ပ္ဍဲပေါဲဗတိုက်တက္ကသိုလ်လွိုၚ်ကဝ် လ္ပာ်ဒပ်ကံၚ်ဇြဳပၞာန် ဒးချိုတ်လဝ် (၁၁၀) ပြၚ်၊ ရပ်ဂွံလဝ်ဂၠုဲပၞာန် (၃၈) တၠ

လွိုၚ်ကဝ်-နဝ်ဝေမ်ဗာ (၁၆)

တွဵုရးကရေၚ်ဍာဲ၊ ဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲတက္ကသိုလ်လွိုၚ်ကဝ်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတအ် လုပ်ဗတိုက်လဝ်တုဲ လ္ပာ်ဒပ်ပၞာန် ဒးချိုတ်လဝ် (၁၁၀) တၠပြၚ်ရဂှ် KNDF လလောၚ်တြးလဝ် ပရိုၚ်ရ။

ပရေၚ်ချဳဒရာၚ်ပၞာန် ၁၁၁၁ စချဳဒရာၚ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ ၁၁ တုဲကၠုၚ်တေံ ပ္ဍဲကဵုတ္ၚဲမရနုက်ကဵုတတိယ ကေုာံတ္ၚဲစတုတ္ထဂှ် ဗတိုက်သရိုဟ်လဝ် ခမရ – ၄၂၅ ကဵု ခမရ – ၆ သၟဝ်ၝောံဒပ် – ၆၆ ကံၚ်ဇြဳပၞာန် ဖျေံလဝ်ဗဒိုပ် ပ္ဍဲတက္ကသိုလ်လွိုၚ်ကဝ်ဂှ် ပေၚ်ပေၚ်မာန်ကၠုၚ်ရ။

ပ္ဍဲကဵုပေါဲဗတိုက်ဂှ် လ္ပာ်ဒပ်ကံၚ်ဇြဳပၞာန် ဒးဂိလဝ်တုဲ ပါဲနူမၞိဟ်ဒးချိုတ်လဝ်ဂှ် ရပ်ဂွံလဝ်ဂျိုၚ်ၚ် (၃၈) တၠရဂှ် KNDF ကဵုလဝ်သမ္တီရ။

ပ္ဍဲကဵုညးဒးချိုတ်လဝ်တအ်ဂှ် ပါလုပ်သီုသ္ကိုပ်တံဒပ် ဒု-သ္ကိုပ်တံဒပ်ကံၚ်ဇြဳပၞာန် ခမရ-၄၂၅ ကြပ်ဒှ်သီုအလုံမွဲတံဒပ်တုဲ ဇြဟတ်ခမရ ဗ္ဒာဲကဝက် ဗတိုက်သရိုဟ်မာန်လဝ်ရဂှ် ဂွံတီကေတ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၄) ဂှ်မ္ဂး သွက်ဂွံဗတိုက်သရိုဟ်ကောန်ဒပ် ခမရ-၆ ဖျေံလဝ်ဗဒိုပ် ပ္ဍဲတက္ကသိုလ်ဏံ ပေၚ်ၚ်မာန်ဂှ် စချဳဒရာၚ်လဝ်တုဲဂှ် ပ္ဍဲအခိၚ်ဇိုၚ်သဝ်တ္ၚဲဂှ် ညံၚ်ကောန်ဒပ်ကံၚ်ဇြဳပၞာန် သှ်ေၜက်ဒၟံၚ်တအ် ဂွံဖျေံလွဟ် ဟိုတ်နူကဵုလဝ်အခေါၚ်အရာဂှ်ရ ကောန်ဒပ်ကံၚ်ဇြဳပၞာန် (၃၂) တၠ သ္ကိုပ်ဒပ်လ္ပာ် ကောၚ်မျေတ်ဥူ က္ဍိုက်လဝ်က္ဍိုပ်ဂှ် ဖျေံလဝ်လွဟ် ဒုၚ်ကမျလဝ်ရ။

သ္အာၚ်နူဂှ်ပၠန် ညးယိုက်ဝန် Non-CDM ၁၃၄ တၠကဵု ဂကောံသ္ၚိကၟိန် ၆၄ တၠ ဒပ်ကံၚ်ဇြဳပၞာန် သၠးထောံလဝ်တအ်ဂှ် မၚ်မွဲရံၚ်စံၚ်ကဵုလဝ် သီုဟၟဲကဵုအန္တရာဲရဂှ် ကံၚ်ဇြဳပရေၚ်အုပ်ဓုပ်ကာလအကြာကရေၚ်ဍာဲ IEC ကဵုလဝ်သမ္တီရ။

ပ္ဍဲကဵုပေါဲဗတိုက်ဏံ သီဂွံလဝ်လွဟ်ဇၞော်၊ လွဟ်ဍောတ်ကံၚ်ဇြဳပၞာန် ဂကူစုၚ် (၁၂၈) ဒကိုအ် သီုကပေါတ်မကမ်တအ်တုဲ ဂၠုဲပၞာန်ဖျေံလဝ်လွဟ်တအ်ဂှ်လေဝ် ကဵုလဝ်အခေါၚ်ဒုၚ်စသိုၚ် မူဝါဒဂၠုဲပၞာန် နကဵုသၞောဝ်ဥပဒေအေက် ဆေၚ်စပ်ကဵုသွာၚ်ပၞာန် KNDF တုဲ ပရေၚ်မၚ်မွဲရံၚ်စံၚ် စပ်ကဵုပရေၚ်ထတ်ယိုတ်တအ်လေဝ် ကဵုလဝ်ပေၚ်ၚ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု – KNDF