ဂျာကာတာ၊ နဝ်ဝေမ်ဗာ ၁၅
ကောံဓရီုကဆံၚ်လ္တူ ဝန်ဇၞော်ကာစဵုဒၞါဂမၠိုၚ် ပါလုပ်သီုကဵုသ္ကိုပ်က္ဍိုက်ပ်ကာစဵုဒၞါ အပ္ဍဲဒေသအာဇြဳယာန် ဍုၚ်ဗၟာဟွံပါဂှ် စနူဂိတုနဝ်ဝေမ်ဗာ ၁၅ တုဲ ကၠောန်ဗဒှ်ဒၟံၚ် ပ္ဍဲကဵုဍုၚ်ဂျာကာတာ ဍုၚ်အေန်ဒိုဝ်နဳယှာရ။
ကောံဓရီုကဆံၚ်လ္တူ မကၠောန်ဗဒှ်အာ လလအ်ပွိုၚ် ၂ တ္ၚဲဂှ် မ္ၚးနူကဵုဝန်ဇၞော်ကာစဵုဒၞါအာဇြဳယာန်တံဂှ် ကရောံဂကောံဇြဟတ် မဒှ်အဓိက အပ္ဍဲဒေသအေန်ဒိုဝ်−ပသိဝှေတ်ဂှ် ဝန်ဇၞော်ကာစဵုဒၞါ ဂကောံအာယှတံလေဝ် တိုန်စိုပ်ဒၟံၚ်တုဲ သွက်ဂွံသဳကၠဳ ပဋိပက္ခဍုၚ်ဗၟာကဵု ဍုၚ်သ္ကုတ်ဗၟံက်လ္ဒေါဝ်တံ နွံဒၟံၚ်ရ။
ပ္ဍဲကဵုပွံက်ပေါဲကောံဓရီုကဆံၚ်လ္တူဏံဂှ် ဝန်ဇၞော်ကာစဵုဒၞါဍုၚ်အာဇြဳယာန်တံ အာတ်မိက်လဝ် သွက်ဂွံဂၠါဲသွဟ် ဆဵုဂဗသဳကၠဳ ကေုာံ သွက်ဂွံဒေါအ်ပန်ပှော် သွက်အကြေပ်အဂြတ်ကာဍုၚ်ဗၟာဂှ်ကဵု ဒေသဂါဇြာတံဂှ်ရ။
ဝန်ဇၞော်ကာစဵုဒၞါအေန်ဒိုဝ်နဳယှာဂှ် နဒဒှ်ဍုၚ်မဿလေမ် မံၚ်တန်တဴဂၠိုၚ်အိုတ်မွဲဂှ် အကာဲအရာ ပ္ဍဲဂါဇြာတေံ ဗွဲတၟေၚ် သွက်ကိစ္စစပ်ကဵုပရေၚ်ဗ္စာရဏာမၞိဟ်တံဂှ် ဒဒှ်ရစိုတ်ဟွံခိုဟ်ဗွဲမလောန်ဂှ် ဟီုဂးလဝ်ရ။
“တၚ်ဒတူလိုၚ် အေန်ဒိုဝ်နဳယှာဂှ် ပိုတ်သ္ကုတ်တုဲ ဗိုန်ဗတ်ဒၟံၚ်ဏောၚ်။ သွက်ဂွံဒေါအ်ဒေၚ်ကဵု ပွမဂၠါဲသၞတံဂှ်ကဵု သွက်ဂွံဖန်ဗဒှ်ကဵု အစဳဇန် သွက်အရီုဗၚ်ပရေၚ်ဗ္စာရဏာမၞိဟ်တံဂှ် ကဵုဇြဟတ်ဂရိုဟ် အာတ်မိက်လဝ်ရောၚ်” သာ်ဝွံ ဟီုဂးစုတ်လဝ် ပ္ဍဲကဵုဂလာန်ပံက်အသေအဟာန်ဂှ်ရ။
သမ္မတအေန်ဒိုဝ်နဳယှာ ဂျိုဝ်ကိုဝ်ဝဳဒိုဝ်ဝ် မစိုပ်ဒၟံၚ် ဝါယှေန်တာန် အပ္ဍဲသတ္တာဟဏံဂှ်လေဝ် သွက်ဂွံပတုဲဒှ် ပေါဲပၞာန် ဟာမာသ် ကေုာံ အေဿရဂှ်ေ ကဵုလဝ်ဇြဟတ်ဂရိုဟ် ကုသမ္မတအမေရိကာန် ဂျိုဝ်ဗိုၚ်ဒေန်ရ။
အေန်ဒိုဝ်နဳယှာ မဒှ်ဥက္ကဌဒးအလန် အာဇြဳယာန်ဂှ် စပ်ကဵုဍုၚ်ဗၟာတုဲ ကြဴနူဒပ်ပၞာန်သီအဝဵု ၂၀၂၁ တုဲ ဟိုတ်နူအရာဟွံညိၚ်ဝတ်တံကဵု ပွပကီုပရာပ်တံ က္တဵုဒှ်လဝ်ဂှ်ရ ညံၚ်ဂွံစိုပ်သွဟ် မၜိုဟ်လလမ်မွဲ အပ္ဍဲကဵုဍုၚ်ဂှ် သွက်ဂွံရီုဗၚ်ကဵုအိုတ်ဂှ် ဖ္တိုက်ဖ္အောဝ်လဝ် မဟာမိတ်ဂမၠိုၚ်ရ။
မ္ၚးနူပဋိပက္ခ ပ္ဍဲယူကရုၚ် ကေုာံ ပ္ဍဲသ္ကုတ်ဗၟံက်လ္ဒေါဝ်တေံ သ္ကာတ်မြဟ်ကၠုၚ်ဂှ် ပရေၚ်ကြံၚ်မ္ၚိုဟ် သွက်ကိစ္စစပ်ကဵုတွဵုဒၞက်ဍာ် မကယျာန်ဓဝါန်ဒၟံၚ် အပ္ဍဲၜဳကြုက်သၠုၚ်ကျာတံ သၠုၚ်တိုန်ကၠုၚ်ဂှ် ကောံဓရီုမကၠောန်ဗဒှ်ကၠုၚ်လၟေၚ်သၞာံ မံက်တိတ်ကၠုၚ်လဝ်ရ။
ပါဲနူဍုၚ်ဗၟာတုဲ ဝန်ဇၞော်ကာစဵုဒၞါအာဇြဳယာန်မသှ်ေဒၟံၚ်တံဂမၠိုၚ် တိုန်စိုပ်လဝ် ကောံဓရီုဏံအိုတ်တုဲ တ္ၚဲယးဂတတေံ ဆဵုဂဗအာကဵု ဝန်ဇၞော်ကာစဵုဒၞါ အမေရိကာန် လွိုက်အဝ်သတေန်ဏောၚ် မဒှ်ရ။
ရုယှာ၊ ကြုက်၊ ဂျပါန်၊ ကိုဝ်ရဳယျာသၠုၚ်ကျာ၊ အိန္ဒိယ၊ နျူဇြဳလာန် ကေုာံ အဝ်သတြေလျတံလေဝ် သွက်ဂွံပါလုပ်ကၠုၚ် ပ္ဍဲကဵုပေါဲသဳကၠဳဏံဂှ် သၠဲပ္တိုန်အာ ပေါဲသဳကၠဳဏံ စဵုကဵုတ္ၚဲဗြဴဗ္တိဏောၚ်ဂှ် ဂွံတီကေတ်ရ။
Ref: Reuters
sanlontai