ဟိုတ်နူပရေၚ်ဗ္တိုက်တရဴကျာ ကေုာံ လွဟ်ဇၞော် ပ္ဍဲကဵုတိဍာ် KNU ဂှ်တုဲ ကောန်အရာပ် ၄ တၠ ချိုတ်တုဲ ၁၂ တၠ ကလိဂွံဝပ်

ကဝ်တူလေဝ်၊ နဝ်ဝေမ်ဗာ ၁၆

ဟိုတ်နူပရေၚ်ဗ္တိုက်တရဴကျာ ကေုာံ လွဟ်ဇၞော် ဒပ်ကံၚ်ဇြဳပၞာန် ပ္ဍဲကဵုတိဍာ်အုပ်ဓုပ်ကဝ်တူလေဝ်ဂှ်တုဲ အပ္ဍဲပွိုၚ် ၁၁ တ္ၚဲဂှ် ညးဍုၚ်ကွာန်ကောန်အရာပ် ၄ တၠ ချိုတ်အာလဝ်တုဲ ပါလုပ်သီုကဵုကောန်ၚာ်ဂှ် ၁၂ တၠ ဇီုကပိုက်ကလိဂွံလဝ်ဝပ်ရောၚ် ပ္ဍဲဂိတုနဝ်ဝေမ်ဗာ ၁၅ တေံ KNU ဗဟဵု လလောၚ်ပ္တိတ်လဝ်ရ။

နူကဵုဂိတုနဝ်ဝေမ်ဗာ ၁ စဵုကဵုဂိတုနဝ်ဝေမ်ဗာ ၁၁ ဂှ် ပ္ဍဲခရိုၚ်သဓီု၊ ခရိုၚ်ညံၚ်လေဝ်ပေန်၊ ခရိုၚ်ဒူပလာယာ မဒှ်တိဍာ်အုပ်ဓုပ် KNU ဂှ် ဒပ်ကံၚ်ဇြဳပၞာန် စွံပွန် လ္တူညးဍုၚ်ကွာန်ကောန်အရာပ်တံတုဲ အရိုဟ်ဒဒှ်တ္ၚဲ ကၠောန်သ္ပဒၟံၚ် ပရေၚ်ပန်ပှော်တရဴကျာ ကေုာံ လွဟ်ဇၞော် အပ္ဍဲကဵုကွာန်ဂမၠိုၚ်ဂှ်တုဲ သီုကဵုကၠောန်ၜိုတ်ဒၟံၚ် ပရေၚ်ဝးပ္ကဝ်အခေါၚ်အရာမၞိဟ်တံရောၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။

အပ္ဍဲခရိုၚ်သဓီု KNU ဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ကောန်အရာပ် ၂ တၠ ချိုတ်လဝ်တုဲ ၄ တၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ် ၆ မ ဇီုကပိုက်လီုလာ်အာလဝ်ရောၚ် ထ္မံက်ထ္ၜးလဝ်ရ။

ပ္ဍဲခရိုၚ်ညံၚ်လေဝ်ပေန် KNU ဂှ်လေဝ် အပ္ဍဲကဵုကွာန်တံဂှ် ဒပ်ကံၚ်ဇြဳပၞာန် ဟိုတ်နူကၠောန်သ္ပပန်ပှော်လဝ်တရဴကျာ ကေုာံ လွဟ်ဇၞော်တံဂှ်တုဲ သီုကဵုခမဳမွဲဇကုပါလုပ်ဂှ် ကောန်အရာပ် ၂ တၠ ချိုတ်အာလဝ်တုဲ ၂ တၠ ကလိဂွံလဝ်ဝပ်တုဲ ကောန်ကွာန်ဒေသ ၂၀၀ ပြၚ် ဒးဂြိပ်ဒဴပါဲဒလေတ်လဝ်ရောၚ် လလောၚ်ပ္တိတ်လဝ်ရ။

သ္အာၚ်နူဂှ်ပၠန် ပ္ဍဲခရိုၚ်ဒူပလာယာ KNU ဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ကောန်ၚာ်သၟတ် ၁ တၠ ပါလုပ်ဂှ် ကောန်အရာပ် ၆ တၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ် ၉ မလေဝ် ဇီုကပိုက်လီုလာ်အာလဝ်ဂှ် ဂွံတီကေတ် နူကဵုတၚ်လလောၚ်ပ္တိတ် KNU ရ။

ဒပ်ကံၚ်ဇြဳပၞာန်ဝွံ အပ္ဍဲတွဵုရးကရေၚ်သၟးဟွံက အလုံဍုၚ်ဗၟာ ပ္ဍဲကဵုဒေသနာနာဂှ် လၟေၚ်ဒဒှ်တ္ၚဲ ကလိလောန်ဒၟံၚ် အမှုရာဇဝတ်ပၞာန် မပ္တံကဵုရပ်ဒက်ဍဵုဍိုက်ပျဲပျာံဂစိုတ်ဂယိုၚ် ညးဍုၚ်ကွာန်ဟွံမွဲကဵုဒုဟ်ဒဏ်တံဂှ်ရောၚ် KNU သ္ဂးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−KNU