ္အာၚ်နူဂှ်ပၠန် ကောန်ဒပ်ကံၚ်ဇြဳပၞာန်ကဵု ကောန်ဒပ်ဗၠာဲသၟိၚ် (၁၀) တၠပြၚ်ဒးချိုတ်လဝ်ရဂှ် ဂွံတီကေတ် အတိုၚ်တၚ်လလောၚ်တြး AA ရ။
ပရိုၚ် – သြၚ်လောန်တိုၚ်မ်
ဗီု – ဒပ်ပၞာန်ရခေၚ် (AA)
sanlontai